लुका 14
14
येसु फरिसिको घरमा
1एउटा बार्नाको दिन येसु फरिसिहान्को एउटा अगुवाको घरमा नेउता पाइकनि खाए गेलोरहिक्। फरिसिहान्इ येसुके फसाए मउका चाहिधर्लो रहाइ। 2ओइथि हात गोड फुल्लो एउटा मानिस येसुको आघु रहिक्। 3येसुइ धर्म नियमको पन्डितहान र फरिसिहान्के सुध्याइक, “बार्नाको दिनमा मदाइलो मानिसके सन्चो बनाए होख्ताइ कि नाहे?”
4तब उनहान लाभि बिस्वाइ। अनि येसुइ मदाइलोको जिउमा हात धरिकनि सन्चो बनाइकनि पठाइक्। 5र उनहान्के सुध्याइक, “यदि बार्नाको दिनमा ताहान मध्य कुन्हुँको बच्चा अथवा गाइ, गोरु इनारमा खस्नि ओख्राइ छिट्टे नाझिक्ताओ र?”#मति १२:११
6तब फेरि उनहान्इ केइ कहे नासक्वाइ।
येसुइ नम्र बने सिखाइक्
7उथि आउलो पहुनाहान्इ नाम्रो ठउँरि छान्लो देखिकनि येसुइ एउटा उखान कहिक्, 8“ताहान्के कुनुहि बिहा भोजमा नेउता देनि नाम्रो ठउँरिमा झिन बिस्हेउ क्यारेकनि ताहान कते बड्ढो मानिसइ नेउता पाउलो होख्बाइ।#हितोपदेस २५:६,७ 9तब नेउता देलाहार आइकनि एख्राइ ठउँरि देहइ कहिकनि तोर्हाइ उठाइदेबि र तइ लाजइ रक्तारो होख्ले तर बिसे पर्बि। 10बरु बिहामा जिते पाछु जाइकनि बिस्हेउ र नेउता देलारइ आइकनि ताहान्के भित्र आउबाइ, उप्रो आउबाइ कहिकनि नाम्रो ठउँरिमा बिसाबि ओइबेरा सभइको आघु ताहान्को इज्जत बड्को होख्ताइ। 11क्यारेकनिसिन आफि बड्को होखे खोज्लारहान बिर्झिन होख्तात् र आफिके बिर्झिन बनालारहान चाहि बड्को होख्तात्।”#मति २३:१२; लुका १८:१४
12अनि येसुइ नेउता देलाहार अगुवाके कहिक्, “भोज गर्ते आफन्तहान्के, भयारहान्के, साखाहान्के र धनि छिमेकिहान्के कुन्हुँके पनि नेउता झिनदेहेस। उनहान्इ पनि तोर्हाइ आफ्नो पलामा नेउता दिहिकनि तोरो गुन फर्काइ देतात्। 13बरु भोज गर्ते गरिब, लङडाहान र अन्ध्राहान्के नेउता देहेउ। 14एस्ने गर्नेसिन ताहान्इ आसिस पाउताओ क्यारेकनिसिन उनहान्इ ताहान्के केइपनि देहे नासक्तात्। तब धर्मि मानिसहान मर्लोभि जिउते होख्ते परमेस्वरइ ताहान्के सभइ इनाम देतात्।”
बड्को भोजको उखान
(मति २२:१-१०)
15येसुको बोलि सुनिकनि साङ्हे बिस्लो एउटाइ कहिक्, “परमेस्वरको राज्येमा भोज खाए पाउलाहार धन्येको हो।”
