Marc 8
8
Jesus ulisila elisili tosini jina tsibatu
(Matt 15.32-39)
1Mua temu jinovioga yinombu yisusu yineni yimagukama. Jesus anolaba yiri bagaa na biguji amanengila badukitsi na amabatsingula rie: 2Nyilabi batu bebaba yingeba mu mbari baka bilumbu birieru nami na bagaa na biguji. 3Pa nyubagabusila na nsala mangolu mobasuka mu nsila mu mbari bamosi bamarambuyila vala. 4Badukitsi bandi bamamuwivula rie: Turungula ubadilila biguji o kumu? 5Jesus amabawivula rie: Mapa kwe mavu nenu? Bamamugabusila rie: Yisambuali.
6Mbana amatsanisa yinombu. Amabonga yisambuali yieni yimapa na anogabusila Nsambi diboti amamabukula na amamavega badukitsi na jogu bamagabila yinombu. 7Bamadila mua nyama tsimamba wandi. 8Jogu botsu bamaji na bamagukuru mbana badukitsi bamabola yisambuali yiponsi tsibibuku abimasialulu; 9abamaji bamaba bebeli na tosini jina. Mbana Jesus amabaganina; 10jogu botsu na badukitsi bamanangama o bota na bamawenda o yiari yiDalmanoutha.
BaJuif abamaba baPharisie uwivula bewivuli yilimba
(Matt 16.1-4)
11BaJuif abamaba baPharisie bamawenda ombu Jesus na bamamutsundisa. Mumuweliga bamamuwivula yilimba ujaba yeri Nsambi aji nandi. 12Mbana Jesus amamuangisa muru na amavosa rie: Dibandu yi batu batemu ejiji bekwivuli yilimba? Nyidutsinguli rie: Batu bebaba bagolaba yilimba, via! 13Mbana amabaganina na amamuenangama o bota ugabuga o disimu dina.
Dufunusu dubaJuif abamaba baPharisie na duHerode
(Matt 16.5-12)
14Badukitsi bandi mbe bamalibana ubega biguji, diwendi rie: bamabega yika dipa dimosi buandi. 15Jesus amabalubusa rie: Duyadunsu mu diambu didufunusu dubaJuif abamaba baPharisie na duHerode. 16Badukitsi bamatsundanga joʼ beni na joʼ beni rie: Dibandu yi evosili nana? Mu mbari tugaa na mapa? 17Jesus amajaba adi bevosi kabogu amabawivula rie: Dibandu yi duitasili diambu dimapa? Dugaa na diela, dugegulu? Mirima mienu mimagalusu? 18Duna misu! Dugelabi? Duna matuji! Dugegulu? Dugerangimini 19ava nyimabukulila mapa maranu, tosini yiranu tsibabaala bamaji, mbeyianu? Dumabola ponsi kwe tsibibuku abimasialulu? Jogu bamamugabusila rie: Digumi na ponsi beji. 20Ava nyimabukulila yisambuali yimapa ulisila tosini jina tsibabaala dumabola ponsi kwe tsibibuku abimasialulu? Bamamugabusila rie: Yisambuali. 21Mbana Jesus amabawivula rie: Te na vana dusakagulu?
Jesus ubelusa ebelusi yidunga o Bethsaida
22Banotola o Bethsaida batu bamabega yidunga ombu Jesus na bamamuwivula umubemba. 23Amagaanga yidunga mu gogu na amamubega te no tsomu dimbu. Anomusinga mateji mu misu amamukubiga yinsi na makaka na amamuwivula rie: Guilabi yima? 24Amagengila novosa rie: Nyilabi batu nderi miri tumba nyilabi ulinga milingi. 25Jesus amamuemukubiga yinsi na makaka. Mbana yidunga amagengila tumuu! Amalaba biotsu na buranga. 26Mbana Jesus amamusindiga o ndagu andi na amamugandisa rie: Guyananga dimbu.
Pierre utubula etubuli yiri Jesus aji Christ
(Matt 16.13-20; Luc 9.18-21)
27Jesus amawenda na badukitsi bandi o dimbu diCesaree jiPhilippe. Ava bamabila mu nsila Jesus amabawivula rie: Yi batu bevosi mu diambu diami? 28Bamamugabusila rie: Bamosi bevosi yiri guji Elie na basusu bevosi yiri guji mubiyitsi. 29Amabawivula rie: Tumba jenu yi duitasi? Pierre amamugabusila rie: Guji Christ. 30Kabogu Jesus amabalubusa rie: Duyaditsingula batu.
Jesus ulonsa ebalonsi nana ofuila na nana orambuyila o dufu
(Matt 16.21-28; Luc 9.22-27)
31Mbana Jesus amabanda ulonsa badukitsi bandi rie: Muana Mutu olaba maguga maneni; bivunda na bavagulitsi bapagu na milonsi mimigaga bomubusa. Va julu vana oboku na orambuga o dufu mu yilumbu yimurieru.
32Asamabasueyila diambu. Kabogu Pierre amamubega o fundu na amamunyangila. 33Tumba Jesus amageluga na anogengila badukitsi amanyangila Pierre rie: Ndundi Satan! Matasa magu mavu mabatu tsiri maNsambi.
34Mbana Jesus anonengila yinombu na badukitsi bandi amabatsingula rie: Pa mutu erondi ulinga nami vengu obusa mandi motsu nonangula kurusu andi nonduka. 35Mu mbari oyirondi ukegobula otsiemuga tumba oyikevega mu diambu diami na diMusamu Uboti ogobulu. 36Ne pa mutu odila bulongu buotsu tumba otsiemuga vo ubungana, ubueji uka? Ugatsi! 37Vagaa yisalu ayiurungula ugabusa monyu. 38Pa mutu olaba yisonyi mu diambu diami na mu diambu dimalongi mami mu temu ejiji kabogu Muana Mutu wandi omulasa yisonyi ava oruyila ulasa bundumba buandi na buTaji na bubiansa.
Επιλέχθηκαν προς το παρόν:
Marc 8: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.