Marc 7
7
Malongi mabivunda
(Matt 15.1-9)
1BaJuif abamaba baPharisie na milonsi mimigaga abamarugasana o Jerusalem bamawenda umoga na Jesus. 2Bamalaba badukitsi bandi uji beji na makaka mamuinsi, diwendi rie: basamagolila mamba nana divu diwelimina na mugaga ubaPharisie.
3BaPharisie na baJuif basusu bamadedila malongi mabivunda, diwendi rie: basamajanganga te na bamagolila mamba. 4Nesi biotsu abi bamabeyilanga o dikasa bamalesusanga wandi. Bamaba na migaga misusu amimaruyila ombu bivunda biogu nana divu diwelimina ususa bakopa nesi matsuva nesi bisanga bikunga nesi matangi wandi.
5BaPharisie na milonsi mimigaga bamamuwivula rie: Mu mbari yi badukitsi bagu bagekelisi migaga mibivunda tumba beji na makaka mamuinsi? 6Jesus amabawaka rie: Ka muna diela di dimaba na Esaie ava amabiyila diambu dienu! Baboti bamiunu, nana amavosila rie:
Nsambi amavosa rie:
Batu bebaba bekitsi yika na miunu,
tumba mirima miogu mivu vala nami.
7Yika kulini bekitsili
mu mbari bekelisi migaga miogu nderi mivu miNsambi!
8Jesus amabuesa rie: Jenu duilensi diruma diNsambi na duidedili malongi mabatu.
9Jesus amabuesa disusu rie: Yifu yienu yivu ulensa maruma maNsambi nokelisa amenu. 10Moise amavosa rie: Yitsa taji agu na nguji. Va julu vana amavosa rie: Jandi oguvosila taji andi na nguji mabi aboku. 11Tumba ombu genu duisingi yiri mutu ovosa rie: Abi mbe nyivega tata na mama, nyimabavagula ombu Corban (divindugulu rie: pagu ombu Nsambi). 12Kabogu mutu eni agomyewamusa taji na nguji. 13Mu dionyi duilensi Mbembu Nsambi na duisakiyi malongi menu; duivayingi mambu mapuela mamunongu egugu.
Mambu amebivisi mutu
(Matt 15.10-20)
14Jesus amamuenengila batu na amabatsingula rie: Guluanu na jabanu adidi rie: 15Vagaa yima ne yimosi ayiukota o munu mutu ayiurungula umubivisa; tumba amemupalili amana memubivisi. [ 16Jenu adugaa madiba guluanu!]
17Ava Jesus amaganina yinombu amakota o ndagu na badukitsi bandi bamamuwivula divindugulu dinongu eni. 18Amabawaka rie: Kabogu jenu wenu dugaa na diela! Dugegulu! Vagaa yima ne yimosi ayikoti o munu mutu ayiurungula umubivisa! 19Diwendi rie: yigekoti o murima andi tumba yikoti o moji, mbana yinyaku. (Na mambu memama amalonsa yiri biguji biotsu bivu biwelimina uligu.) 20Amamuevosa rie: Amepali o munu mutu amana memubivisi. 21Mu mbari motsu mebandi o murima mutu ne matasa mabi ne bumbembu ne bupumbi ne bukongu ne udaga 22ne dunyungi na bukanyi na ndunsulu ne dilensa ne ngusu ne matamba ne dunangu ne buduka; 23motsu mana mepalili o murima mutu na memubivisi.
Yitu yimugetu
(Matt 15.21-28)
24Jesus amagusuga vana na amawenda o yiari yiTyr. Anokota o ndagu mbe aronda yiri mutu ayadijaba tumba dimajabunu. 25Vana vana mugetu agumaba na muana umugetu agumaba na yinyunyi yibi amaruga nokutama va gusu Jesus mu mbari amalegulu diduma diandi. 26Mugetu amaba muenyi agumaburu o Phenicie o bulongu buSyrie. Amalenda Jesus rie: Muana ami umugetu ana yinyunyi yibi, kokolu yipalisi! 27Jesus amamuwagula rie: Dundati, baana balegukuru; digaa diwelimina ubonga biguji bibaana nobibuayila bamondi. 28Mugetu eni amamugabusila rie: Adi guivosi divu dingensa tumba bamondi bageji bikukuku abilagumuyi ava baana belili? 29Mbana Jesus amamugabusila rie: Wenda! Mu diambu dikabusulu eni yinyunyi yibi yimapala. Muana agu aka polu. 30Kabogu anogabuga o ndagu andi amarasuna muana asilama va tangi, ngensa yinyunyi yibi yimapala.
Jesus ubelusa ebelusi dibaba
31Jesus amagusuga o Tyr na amawenda o Sidon mbana amagabuga o yiari yiyiliba yiGalilee te na amavioga o yiari yiDigumi Dimisiengi. 32Bamamubeyila dibaba na bamamuwivula umusakiga miogu. 33Jesus amamukakasana mua vala na batu. Amamusoma milembu mu matuji; amafuta mateji na amabemba dulimi dudibaala. 34Mbana Jesus amabuaga misu o julu; amatsukama na amavosa na dibaba rie: Effata, diwendi rie: panduga.
35Vana vana matuji mandi mamapanduga na dulimi duandi dumanyanguga; amavosa na buranga. 36Jesus amabagandisa yiri bayadinyavisa; diuleba amabagandisa bamadijabisa ombu botsu. 37Botsu bamakambulu puela na bamavosa rie: Jandi evayi motsu mawelimina; egulusu ne madiba novosisa mababa.
Επιλέχθηκαν προς το παρόν:
Marc 7: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.