Ə́rɨ́b nùb tómé yi ə́llé 6
6
Kùb cahó̧tɨ́ nɨ̀ŋgwáàb tɨ́ɓaám kpɔ́knɨ nùb tómé
1Ɓwâ yi kɨ́, hȩ nùb ə́mní yi du víndóŋnɨ tíí tíí, á Jwîf bɨ yi du nyìnnɨ gɨrêk ɨ́ yà nyì̧ì̧tèènɨ ɓe ɨ́r Jwîf bɨ ti̧né ɨnayâna kùb á bɨ njə́ə̀nɨ mámkwííb vúmè ɓwâ gɔ̀ɔ́ cɔɔ̀ŋ yáá. 2Kí á nùb tómé cóóŋ ɨ́ bɨrɨ́b lè ɓáhe kpáín nùb ə́mní lâs, tànànɨ ŋgáb ɨnè: «Tɨ̀ nɨ nyɔ̧ɔ̧́ dùr, ɓè nɨ́m mbɨ́kye tɔ̀ɔ̀ɓéènɨ Kìn Mèèín, nɨ́m a cù góòmnɨ mámkwííb íí yaà. 3Àm kɨ́ á, mwin yàá bɨ, nɨ́m ta mvókín nyínè no, nyí càhó̧bɨ̂ŋ nɨ̀ŋgwáàb tɨ́ɓaám du ɓe ɗɨ́m nyɔ̧ɔ̧́ só, yúklîn ɓe Nyéhè Sarîn, ŋgáb ɨ́ dùgwàhè ɓe kɨ̀cáàb lɨ; nɨ́m a ɗòb ŋgáb ə́r kɨ́. 4Ɗà kɨ́ nɨ́mè, nɨ́m a kwàcê mvókín mɨ̀yú̧ú̧ ɓe ɓéhèé Kìn Mèèín.» 5Mɨ̀kwìn nùb ə́mní ɨ́ ə́mnè àm kɨ́. Á ŋgáb ya ca nùb yi du yúklîn ɓe Nyéhè Sarîn ɨ́ dùgwàhè ɓe ə́ə́m jíri hȩ Étèn u̧, dùgɨ̀ Fɨ́lɨ̂b, Pùròkóòr, Nìkànóòr, Tìmôŋ, Pàrmènâs ɓwê, ɨ́ Nìkòlâ nɨ̀ŋgwá Àŋtìyóòs ya ɓandɨkɨ́ síí Jwîf àm ə́mní rɨ. 6Kí á kùb ya gewo ŋgáb túùmnànɨ nùb tómé, ɗà nùb tómé ɨ́ yóŋnà ŋgáb Mèín, a heiwúce ŋgáb ŋgárɨ̀b ŋgwéé nànɨ ŋgáb faám. 7Kìn Mèèín yaá gɨ̀ndóŋnɨ tíí tíí, nùb ə́mní a víndóŋce Yèrúsàlèm, ɗà nùb na satɨgàà ví̧i̧ ɨ́ yà ə́ə̀mnɨ Kìn Nyɔ̧ɔ̧́.
Bɨbi kùb yi bɨ Étèn
8Étèn nò yi kwa nyòme ɓe faám Mèèín yaá ndɨ̀ŋnɨ nɨ́ɨ́b kàtɨ́b sɨ̀sɨ̀rí ɓe lìím bɨ mvókín nɨ̀vɨ́tɨ̀bì. 9Kí á nɨ̀vɨ́tɨ̀b ví̧i̧ ɨ́ ə́tɨ̀wû ɓe Étèn. Nùb kɨ́ yaá péín kù Jwîf bɨ yi go Sìlìsî ɓe Ɗɔ̀ɔ́b Àsíì, péín kù cè Jwîf bɨ yi go Sìrên ɓe Àlèksàndɨ̀ríì yi du nùb dúú mɨ̀yú̧ú̧ kùb ɓé «Mbɔ́klɨ́b kùb ya ákɨ́ nìrì» rɨ. Ŋgáb yaá mɨ̀ndárèé ɓe Étèn. 10Ɨ́dù yi yɔ́ktɨ́ nùb kɨ́ jíìnɨ, ɓetí ŋgə́ yaá nɨ nyìnnɨ ɓe kɨ̀cáàb Nyéhè Sarîn yi du ŋgə́ nàniì. 11Àm kɨ́ á ŋgáb yi móobgi nɨ̀vɨ́tɨ̀b ɓe mòné gìnɨ tàtèènɨ ɨnè: «Nɨ́m óktɨ́ ŋgə́ nyìnɓáàŋkɨ́nɨ ɓe ɨ́r Mòyîs ɓe Mèèín!» 12U̧ á ŋgáb yi wútɨ nɨ̀vɨ́tɨ̀b, ɓe kɨ̀jííb, ɓe nɨ̀gááŋ káàtàbì. Ɗà nùb kɨ́ ɨ́ ŋgɨ̀ɨ̀sò gín Étèn, ŋgáb ɨ́ bɨ̀gè ŋgə́ ɓáhɨ́r ŋgwìn jírií. 13Ŋgáb ɨ́ gèɓwéhè mɨ̀námé kàŋnì bɨ kù, nùb kɨ́ ya taá ɨnè: «Nɨ̀ŋgwá rè nɨ mbɨ́kháwa nyìnɓáàŋnɨ ɓe ɨ́r Dúú Jíri ók ɓe Mèèín, dùgɨ̀ ɓe ɨ́r ɓíì Mòyíìs! 14Nɨ́m ma ók Yésù nò Nàsàréèt na, nɨ́m tɨ óó nɨ̀ŋgwá rè tànɨ Yésù kɨ́ ɓa ɓə̀tɨ̀kɨ́nɨ Dúú Jíri Mèèín á, ŋgə́ a cə́ndɨ̀kɨ́ɓwéhè ɗɨ́m juu Mòyîs yi tɔɔkɨ́sona nɨ́mè.» 15Vùùm nùb yi du dúú ŋgù̧ní kɨ́ noò lâs yaá íí Étèn ya, á ŋgáb pə́cì na ɓɨ̀m noò á nɨ hȩ kɨ́ dùgal Mèèín.
Επιλέχθηκαν προς το παρόν:
Ə́rɨ́b nùb tómé yi ə́llé 6: NTV
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2007 Alliance Biblique du Cameroun, B.P. 1133, Cameroon