लुका 15
15
भुलाइलो भेडा
(मति १८:१२-१४)
1एक दिन येसुको बचन सुने कर उठालाहारहान र पापिहान सभइ ओख्रो नजिक आइधार्लो रहाइ।#लुका ५:२९-३० 2तर इ मानिसइ पापिहान्के स्वागत गर्ताइ, र साङ्हे बिसिकनि खइताइ कहि फरिसिहान र धर्म गुरुहान्इ गनगनाए लाग्वाइ। 3तब येसुइ उनहान्के इ उखान कहिक्,
4“ताहान मध्य कुन्हुँ मानिसको सय ओटा भेडा होख्बि ओइ मध्यमा एउटा भुलाइनि उनान्सय भेडाहान्के चहर्लेठुँ छाडिकनि भुलाइलो भेडा नाभेटाउनज्याल सम्म नाखोज्ताइ र? 5ओइ भुलाइलो भेडा भेटिसक्लोपाछु रमाइले ओख्राइ आफ्नो काधमा बिसाताइ। 6अनि घरमा आइकनि आफ्नो साखाहान र छिमेकिहान्के बोलाइकनि उनहान्के कताइ, ‘मइसिन रमाइलो गरो, क्यारेकनिसिन मइ मोरो भुलाइलो भेडा भेटालाटिन!’ 7उसिगर्ते मइ ताहान्के कतिन, आफ्नो पाप स्विकार गरे नापरलार उनान्सय धर्मि मानिसहान कते आफ्नो पाप स्विकार गर्लार एउटा पापिको लागि स्वर्गमा रमाइलो मनाहेताइ।”
भुलाइलो सिक्का
8येसुइ फेरि कहिक्, “एउटा बेटिसिन दस वटा चाँदिको सिक्का मध्यमा एउटा सिक्का भुलाइनि। आब ओइ नाभेटाउनज्याल सम्म ढेभ्रि जराइकनि, घर बडारिकनि खोज्ले कि खोज्ले नागर्ताइ र? 9ओइ भुलाइलो सिक्का भेट्नि आफ्नो साखाहान्के र छिमेकिहान्के बोलाइकनि कताइ, ‘मइसिन रमाइलो गरो, क्यारेकनिसिन मइ मोरो भुलाइलो सिक्का भेटालाटिन!’ 10मइ ताहान्के कतिन, येस्नेगरि आफ्नो पाप स्विकार गर्लार एक जना पापिको लागि परमेस्वरको स्वर्गदुतहान रमाइतात्।”
भुलाइलो छउना
11येसुइ फेरि कहिक्, “कुन्हुँ मानिसको दुइ जना छउना रहिक्। 12कान्छा छउनाइ बुबाके कहिक्, ‘बुबा, मोरो भागमा पर्लार सम्पतिको अङ्स मर्हाइ दे।’ तब बुबाकइ आफ्नो सम्पति दोहइके बाड्दिहिक्। 13केइ दिनपाछु कान्छा छउनाइ आफिसिन होख्लो धन-सम्पति बट्याकनि दुस्सिहिको देसमा गिहिक, र मोज मज्जामा आफ्नो सम्पति सकिक्। 14ओइ सभइ पइसा सकिसक्लो रहिक्। ओइबेरामा ओइ देसमा बड्को अनिकाल परिक्, र ओख्राइ खाएके पनि खाचे पर्याक। 15उसिगर्ते उ जाइक्, र ओइ देसको मानिससिन ओइ धन्दा गरे मागिक्। ओइ ओख्राइ आफ्नो खेतमा सुङगुरहान चराए पठाइक्। 16ओख्राइ कुन्हुँ पनि केइ खाए नादेतरहाइ। उसिगर्ते सुङगुरइ खइलाहार आहारा खाइकनि पेट भरे खोज्तरहिक्। 17जब ओख्रो चेत खुल्याक र कहिक्, ‘मोरो बुबाको घरमा धन्दा गर्लार नोकरहान्इ पेट भरि खाइकनि उब्रातात्, मइ कनि भुखइ मरि धार्लाटिन। 