लुका 16
16
चनाख नाइक्या
1येसुइ आफ्नो चेलाहान्के कहिक्, “कुन्हुँ धनि मानिसको धन्दा गर्लारहान्को एउटा नाइक्या रहिक्। नाइक्याइ मालिकको सम्पति हिनामिना गर्देलाटि कहि ओख्रो बिरुधमा दोस लाग्लो रहिक्। 2उसिगर्ते मालिकइ ओख्राइ बोलाइकनि सुध्याइक्, ‘मइ तोरो बारेमा क्या सुन्तिहि बाटिन्? तोरो नाइक्या धन्दाको सभइ हिसाब मराइ बुझाइदे, आबभि तइ नाइक्या होखे नासक्तेर।’ 3तब नाइक्याइ मनमने कहिक्, ‘मोरो मालिकइ नाइक्या धन्दाभि निस्काइ देहे लाग्लाटि। मइ आब क्या गरे? खनजोत गरे तागत पनि नाटि, भिख मागे पनि लाज लाक्ताइ। 4आब मइ क्या गरे परलाहार हो मइ सोचिसक्लाटिन। नाइक्या धन्दाभि निस्काइदेलो पाछु पनि मानिसहान्इ मर्हाइ उनहान्को घरमा स्वागत गर्तात्।’ 5तब ओइ मालिकको एउटा एउटा रिनिहान्के बोलाइक, र पहिलाके सुध्याइक्, ‘तइसिन मोरो मालिकको रिन कत्का बाटि?’ 6तब ओइ कहिक्, ‘तिन हजार लिटर जइतुनको तेल।’ नाइक्याइ कहिक्, ‘तोरो तमसुक लेहइ र बिसिकनि छिट्टे पन्र सय लिटर लेखइ।’ 7अनि ओइ आर्कोके सुध्याइक्, ‘तोरो रिन कत्का बाटि?’ ओइ कहिक्, ‘तिन सय पचास कुन्टल गहुँ।’ ओइ ओख्राइ कहिक्, ‘तोरो तमसुकमा तिन सय कुन्टल लेखइ।’ 8इ थाहा पाइकनि मालिकइ फटाहा नाइक्याको तारिफ गरिक् क्यारेकनिसिन ओइ फटाइकनि धन्दा गर्लो रहिक्। इ सन्सारको मानिसहान आफन्तसिन लेनदेन गर्ते जोतिको सन्तानकते धेरे चनाख रतात्।
9“मइ ताहान्के कतिन, आफ्नो लागि सन्सारको धनइ साखा बनाहेउ, जब उ धन सकेताइ, ताहान्के स्वर्गमा स्वागत गर्तात्। 10थोरे चिजमा इमान्दार होख्लार मानिस धेरेमा पनि इमान्दार होख्ताइ। थोरे चिजमा बेमान गर्लार मानिस धेरेमा पनि बेमान होख्ताइ। 11यदि ताहान सन्सारको धन चलाए इमान्दार नाहोख्नि ताहान्के साचिके धनको जिम्मा कुनि देबि र? 12ताहान आर्केको धनमा इमान्दार नाहोख्नि ताहान्के आफि पाए पर्लार धन कुनि देबि?