16येसुइ जबाफ दिहिक्, “कुन्हुँ एक जना मानिसइ बड्को भोज गर्ते धेरे मानिसहान्के नेउता दिहिक्। 17अनि भोज खइलाहार बेरा होखिक् कहि पहुनाहान्के एस्नो कहे नोकरके पठाइक्, ‘आओ, सभइ चिज तयार होखिसकिक्।’ 18तर निम्तालुहान्इ एउटा एउटा बाहाना बनाइकनि आए नामान्वाइ। एउटाइ कहिक्, ‘मइ खेत किनलाटिन। ओइ चाहे जितिन् उसिगर्ते आए नासक्तिन् मराइ माफ गर्दे।’ 19र आर्कइ कहिक्, ‘मइ पाच हल गोरु किनलाटि, जोतिकनि चाहे बाटि। ओसिगर्ते भोजमा आए नासक्तिन् मराइ माफ गर्दे।’ 20फेरि आर्कइ कहिक्, ‘मइ भर्खरे बिहा गर्लाटिन। ओसिगर्ते मइ आए नासक्तिन्।’ 21तब नोकर फर्किकनि आइक, र मालिकके सभइ कुरा कहिदिहिक। अनि मालिक रिसाइकनि नोकरके कहिक्, ‘छिट्टे सहरको बाटवोट र गल्लिमा जाइकनि गरिब, लङ्डावोङ्डा र अन्ध्राहान्के बोलाइकनि आन्।’ 22नोकरइ कहिक्, ‘तइ कलो जस्ने गर्ते पनि अझि ठउँ खालि बाटि।’ 23फेरि मालिकइ नोकरके कहिक्, ‘सहरको बाटपट्टि र गल्लिपट्टि जाइकनि मानिसहान्के कर गरिकनि आन्हेस र मोरो घर भरेलो होखेपर्ताइ। 24क्यारेकनिसिन मइ ताहान्के कतिन, पहिलिको निम्तालुहान्इ कुन्हुँइ पनि मोरो भोजको स्वाद चाखे नापाउतात्!’”
येसु खिरिस्टको चेलाहान्इ छाडे पर्लार चिज
(मति १०:३७-३८)
25एक दिन मानिसहान्को बड्को भिड येसुको पाछु जितिहि रहिक्। येसुइ उनहान पट्टि फर्किकनि कहिक्, 26“मराइ पछ्याए खोज्लारइ आफ्नो बुबाआमा, दाजिभइया, दिदिबहिनि, छउनाछउनि, परिवार र आफिके कते बड्ता मराइ माया गरे पर्ताइ नत्र मोरो चेला बने नासक्ताइ।#मति १०:३७ 27आफ्नो कुरुस बोकिकनि मराइ नापछ्यालार चाहि मोरो चेला होखे नासक्ताइ।#मति १०:३८; १६:२४; मर्कुस ८:३४; लुका ९:२३ 28यदि कुनुहि धरहरा बनाए इच्छा गर्नि। ओइ बनाए कते पहिलिहि ज कत्का खर्च लाग्ताइ कहि हिसाब नागर्ताइ र? 29धरहराको जग बनाइकनि पुरा गरे नासकिक् कनि देख्लार मानिसहान्इ ओख्रो खिसि गर्तात्। 30र कतात्, ‘इ मानिसइ बनाए त खोजिक, तर पुरा बनाए नासकिक्!’ 31फेरि, ‘कुन्हुँ राजा आर्को राजासिन लडे जिते दस हजार सिपाहि लिहिकनि बिस हजार सिपाहि होख्लोसिन लडे सकेताइ कि नासकेताइ कहि पहिलिहि ज नासोच्ताइ र?’ 32यदि लडे नासक्ताइ कनि ओइ पहिलिहि ज खबर पुगालार राजदुतके कसिगरि मिले सकेताइ कहि खबर बुझे पठातात्। 33ओसिगर्ते ताहान्इ आफिसिन होख्लो सभइ चिज नाछाड्ताओ कनि उ मोरो चेला होखे नासक्ताइ।
अलिन नुन
(मति ५:१३; मर्कुस ९:५०)
34“नुन नाम्रो चिज हो, तर नुनको स्वाद अलिन होख्नि फेरि क्याइ नुनिलो बनाए। 35उ मल पनि नाहोख्ताइ र माटिमा पनि नामिल्ताइ अनि मानिसहान्इ ओतिके हुर्याइ देतात्। जोख्रो कान बाटि, ओइ सुनो।”
Επιλέχθηκαν προς το παρόν:
लुका 14: BOTE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2024 (Active), Mother Tongue Translators Society and Wycliffe Bible Translators, Inc. All rights reserved.