Ə́rɨ́b nùb tómé yi ə́llé 5
5
Sà̧à̧ Ànàníyàs ɓe Sàfíràà
1Ɨ́dù nɨ́ nɨ̀ŋgwá kù ɨ́r yi du Ànàníyàs ɓe gwi noò Sàfírà yi bií ɓɔ̧ sə́rɨ̀kɨ́nɨ ɗɔ̀ɔ́b ya ók ɓe ŋgábè. 2Ŋgə́ ɨ́ yòkkî gbɨ́ktèìn mònéè kù. Kɨ́ teré, ŋgə́ ɨ́ gì nàrénɨ nùb tómé ŋgáré. Gwi noò yi ɗəəŋɓatɨ́ u̧. 3Kí á Píyéèr yi fɔ́ ŋgə́ ɨnè: «Ànàníyàs, àm níì á Sátàìn njóhɨ wu gə́tɨ̀ gbɨ́ktèìn mònéè wu tɨ sə́re ɗɔ̀ɔ́b woò noò há̧á̧ wu a ténnà Nyéhè Sarîn kààŋ? 4Ɓwâ wu tɨ duye ɗɔ̀ɔ́b kɨ́ sə́rɨ̀wáá, tɨm kɨ́ woò á. Mwèìn wu tɨ sə́rɨce ɗɔ̀ɔ́b kɨ́ noò tɨ ókhace ɓe wu á ye? Nɨ́m ndɨŋce wu cáb wu nɨ̀mɨrí sumí ndɨ̀ŋnɨ kúúŋ nɨ́m kíì á cè ní? Kààŋ kɨ́ wu ténna wu Mèín á, nɨ nɨ̀vɨ́tɨ̀b sé.» 5Ànàníyàs óknɨ nyindí kɨ́, á ŋgə́ gusé ɗàá kúri. Ɗà vùù ɨ́ bɨ̀ɓà nɨ́ nùb yi ók àm kíì cei. 6Á wàánjííb yi go, ŋgáb ɨ́ ɓòmè fín nóò hàìngènɨ vɨ́rɨ̀nɨ.
7Sàmàìn háwà taarɨ́b cùr cwá Ànàníyàs kíì, gwi noò yi nɨ́ ɗə̀ə̀ŋwá nɨ́m yi féínna ŋgwáhé, á ŋgə́ yi lə́so yɨ́ Píyéèr yi duré. 8Ɗà Píyéèr ɨ́ fɔ̂ ŋgə́: «Tanaye mɨ, mwèìn nyí sə́rɨ ɗɔ̀ɔ́b lè noò á kɨ́ mɨ ók lè à?» Á ŋgə́ pihe: «I̧i̧, mwèìn kɨ́ á kí.» 9Kí á Píyéèr tanagi ŋgə́: «Àm níì á nyí bɨce ɓɔ̧ mbáàŋnɨ Nyéhè Kékéé? Ókye nùb tɨ vɨ́re ŋgwáá woò á cɨ̀ bɨ ɓavɨ̀rì hò̧, ŋgáb ɓace bɨ́ wu gèɓwênɨ á.» 10Ɓè mu̧u̧, ŋgə́ ɨ́ gùsê ɗàá kúri nò tómé tíí. Wàánjííb ɨ́ lówò ŋgə́ kwànɨ fín; ŋgáb ɨ́ hàìngè ŋgə́ vɨ́rɨ̀nɨ gín ŋgwáá noò. 11Mɨ̀kwìn nùb ə́mní ɓe vùùm nùb yi ók àám kíì lâs, vùù ya bɨɓatɨ́ ŋgáb.
Nɨ́ɨ́b sɨ̀sɨ̀rí bɨ kù ví̧i̧
12 Nùb tómé yi ndɨŋtɨ́ lìím bɨ ví̧i̧ ɓe nɨ́ɨ́b sɨ̀sɨ̀rí tɨŋtɨ̀ŋ nɨ̀vɨ́tɨ̀bì. Nùb ə́mní yaá ɓáàlɨ́ŋnɨ lâs sum mwi̧ yá kùb ya ɓékom gwa Sàlòmôŋ ndɨ. 13Nùb yi du ə́mní ɗàwáá yaá ŋgáb kúùmɓànɨ cei ɨ́dù, nò yi fɨ́tɨ ə́ə̀mhó̧nɨ laŋtɨ̧ɨ̧́ lénɨ kpáín ŋgábè noò yi nɨ́ ɗàà. 14Kùŋkùŋ nɨ̀vɨ́tɨ̀bì yi ə́mne Kékéé nɨ̀ŋgwáàb ɓe nɨ̀gub cúk, yaá kpáín ŋgábè kɨ́ no lénɨ lȩ́ȩ kɨ́ lȩ́ȩ. 15Ɗà kùb ɨ́ yà gètèèhó̧nɨ nɨ̀yáàb jȩ̀ȩ̀; nùb kù kòó, nùb kù cè pàmnɨ̀rí àm ɓwâ Píyéèr ɓa ndóŋniì cò̧ noò a fúùndóŋhâ nò kù tɨŋtɨ̀ŋ ŋgábè noò. 16Kùŋkùŋ nɨ̀vɨ́tɨ̀bì yaá gòtèèɓwênɨ kwɨ́ì cutɨ́b du gín Yèrúsàlèèm, gètèèwònɨ nɨ̀yáàb ɓe nùb nɨ̀wàtɨ̀b sóò, ŋgáb lâs a wáaŋce.
