1 BATHESALONIKA 3
3
Paulo o thabela tumelo ya Bathesalonika le lerato la bona
1Ke gona, re fentšwe ke tlhologelo, ra kwana gore re šale motseng wa Athene re nnoši. 2Ra roma Timotheo ngwanešo mohlanka wa Modimo, modiriši wa rena Ebangeding ya Kriste, gore a le tiiše a le eletše ka tša tumelo ya lena, 3gore go se ke gwa ba le e a kago šišinyega ditlaišegong tšeo; etšwe le tseba gore re beetšwe tšona. 4Gobane le mola re na le lena, re le boditše ra re: re ba go tlo tlaišwa; mme gwa tla gwa ba bjalo ka mo le tsebago. 5Ke ka baka leo ke fentšwego ke tlhologelo, ka ba ka roma motho, gore ke tsebe ka mo tumelo ya lena e dutšego ka gona; e se be mohlomongwe, ge moleki a le lekile, modiro wa rena wa fetoga lefela.
6Bjale gomme Timotheo ge a boa moo ga geno, o tlile a re anegela taba tše botse tša tumelo ya lena, le tša lerato la lena; a re: Le sa re gopola o botse ka mehla, le hlologetšwe go re bona, boka le rena ge re le hlologetšwe. 7Ke tšona tše di re ušitšego dipelo, Bana bešo. Ga re sa belaela ka baka la lena, ge re bona tumelo ya lena, le ge rena re le bothateng bjo bokaakaa, re tlaišega. 8Gobane bjalo re a phela, ge lena le tietše Moreneng. 9Gomme Modimo re ka mo leboga kang, ge a re thabišitše ka tše a le dirilego tšona, ge re filwe lethabo le lekaakaa pele ga Modimo wa rena ka lena? 10Bošego le mosegare re phegeletše go kgopela wa go lla, gore re dumelelwe go tla go bona difahlogo tša lena, gore re tlaleletše mo tumelo ya lena e kago hlaelwa.
11Gomme yena Modimo Tata wešo, le Mong wa rena Jesu Kriste, a a re lokišetše tsela ya go tla moo go lena. 12Gomme lena, Modimo a a le humiše leratano e be le legologolo, le lerato la go rata batho bohle bjalo ka ge le rena re le rata. 13E be go tiiša dipelo tša lena, di se be bosodi, di be le bokgethwa pele ga Modimo Tata wešo mohla mong wa rena Jesu Kriste a tlogo tla le bakgethwa ba gagwe ka moka.
Currently Selected:
1 BATHESALONIKA 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.