1 BATHESALONIKA 5
5
Go phakgamela tšatši la bofelo
1Ge e le tša mabaka ao le tša nako ya gona, bana bešo, ga e sa le tše le swanetšego go ngwalelwa tšona. 2Gobane lena beng le tseba gabotse gore letšatši leo la Morena le tlo tla boka lehodu ge le tla bošego. 3Ge go tlo thwe: Go khutšo! Go iketlilwe, ke mo ba tlogo welwa godimo ke tshenyego bjalo ka moima ge a welwa ke lešoko; mme ba ka se ke ba phonyokga. 4Ge e le lena Bana bešo, ga le leswiswing, mo letšatši leo le kago le wela wa lehodu. 5Ka moka ga lena le bana ba seetša, le bana ba mosegare; ga re ba bošego, ga re ba leswiswi. 6Bjale gomme, a re se keng ra robala boka ba bangwe bao. A re phakgameng re fahlogile. 7Gobane ba ba robalago ba robala bošego; ba ba tagwago ba tagwa bošego. 8Rena ba re lego ba mosegare, a re phafogeng, re apare sephemasefega sa tumelo le lerato, kuane e be go holofela phološo. 9Gobane se Modimo a re beetšego sona ga se go tlo galefelwa; o re beetše go fihlela phološo ka Mong wa rena Jesu Kriste. 10Ke yena a hwilego ka baka la rena, gore -- ge re phakgame le ge re robetše -- re phele re na le yena. 11Eletšanang ge, e mongwe a agiše e mongwe ka mokgwa wo le felago le dira ka wona.
12Bana bešo re a le kgopela, tsebang bao ba ba le swaretšego modiro; ba e lego bagolo ba lena Moreneng ba go le eletša. 13Le ba godiše sa ruri ka lerato, ka baka la modiro woo wa bona. Bang ba leago.
14Bana bešo, re a le eletša: Solang ba ba sa thakgego; le tsoše ba dipelo tše di tapilego; le thekgetše bafokodi; le se ke la felela motho pelo. 15Le bone gore go se ke gwa ba le e a lefetšago bobe ka bobe; ka mehla le otlelele go dirana gabotse le go dira bohle gabotse.
16Thabang ka mehla. 17Le se kgaotše go rapela. 18Mo go tšohle le leboge; ke sona se Modimo a se ratago, gore go be bjalo mo go lena ka Kriste Jesu.
19Le se ke la tima mollo wa Moya. 20Le se ke la nyatša diporofeto. 21Lekang tšohle, le šale le swere tše bolo. 22Ilang bobe bofe le bofe.
23Gomme yena Modimo Rakhutšo a le dire bakgethwa ba ruri; gore meoya ya lena, le dipelo tša lena, le mebele ya lena, ka moka di lotege moka, gore Mong wa rena Jesu Kriste ge a etla, a di hwetše di se ne bosodi. 24E a le bitšago ke Mmotegi; go tlo dira yena.
25Bana bešo! Le re rapeleleng.
26Dumedišang bana ba borena ka moka ka katlokgethwa.
27Ke le tlema ka la go re: Lengwalo le le balelwe bana ba borena bohle. Ke realo ka Morena.
28Kgaugelo ya Mong wa rena Jesu Kriste a e be le lena ka moka. Amene.
Currently Selected:
1 BATHESALONIKA 5: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.