Marc 9
9
1Jesus amamuebatsingula rie: Dingensa nyidutsinguli rie: Bamosi abavu vava bagolefu te na mangolu ma Durumu duNsambi molabana.
Dunyuru duJesus duikaluyi
(Matt 17.1-13; Luc 9.27-36)
2Tsona mosi jinosuka Jesus amanengila Pierre na Jacques na Jean; jogu botsu bamawenda va mosi o julu mukongu. Ava bamamugengilila jaʼ uotsu amakaluga, 3nesi biduaru biandi bimakaluga munongu uvedama na uvema agu mutu agorungula uvemisa. 4Mbana badukitsi beni barieru bamalaba Elie na Moise umoga bemoyi na Jesus. 5Pierre amavosa na Jesus rie: Mulonsi, diboti yiri tubianu vava. Turungianu mirorombi mirieru, umosi aguagu na umosi aguMoise na ususu aguEli.
6Diwendi rie: asamajaba adi evosi mu mbari jogu botsu bamaregama na goma. 7Dimungi dimalabana na dimabagumba; diufi dimagulunu rie: Agugu la Muana ami udurondu, mugululuanu!
8Vana vana badukitsi banogengila yiari na yiari basamamuelaba batu basusu; yika Jesus amasiala nogu.
9Ava bamasunduyila mukongu Jesus amabagandisa rie: Duyatsingula mutu adi dumalaba te na vana Muana Mutu orambuyila odufu.
10Bamadisinga tumba bamawivusana rie: Durambugu o dufu la yi?
11Mbana badukitsi bamamuwivula rie: Dibandu yi milonsi mimigaga belonsi yiri Elie oreyila uruga?
12Amabagabusila rie: Dingensa Eli oreyila uruga ukunsa mambu motsu. Dibandu yi bimasonunu yiri Muana Mutu olaba maguga na olensu? 13Nyidutsinguli yiri Elie amaruga kala na bamamulensa nana bamarondila, kabogu Bisonu bimadugusu.
Jesus ubelusa ebelusi muana udibaala aguvu na yinyunyi yibi
(Matt 17.14-21; Luc 9.37-43a)
14Ava bamagabuyila bamarasuna badukitsi bamosi na yinombu yineni. Milonsi mimigaga bamatsundanga nogu. 15Batu banolabilila Jesus bamasutu mbana bamawenda mambangu uyemubumba. 16Jesus amawivula badukitsi bandi rie: Dibandu yi duitsundili nogu?
17Mutu mosi amamuwaka rie: Mulonsi, laba nsibega muana ami. Aka na yinyunyi yibi ayimurombisi bubaba. 18Diweru adi yinyunyi yibi yimugaangi yimubuayi va tsi; muana epalisi mafuitsa na evayi diweriti na jaʼ uotsu akayimbanga. Nsiwivula badukitsi bagu umupalisila yinyunyi tumba bagaarungula. 19Jesus amawaka rie: Ka muna paga ji! Duna mirima migala. Nyisakatsinga nenu? Nyurungula uwarila kulini tsienu? Bega muana. 20Bamamubega ombu gandi. Yiotsu ayi yinyunyi yibi yilabili Jesus yimagaanga muana, muana amaberuga na amayenabungalananga; mafuitsa mamapala o munu andi. 21Jesus amawivula taji andi rie: Temu yi amabandila ubela nana? Taji amagabusila rie: Ubongila va bungebi buandi. 22Temu tsipuela yinyunyi yieni yimubuayi o muji nesi o mamba, yirondi umuboka. Pa gurungula, tulasi yingeba, tuwamusi!
23Jesus amamugabusila rie: Guivosi rie: Pa gurungula! Motsu morungulu ombu jandi ona yitu.
24Vana vana taji muana amagamuga rie: Nyina yitu! Kwamusiati mu mbari yitu yiami yivu yigeyi!
25Jesus anolaba batu uruga beruyi mambangu amanyangila yinyunyi yibi noyiruma rie: Ndeʼ yinyunyi yibubaba na madiba pala, guyamuemukotila.