Jóktɨ́r kùb ya túumna nùb tóméé
17Kí á nɨ̀gáŋ satɨgàà ɓe nùb noò, kí ta kpáín Sàdúsàbì na á, ɨ́ ô bɨ́ ɓáŋhîn. Ŋgáb ɨ́ ə́tɨ̀wû ɓe nùb tómé. 18Ŋgáb ɨ́ bɨ̀ɗènndê nùb tómé dúú nìrì kù mwi̧í̧ ók ɓe nùb ɓáŋhɨ́bí no. 19Ɨ́dù sɨ́mnìín dùgal Mèín yi tómworé ɨ́ gò kùùmhó̧nɨ ŋgáb, ŋgə́ ɨ́ tànà ŋgáb ɨnè: 20«Gɨnáam Dúú Jíri Mèèín no, nyí a tànà nɨ̀vɨ́tɨ̀b nɨ́ɨ́b lâs du ɓe ɨ́r ɗíím juu hehí.» 21Ŋgáb ɨ́ jə̀ŋ nyindí kɨ́. Á ŋgáb ɗókge Dúú Jíri Mèèín no gìnɨ tɔ̀hí.
Ɓwâ kɨ́ á nɨ̀gáŋ satɨgàà ɓe nùb noò yi ɓáhe kɨ̀jííb gbàŋ Jwîf bɨ lâs àm ŋgwìn jírií ɗà ŋgáb ɨ́ tà kùb gɨ̀ gèhó̧wònɨ nùb tómé. 22Ɨ́dù ɓwâ sójààb yi féín dúú nìrì kwe, ŋgáb ɨ́ dù bɨ́ nùb tómé yó ku kwàcùwá. Á ŋgáb cuwo dúú ŋgù̧ní tàcùnɨ nɨ́m tɨ ndóŋndé. 23Ŋgáb ɨ́ tà ɨnè: «Nɨ́m kwaɓahá dúú nìrì ɗeín, nyaŋhîn mîn, nùb gə́tɨré cè ɓavɨ̀rì ə́ŋhîn. Ɨ́dù ɓwâ nɨ́m kuumndé dúhéé, nɨ́m ɨ́ dù nɨ́ ŋgáb yó ku kwàwá.» 24Ɓwâ mvèìn sójàbì Dúú Jíri Mèèín ɓe mvènnɨ́b nùb na satɨgàà yi ók nyindɨ́b kíì, mɨ̀lə́m ŋgábè ɓɔ̧ne ɨ́ ndû nɨ́ àm nùb tómé yi lɔ̧́ré, á ŋgáb yaré fɔ́nɨ nɨ́m ɓa féínniì. 25Nò kù ɨ́ féínndésò, ŋgə́ ɨ́ tànà ŋgáb: «Óknáye, nùb nyí tɨ ɗenndé dúú nìrì hwè á bɨ Dúú Jíri Mèèín no tɔ̀ɔ̀nɨ nɨ̀vɨ́tɨ̀b.»
26Kí á mvèìn sójàbì ɓe nùb noò gi gècùwònɨ nùb tómé. Ɨ́dù ŋgáb ɨ́ dù bɨ́ íí mwààwá àm ŋgáb yi du lùnɨ nɨ̀vɨ́tɨ̀b tɨ̀ lóoŋkwíikɨ́ vúm ɓe mgbárɨ̀bɨ̀. 27Cùr kɨ́ no, ŋgáb ɨ́ gèwò nùb tómé ŋgwìn jírií, ɗà nɨ̀gáŋ satɨgàà ɨ́ yà ŋgáb fɔ́nɨ ɨnè: 28«Nɨ́m tɨ kaaŋhaá nyí ɓe sûŋ cúk tɔ̀ɔ́ ɓe ɨ́r nɨ̀ŋgwá rèè ye! Ndɨŋce nɨ́ i̧? Nyí aakíí tɔ̀ɔ́ nyínè Yèrúsàlèm ndè bɨ̂ŋ nyí a ɗúkwà njóòwúnɨ àm cwá noò nɨ́mè só à!» 29Á Píyéèr ɓe nùb tómé yi ta: «Ɗúú nɨ́m jə̀ŋbɨ̂ŋ Mèín á, ɨ́ ndôŋ nɨ̀vɨ́tɨ̀b. 30Mèín tákɨ̀rɨ́b nɨ́mè yi yóŋkomndé tɨ nacutɨ́ Yésù nyí ya kpáaŋkwíiwúkɨ́ bɨ̧̀ɨ̧́ ɗàrɨ́ mè. 31Mèín ya kɨ́ɨ́ ŋgə́ no ŋgáár lame, ŋgə́ ɨ́ bì ŋgə́ Mvèìn ɓe tɨ́céín, àm gbàŋ Ísràyéèl a kwà mvókín ŋgə́ ɓandɨ sum ŋgə́ a kwà tɨ́ɨ́r cumí á. 32Nyéhè Sarîn Mèín yi na nùb du ŋgə́ jə̀ŋniì ɓe nɨ́m nùb tómé ɨ́ du mɨ̀námé nɨ́ɨ́b ya ndóŋndé ru.»
