Marc 6
6
Bisi Nazareth ubusa bebusi Jesus
(Matt 13.53-58; Luc 4.16-30)
1Jesus amagusuga vana na amagabuga o yiari ayi amabanguyila; badukitsi bandi bamawenda nandi. 2Yilumbu yitsona amalonsa o Ndagu Yibenguna. Batu bapuela bamaba guna. Banomugulu bamakambulu na bamawivula rie: Diela yi divu nandi? Tsie evayili bimaga biebibi? 3Jandi tsia muvalitsi, muana uMarie, muana nguji Jacques na Joses na Jude na Simon? Bibusi biandi bigaa netu vava? Kabogu bamamulensa. 4Jesus amabawaka rie: Dingensa mubiyitsi eyitsu o biari biotsu bisusu, yika o yiari yiandi nombu biburu biandi elensu.
5Kabogu asamarungula uvaga bimaga vana, ne nana amabelusa bibedu bimosi abi amasakiga miogu. 6Amakambulu mu mbari basamamuvayila yitu.
Jesus usindiga esindiyi digumi na badukitsi babeji uyenalonsanga
(Matt 10.5-15; Luc 9.1-6)
Mbana Jesus amawenda o mimbu amamaba yiari na yiari uyelonsa batu. 7Amanengila digumi na babeji na amabagabila mangolu upalisa binyunyi bibi mbana bamayenalinganga babeʼ babeji. 8Amabatsingula rie: Ava duilingili, beganu yika duvengu, duyabega nesi biguji nesi komi nesi mbongu. 9Duaranu bapondu na duyamuebega bikutu bibeʼ bibeji. 10Mbana amabatsingula rie: Mu mandagu ama dukota, tsananu muna na amuna durambiyila wandi. 11Pa batu bagedudili, gusuganu mu musiengi eni na bagandilianu rie: Tugomueruga gimu: dionyi diubalubusa. 12Kabogu bamayenawendanga na bamalonsanga yiri batu bakaluli diela. 13Bamapalisa binyunyi bibi bipuela, bamasinga bidedu bipuela matsi na bamababelusa.
Dufu duJean Baptiste
(Matt 14.1-12; Luc 9.7-9)
14Kaga Herode amagulu motsu mu mbari diduma diJesus dimanyavanga. Bamosi bamavosa rie: Kabogu Jean Baptiste amarambuga o dufu, la dibandu mangolu mavu nandi. 15Basusu bamawaka rie: Aguna Elie. Na basusu bamavosa rie: Aguna mubiyitsi nana babiyitsi abamarela.
16Tumba Herode anodigulu amavosa rie: Aguna Jean Baptiste! Nyimamutabusa muru, kabogu amarambuga! 17Diwendi rie: Jaʼ beni Herode amalegaanga Jean mbana amamukotisa o tsugu. Amadivaga mu diambu diHerodiade jimugatsi Philippe aji muana taji andi. Amamubonga mujeba 18kabogu Jean amamusiemba rie: Muana taji agu aki monyu kabogu gugaa na musuga ubonga mugatsi andi. 19Herodiade amanyoyila Jean na amaronda umubokisa tumba asamarungula mu diambu diHerode. 20Herode amadumanga Jean agumaba mutu usungama na uwelimina na amamukelisanga na buranga. Diuleba amaregamanga amagulungu malongi mandi.
21Yilumbu ayi Herode amanengila barumitsi na bivunda bibagora na baneni baGalilee uyeji feta jiduburu duandi, Herodiade amadugusu kaka andi. 22Muana uHerodiade amayina na dionyi dimalasa ubueji ombu Herode nombu bambatsi bandi. Kaga amavosa na numba eni rie: Kwivuli ayi guirondi na nyuguvega yionyi.
23Amadiwarisa na pesi rie: Ayi gukwivula nyuguvega yionyi ne yiasi yibufumu buami.
24Anopala amawivula nguji andi rie: Yi nyuvonda? Na nguji amamugabusila rie: Muru Jean Baptiste.
25Vana vana jandi amagabuga ombu kaga na amamutsingula rie: Peyi muru Jean Baptiste mu yipela.