26Na mugamu uneni yinyunyi yibi yimagaanga muana nomututusa na mangolu maneni mbana yimapala. La dibandu bamavosila rie: Amatabuga. 27Tumba Jesus amamugaanga mu gogu na amamusimbula mbana muana amatsana.
28Ava Jesus amakotila o ndagu, badukitsi bandi bamamubega o fundu umuwivula rie: Dibandu yi tugaarungulila upalisa yinyunyi yibi yieni?
29Jesus amabawaka rie: Munongu eni uipalusu yika na dusambu.
Jesus ubuesa uvosa diambu didufu na durambugu duandi
(Matt 17.22-23; Luc 9.43b-45)
30Bamagusuga vana na bamavioga o Galilee. Jesus asamaronda yiri bojaba agu avu 31mu mbari amaronda ulonsa yika badukitsi bandi. Amabalonsa rie: Muana Mutu olasu maguga na batu; bomuboka tumba mu yilumbu ayimurieru orambuga o dufu. 32Badukitsi basamamugulu tumba bamalaba goma umuwivula bivu.
Anyi avu muneni?
(Matt 18.1-5; Luc 9.46-48)
33Bamatola o Capernaum. Ava bamatolila o ndagu Jesus amawivula badukitsi bandi rie: Dibandu yi dutsitsundilanga mu nsila? 34Tumba basamawagula mu mbari ava bamabila mu nsila bamagalana buneni. 35Jesus anotsana amanengila digumi na babeji na amavosa rie: Pa mutu erondi uba muneni akesunsa na abi musalitsi botsu. 36Mbana amabonga muana ugeyi na amamureliga va gari ogu. Anomukobiga gogu amavosa rie: 37Uotsu edili muana nana gugu ugeyi mu diina diami endili wandi na uotsu endili, edili jandi omansidiga.
Agugaa na kueru netu aji mutu etu
(Luc 9.49-50)
38Jean amavosa na Jesus rie: Mulonsi, jetu tutsilaba mutu aguipalisi binyunyi bibi na mangolu madiina diagu; tutsimugandisa mu mbari agaa netu. 39Jesus amamugabusila rie: Duyamuemugandisa mu mbari mutu agorungula uvaga bimaga mu diina diami nomueposila mambu mabi. 40Jandi ogaa na kueru netu aji mutu etu. 41Na uotsu oduvega yilasi yimamba mu mbari duji baana baChrist, nyidutsinguli rie: Ngensa osaku yisaku yiandi.
Masumu na mbangulu
(Matt 18.6-9; Luc 17.1-2)
42Meʼrianua: Pa mutu otsimbusu muana umosi va gari baana bebaba yiri otsiemusa yitu, diviolila ubueji yiri bomutunga dimanyi dineni va kingu nomubuaga o mubu. 43Pa dikaka diagu digutsimbusu; ditabuli, tsiri diambu diviolila uvura ukota o julu na dikaka dimosi buandi tumba divu diambu ukota o bulungi bumuji ne pa guna makaka motsu mabeji. [ 44Aguna bayinyi bagefu na muji ugetsimi.] 45Pa dikulu diagu digutsimbusu ditabuli, tsiri diambu diviolila uvura ukota o julu yitsondu tumba divu diambu ukota o bulungi bumuji ne pa guna makulu motsu mabeji. [ 46Aguna bayinyi bagefu na muji ugetsimi.] 47Pa disu diagu digutsimbusu didonduli, tsiri diambu diviolila uvura ukota o tsi Durumu duNsambi na yitosu tumba divu diambu ukota o bulungi bumuji ne pa guna misu motsu mabeji. 48Aguna bayinyi bagefu na muji ugetsimi. 49Nana mutu ekukili musayi munongu mosi mutu okuku muji.
50Musayi la yima yiboti tumba pa musayi umasambuga, yima yi umuegabusulu dueyi? Banu nderi musayi, tsananu na duvotsu jenu beni na jenu beni.
Επιλέχθηκαν προς το παρόν:
Marc 9: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.