लुका 13
13
आफ्नो पाप स्विकार गरि फर्केहेउ
1ओइथि होख्लो मानिसहान्इ येसुके कहाइ, “भोग चढाइ धार्लो बेरामा पिलातसइ कत्का गालिलिहान्के मारिक र उनहान्को रकत भोगको रकतसिन मिस्हिक्।” 2येसुइ उनहान्के कहिक्, “एसिगरि मारेलो गालिलिहान क्या अरु सभइ गालिलिहान कते बड्ता पापि रहाइ कहि ताहान्इ सोचताओ? 3ओस्नो नाहो! मइ ताहान्के कतिन, आफ्नो आफ्नो पाप मानिकनि परमेस्वरपट्टि मन नाफर्कानिसिन, ताहान पनि ओस्ने गरि मर्ताओ। 4फेरि सिलोआमको धरहरा भत्किकनि अठार जना मोर्लो मानिसहान क्या येरुसलेमको अरु मानिसहान कते बड्ता पापि रहाइ कहि सोचताओ? 5ओस्नो नाहो! मइ ताहान्के कतिन, आफ्नो आफ्नो पाप मानिकनि परमेस्वरपट्टि मन नाफर्काताओ कनि, ताहान पनि ओस्ने गरि मर्ताओ।”
फर नाफर्लार रुखको उखान
6येसुइ उनहान्के एउटा उखान कहिक्, “एक जना मानिसइ आफ्नो अङ्गुरको बारिमा नेभाराको रुख रोप्लो रहिक्। ओइ मानिस नेभारा फर्लाटि कि नाहे कहि घरि घरि चाहे जितरिक तर फर नाफर्लो देख्तरिक। 7मालिकइ बारिमा धन्दा गर्लार नोकरके कहिक्, ‘चाहइ, मइ तिन बर्सभि इ नेभारा फरिक कि नाहे कहि चाहि धार्लोटिन, तर आज सम्म पनि फर नाफर्लाटि। उसिगर्ते इ रुखके काटिकनि जराइदिहि, भुइ मात्रे ओगटि धार्लोटि?’ 8तर बारिमा धन्दा गर्लार नोकरइ कहिक्, ‘मालिक अझइ एक बर्स सम्म रहे दिहुँ, मइ गोडिकनि सभइपट्टि मल घाल्तिन। 9फर फर्नि ठिके बाटि, नाफर्नि काटिदेभु।’”
येसुइ बार्नाको दिनमा मदाइलो बेटिके सन्चो बनालो
10एउटा बार्नाको दिनमा येसुइ सभाघरमा बचन दिहिधार्लो रहिक्। 11उथि एक जना बेटिके भुत आत्मा लाग्लो अठार बर्स होख्लो रहिक्। उ कुप्रि होखिकनि आफि सोझो होखे नासक्तरहिक्। 12येसुइ ओख्राइ देखिक् र आघु बोलाइकनि कहिक्, “बेटि, तइ आफ्नो रोगभि सन्चो होखेर।” 13जब येसुइ ओख्रो उप्रो आफ्नो हात धरिक तब उ तुरुन्ते सोझो होखिघालिक, र परमेस्वरको पर्सम्सा गरे लागिक्।
14येसुइ बार्नाको दिनमा सन्चो बनालो कारनइ सभाघरको सासक रिसाइक, अनि मानिसहान्के कहिक्, “धन्दा गर्लार छ दिन बाटि ओइ दिनमा सन्चो होखे आहेउ, तर बार्नाको दिन बार्हेउ!”#प्रस्थान २०:९,१०; ब्यवस्था ५:१३,१४
15पर्भुइ ओख्राइ कहिक्, “ए फटाहाहान! क्या ताहान्इ बार्नाको दिनमा घारिभि फुकालिकनि आफ्नो गोरु र गधाके पानि ख्वाए नालेग्ताओ र? 16अबराहामको छउनिके अठार बर्स सम्म सइतान लाग्लो रहिक्, क्या उ बार्नाको दिनमा सन्चो होखे नापाउताइ र?” 17येसुको बोलि सुनिकनि बिरोधिहान लजावाइ, तर ओख्रो अचम्मको धन्दा देखिकनि मानिसहान रमावाइ।
भाजिको बियाको उखान
(मति १३:३१-३३; मर्कुस ४:३०-३२)
18येसुइ कहिक्, “परमेस्वरको राज्ये क्या जस्ने बाटि? मइ ओख्राइ क्या सिन दाजे? 19इ त एउटा भाजिको बिया जस्ने हो, एक जना मानिसइ बारिमा लेगिकनि छिटिक। र उम्रिकनि रुख जस्ने होखिक्, अनि ओइ डालाहान्मा चराहान्इ खोता बनाताइ।”
खमिरको उखान
(मति १३:३३)
20येसुइ फेरि कहिक्, “परमेस्वरको राज्येके मइ क्या सिन दाजे? 21इ त खमिर जस्ने हो। एक जना छुडियाइ पिठोमा आलिक्ता खमिर मिसाइक अनि सभइ पिठो खमिर होखिघालिक।”
साङुरि दइल
(मति ७:१३-१४,२१-२३)
22येसु येरुसलेम जितिहि गर्ते सहर सहर र गाउँ गाउँ, बचन सिखाले जाइक्। 23ओइबेरा एक जना मानिसइ ओख्राइ सुध्याइक, “पर्भु, क्या थोरे मानिसहान्इ मात्रे मुक्ति पाउतात् र?”