13“कुन्हुँ नोकरइ दुइटा मालिकको सेवा गरे नासक्ताइ। कि ओइ एउटाइ कलो मान्ताइ आर्केको वास्ता नागर्ताइ कि त एउटाके माया गरिकनि आर्कोके हेला गर्ताइ इसिगर्ते ताहान्इ पनि परमेस्वर र धन दोहइको सेवा गरे नासक्ताओ।”#मति ६:२४
येसुको केइ भनाइहान
(मति ११:१२-१३; ५:३१-३२; मर्कुस १०:११-१२)
14इ सभइ बोलि सुनिकनि फरिसिहान्इ येसुको गिल्ला गर्वाइ क्यारेकनिसिन उनहान्इ पइसाके माया गर्तराइ। 15तब ओइ उनहान्के कहिक्, “मानिसहान्को नजरमा आफि धर्मि बने खोज्लार ताहान ज हो, तर परमेस्वरइ ताहान्को हिर्दय जान्ताइ, क्यारेकनिसिन मानिसको नजरमा ज्या चिज बड्को मान्हेताइ, ओस्नो चिजके परमेस्वरइ घिडा गर्ताइ।
16“मोसाको धर्म नियम र अगमबक्ताहान्को बचन बप्तिस्मा देलाहार युहन्नाको बेरा सम्म प्रचार होखिक्। ओइबेराभि परमेस्वरको राज्येको नाम्रो खबरको प्रचार होख्तिहि बाटि, सभइ जना ओइथि जबरजस्ति पिसे खोज्तिहि बाटाइ।#मति ११:१२-१३ 17स्वर्ग र धर्ति भुलाइकनि जाए सक्ताइ तर परमेस्वरको धर्म नियमको एउटा पनि अछेर मेट्टे नासक्ताइ।#मति ५:१८
18“जुन मानिसइ आफ्ने दुल्हिके छाडिकनि आर्के बेटिसिन बिहा गर्ताइ, ओइ बेभिचार गर्ताइ। अनि दुलाहाइ छाड्लो बेटिसिन बिहा गर्लार मानिसइ पनि बेभिचार गर्ताइ।”#मति ५:३२; १ कोरिन्थि ७:१०-११
धनि मानिस र लाजरस
19येसुइ फेरि कहिक्, “एउटा धनि मानिस रहिक्। ओइ महङ-महङ लुगा लगातरहिक्। मिठो मिठो खइलाहार चिज खइतरहिक् मोज मज्जामा बिस्तरहिक्। 20ओख्रो दइलमा मानिसहान्इ लाजरस नाउँ होख्लो एउटा गरिब र जिउभरि घाउए घाउ होख्लो मानिसके धरिदेतरहाइ। 21ओइ धनि मानिसको टेबुलभि खस्लो भातको सिता खाए खोज्तरहिक्। र कुकुरहान्इ पनि आइकनि ओख्रो घाउहान चाटि देतरहिक्। 22एक दिन गरिब लाजरस मरिक्, र स्वर्गदुतहान्इ ओख्राइ लेगिकनि अबराहामको छेउमा धरिदिहिक। र धनि मानिस पनि मरिक्, गड्काइ देहाइ। 23नरकमा बेस्के दुख भोगे पर्ते, ओइ उप्रो चाहाते दुस्सि अबराहाम र ओख्रो छेउमा लाजरसके देखिक्। 24ओइ चिच्याइतिहि कहिक्, ‘हे बुबा अबराहाम, मराइ दया गरिकनि लाजरसके पठाइदे, ओइ अङ्ङुरिको टुप्पा पानिमा बुडाइकनि मोरो जिभिमा सितर पारिदेबि, क्यारेकनिसिन मइ आगिमा दुख पाइधार्लाटिन।’ 25तर अबराहामइ कहिक्, ‘छउना, सम्झइ त, तइ आफ्नो जिबनमा सुखे सुख पाएर, तर लाजरसइ दुखे दुख पाइक। आब इ सुखमा बाटि, र तइ चाहि दुखमा बाटेर। 26इ कते पनि इथिभि तोरोठुँ पार जाए नासकुस र उथिभि इते वार आए नासकुस कहिकनि हाम्रो र ताहान्को माझमा बड्को खल्टा बाटि।’ 27तब धनि मानिसइ कहिक्, ‘बुबा, उसिगर्ते मइ बिन्ति गर्तिन, तइ लाजरसके मोरो बुबाको घरमा पठाइदे, 28क्यारेकनिसिन मोरो पाच भाइहान बाटाइ। ओइ उनहान्के सम्झाइ देबि, नत्र उनहान पनि इ दुखे दुख होख्लो ठउँरिमा पर्बाइ।’ 29तर अबराहामइ कहिक्, ‘तोरो भइयारहान्सिन मोसा र अगमबक्ताहान्को धर्मसास्त्र बाटि। उनहान्इ पढे र सुने सक्तात्।’ 30धनि मानिसइ जबाफ दिहिक्, ‘नाहो, बुबा अबराहाम, तर मर्लोभि कुन्हुँ उनहान्ठुँ गेनिसिन उनहान्इ आफ्नो पाप मानिकनि परमेस्वरपट्टि फर्कलारहाइ।’ 31तर अबराहामइ कहिक्, ‘मोसा र अगमबक्ताहान्को बोलि उनहान्इ नासुन्तात्कनि, मर्लोभि कुन्हुँ जिउते होख्नि पनि उनहान्इ बिस्वास नागर्तात्।’”
Επιλέχθηκαν προς το παρόν:
लुका 16: BOTE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2024 (Active), Mother Tongue Translators Society and Wycliffe Bible Translators, Inc. All rights reserved.