33Hȩ tɨ́ŋgù̧ú̧ bɨ yi ók àm kíì, ŋgáb ɨ́ mwèìɓà ɓe njù̧, ɗà ŋgáb ɨ́ ɗû ndɨ̀ŋnɨ kùb kwíìkɨ́ nùb tómé. 34Ɨ́dù tɨŋtɨ̀ŋ ŋgábè no, Fàrísà kù ɨ́r yi du Gàmàlíyêl yaá ɓè, ŋgə́ yɨɨ́m nɨ̀gáŋ káàtàbì kùb yi duɓa jə̀ŋniì á. Ŋgə́ ɨ́ éíwû còóm tɨŋtɨ̀ŋ tɨ́ŋgù̧ú̧ bɨ no, ŋgə́ ɨ́ tà kùb gèhó̧kɨ́yè nùb tómé lúu yáá. 35Hȩ ŋgáb fó̧ré, ŋgə́ ɨ́ tànà nɨ̀vɨ́tɨ̀b ɨnè: «Nùb Ísràyéèl, gə́tɨnáam ɓe nɨ́m nyí ɓa ndɨ̀ŋnɨ ɓe nɨ̀ŋgwáàb lèè. 36Nɨ́m kù tɨ ndɨɨ́ŋ ɓwâ kù hò̧, nɨ̀ŋgwá kù ɨ́r du Tə̀dâs tɨ féínwo, ɨ́ tà ní nò ɨ́r sóò á na; nɨ̀vɨ́tɨ̀b sàmàìn təmərì nààsɨ̀b ɨ́ ɓáhè ŋgə́ tùnɨ. Ɨ́dù hȩ kùb tɨ kwíi bɨ́ ŋgéé, vùùm nùb tɨ tukom ŋgéé lâs ɨ́ sìhè; á ə́rɨ́b ŋgéé kɨ́ ɨ́ du nɨ́ tíí gɨ̀wá. 37Cùr kɨ́ no, ɓwâ fain nɨ̀vɨ́tɨ̀bì, Yúdàs nò Gàlìléè ɨ́ féínkwà; ŋgə́ ɨ́ ɓáàrê kùŋkùŋ nɨ̀vɨ́tɨ̀bì no cùrì. Ɨ́dù kùb ɨ́ kwíìɓwêhâ bɨ́ ŋgə́, ɗà vùùm nùb yi tu ŋgéé lâs ɨ́ sìhɨ̀ɓwéhè. 38Àm kɨ́ á mɨ tana nyí ɗàrò, nyí ákɨ́ nùb lè ɓɔ̧ ya, mbɨ́knáam ŋgáb gìnɨ. Ɓetí duú ɓè ɓáhɨ́r ɓe ə́rɨ́b ŋgábè kɨ́ du ɓe nyòm nɨ̀vɨ́tɨ̀bì, nɨ́ɨ́b kɨ́ ɓa bɨ cɔ̧́nɨ á. 39Ɨ́dù duú ɓè nɨ́ɨ́b kɨ́ gomeɓa yɨ́ Mèèín, sàmàìn nyí ɓáaŋkɨ́ ŋgábè nɨ ɗàà. Gə́tɨnáam nyí tɨ̀ gain Mèín su!» Á tɨ́ŋgù̧ú̧ bɨ yi ə́mne nɨ́m Gàmàlíyêl yi ta kɨ́. 40Tɨ́ŋgù̧ú̧ bɨ ɨ́ ɓécùrówò nùb tómé ndɨ̀ŋnɨ kùb jɨ̀m ŋgáb, kààŋcùkwànɨ nùb kɨ́ nyìnkwà ɓe ɨ́r Yésùù. Kùb ɨ́ mbɨ́kcùgì ŋgáb. 41Yɨ́ kɨ́ á nùb tómé éíkɨ́gi yɨ́ ŋgù̧ní ɓe mɨ̀tù cúk àm Mèín ndɨŋ ŋgáb sèì nùb kùb túumna jábɨ́r ɓe ɨ́r Yésùù rè. 42U̧ á cè ye lâs, Dúú Jíri Mèèín no, dùgɨ̀ yúkbìn, ŋgáb yi du gɨ̀hánɨ tíí ɓe tɔ̀ɔ́ ɓe ɓéètèé Kìn Nyɔ̧ɔ̧́ du tànɨ Yésù Mèsî á na rè.
Επιλέχθηκαν προς το παρόν:
Ə́rɨ́b nùb tómé yi ə́llé 5: NTV
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2007 Alliance Biblique du Cameroun, B.P. 1133, Cameroon