येसुइ उनहान्के कहिक्, 24“साङुरि दइलभि भित्र पिसे कोसिस् गर्हेउ, क्यारेकनिसिन मइ ताहान्के कतिन, धेरे मानिसहान साङुरि दइलभि भित्र पिसे खोज्तात्, तर पिसे नासक्तात्। 25र घरको मालिक उठिकनि दइल लगाबि, ताहान चाहि बाहिरभि दइल ढकढक्याले कबो, ‘पर्भु, हाम्राइ दइल खोल्देन!’ ओइ कहिक्, ‘मइ ताहान्के नाचिन्तिन कतेभि आउलो हो!’ 26अनि ताहान्इ कबो, ‘तोरोसिन बिसिकनि हामि खइतरहुँ, पिउतरहुँ, हाम्रो गाउँ घरमा बचन सिखातरहेर!’ 27तर ओइ फेरि कबि, ‘ताहान कुनको हो ताहान कतेभि आउलो हो। मइ ताहान्के नाचिन्ति, ताहान ननाम्रो धन्दा गर्लाहारहान हो, इथिभि जाइ घालो!’ #भजनसङग्रह ६:८ 28तब ताहान्इ परमेस्वरको राज्ये भित्र अबराहाम, इसहाक, याकुब र सभइ अगमबक्ताहान्के देख्ताओ, र ताहान चाहि बाहिर हुर्हेताओ, र दाँत किट्ले रउताओ।#मति २२:१३; २५:३०#मति ८:११,१२ 29मानिसहान पुर्ब, पस्चिम, उत्तर र दछिनभि आइकनि परमेस्वरको राज्येको भोजमा बट्टेतात्। 30तर आन्हा पाछु पर्लारहान आघु होख्तात्, र आन्हा आघु होख्लारहानचाहि पाछु पर्तात्।”#मति १९:३०; २०:१६; मर्कुस १०:३१
येरुसलेमके सम्झिकनि येसु दुखि होखिक्
(मति २३:३७-३९)
31ओइबेरा कुन्हुँ कुन्हुँ फरिसिहान आइकनि येसुके कहाइ, “हेरोदइ तोर्हाइ मारे खोज्लाटि, तइ इथिभि निस्किकनि जाइघाल।”
32येसुइ उनहान्के कहिक्, “जाइकनि उ स्यालके कइदिहि ‘मइ आज र काल्हेक् भुत निस्कालार र सन्चो बनालार धन्दा गर्तिन, र पर्सुलेक धन्दा सक्तिन।’ 33तर आज, काल्हेक् र पर्सुलेक मइ मोरो बाट भोए ज पर्ताइ क्यारेकनिसिन येरुसलेम बाहिर कुन्हुँ अगमबक्ताहान नामर्तात्।
34“येरुसलेम, ए येरुसलेम! तइ अगमबक्ताहान्के मार्तेर, अनि परमेस्वरइ तोरोठुँ पठालोहान्के पाथरइ हिर्कातेर! पोथिइ आफ्नो चल्लाहान्के पखिनाइ ढाकिकनि धार्लो जस्ने, मइ तोरो छउना छउनिहान्के कत्थेक पल्ट बट्टाए खोजिन तर तइ नामानेर! 35चाहइ, परमेस्वरइ तोरो घर छाड्देताइ। मइ तोर्हाइ कतिन, जबसम्म ‘परमपर्भुको नाउँमा आउलाहारके धन्ये हो’ नाकतेर, तब सम्म तइ मराइ नादेख्तेर।”#भजनसङग्रह ११८:२६
Επιλέχθηκαν προς το παρόν:
लुका 13: BOTE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2024 (Active), Mother Tongue Translators Society and Wycliffe Bible Translators, Inc. All rights reserved.