18आब मइ उठिकनि बुबाठुँ जितिन् र ओख्राइ कतिन, “बुबा, मइ स्वर्गमा होख्लो परमेस्वरको बिरुधमा र तोरो बिरुधमा पाप गर्लाटिन। 19आब मइ तोरो छउना कहेके नास्वाहेतिन, उसिगर्ते मर्हाइ तोरो धन्दा गर्लार नोकरहान मध्य एउटा जस्ने सम्झिकनि धारेस्।”’ 20तब उ उठिकनि बुबाकठुँ गिहिक।
“बुबाकइ ओख्राइ दुस्सिभि आइधार्लो देखिक्, र ओख्राइ माया लाग्याक्, अनि दुगर्ले जाइकनि छउनाके अङ्गला मारिककनि ओख्राइ चुम्मा खाइक्। 21छउनाइ बुबाके कहिक्, ‘बुबा, मइ स्वर्गको बिरुधमा र तोरो बिरुधमा पाप गर्लाटिन। आब मइ तोरो छउना कहे नास्वाहेतिन।’ 22तर बुबाकइ आफ्ने नोकरहान्के कहिक्, ‘छिट्टे सभइकते नाम्रो लुगा आनिकनि एख्राइ लगाइदेहो, अङ्ङुरिमा अउठि र गोडमा जुत्ता लगाइदेहो। 23र जाओ मोटाइलो बाछा आनो र काटो, अनि खाइकनि खुसि मनाहुँ। 24क्यारेकनिसिन इ मोरो छउना मर्लो रहिक्, फेरि बाच्लाटि, इ भुलाइलो रहिक्, र भेटाइहेलाटि।’ तब उनहान्इ खुसि मनाए लाग्वाइ।
25“ओइबेरा जेठारो छउना खेतमा रहिक्, ओइ फर्किकनि घरको नजिक आइपुग्ते ओइ बाजा बज्लो, नाचिधार्लो सुनिक। 26तब ओइ नोकरहान मध्यमा एउटाके बोलाइकनि क्या होख्तिहि बाटि कहि सुध्याइक्। 27ओइ जबाफ दिहिक्, ‘तोरो भइयार घर फर्किकनि आउलाटि र तोरो बुबाइ पालि धार्लो मोटो बाछा काटलाटि। क्यारेकनि ओख्राइ नाम्रे फर्किकनि आउलो भेटाइक्।’ 28तब उ रिसाइकनि भित्र जाए नामानिक, ओख्रो बुबाक बाहिर जाइकनि ओख्राइ फकाए लागिक्। 29ओइ बुबाके कहिक्, ‘एत्का बर्स सम्म मइ तोर्हाइ स्याहार गरिधार्लाटिन, तइ कलो सभइ आग्या मइ मानलाटिन, तर तइ मर्हाइ आफ्नो साखाहान्सिन खुसि मनाए कन्हुँ एउटा पाठा पनि नादेहेर। 30तर तोरो सम्पति बेस्याहान्सिन सक्लार इ छउना फर्किकनि आउते मोटाइलो बाछा ओख्रो लागि काटेर!’ 31तब ओइ ओख्राइ कहिक्, ‘छउना, तइ त सधइ मइसिन बाटेर, मोरो सभइ सम्पति तोरे हो। 32तर हामि इ खुसि मनाए पर्ताइ क्यारेकनिसिन तोरो भइयार मर्लो रहिक्, बाच्लाटि, भुलाइलो रहिक्, फेरि भेट्लाटाहुँ।’”
Επιλέχθηκαν προς το παρόν:
लुका 15: BOTE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2024 (Active), Mother Tongue Translators Society and Wycliffe Bible Translators, Inc. All rights reserved.