26Adina dimatsirisa murima kaga tumba asamarungula umuebusa mu diambu dipesi aji amamulevila va gusu batu. 27Kabogu amasindiga gora uyetabula Jean muru. Gora anotabula Jean muru 28amagubega mu yipela. Amavega muru ombu numba na numba amavega uonyi ombu nguji andi. 29Badukitsi baJean banogulu mfuanga bamawenda uyebonga mfumbi na bamajitsiga.
Jesus ulisila elisili tosini yiranu tsibabaala
(Matt 14.13-21; Luc 9.10-17; Jean 6.1-14)
30Bilumbi bamagabuga ombu Jesus na bamamutsingula motsu ama bamavaga na ama bamalonsa. 31Batu bapuela bamaruganga ombu gogu te na basamamuedila ne diweru uji. Kabogu Jesus amavosa nogu rie: Tʼwendianu o kumu uleyevuma.
32Kabogu bamanangama o bota uwenda o mbura eni. 33Batu bapuela abamabalaba diwendulu bamarambuyila o misiengi miogu na bamawenda mambangu; bamareyila Jesus na badukitsi bandi.
34Jesus anosunduga mu bota amarasuna yinombu yineni. Amagaangu na yingeba mu mbari amabalaba nderi bindombu abigaa na mubungulitsi. Kabogu amabanda ubalonsa mambu mapuela. 35Ava tsisiga badukitsi bamavosa nandi rie: Wisi umawenda na tuji vala. 36Baganini, bayenawenda o masaku no mimbu amavu bebeli uyesumba biguji.
37Jesus amabagabusila rie: Jenu beni dukabavega biguji. Tumba bamamuwivula rie: Guirondi yiri tunyambasana kama beji tsimbongu tsilora tsivema ubalisila?
38Kabogu amabawivula rie: Mapa kwe mavu nenu? Yelabanu.
Banotsuna na buranga bamamugabusila rie: Mapa maranu na nyama tsimamba beji.
39Mbana Jesus amatsingula badukitsi rie: Batsanisianu, maguki maguki mu tsi. 40Kabogu bamabatsanisa, masusu kama kama na mamosi magumara-maranu. 41Mbana Jesus amabonga mapa meni maranu na nyama tsimamba beji na anonangula misu o julu amagabusila Nsambi diboti. Mbana amabukula mapa na amabavega yiri badukitsi bomagabila yinombu. Mbana amagaba nyama tsimamba beji wandi ombu botsu. 42Botsu bamaji na bamagukuru. 43Bamabola bibuku bimapa na banyama; biotsu abimasialulu bimaba biwelimina ubasa digumi na ponsi beji. 44Bamaba tosini yiranu tsibabaala abamaji.
Jesus ulinga elingi va julu mamba
(Matt 14.22-23; Jean 6.15-21)
45Banomana uji Jesus amasindiga badukitsi bandi unangama o bota urela o disimu dimosi o yiari yiBethsaida mbana amaganina batu. 46Anobaganina amamata o julu mukongu uyesambila. 47Pisama jinosunda bota jimaba o gari yiliba na Jesus aki va disimu. 48Amalaba yiri belabi uvura mu diambu dipunga kabogu ava mavuvungi Jesus amalinga va julu mamba, mbe aronda ubavioga. 49Banomulaba evioyi va julu mamba bamagamuga rie: Lanu ditengu! 50Goma jimabagaanga. Vana vana Jesus amavosa nogu rie: Warisanu mirima! Agu menua! Duyalaba goma!
51Mbana amanangama o bota nogu na punga jimavola. Badukitsi bamasutu na goma; bamakambulu puela. 52Diwendi rie: diambu diyimaga yimapa disamababemba mirima, dujabu duogu dumaba dugeyi.
Jesus ubelusa ebelusi bibedu biGenesareth
(Matt 14.34-36)
53Banosabuga yiliba bamawenda o bulongu buGenesareth na bamayetunga bota. 54Yiotsu ayi Jesus esunduyili batu bamamujaba. 55Kabogu bamarugasana biari biotsu na bamamubeyilanga bibedu. 56Mu mbura tsiotsu atsi Jesus amatolanga, nesi o mimbu nesi o mavula nesi o masaku bamabeganga bibedu yiri borungula ubemba difubu diyiduaru yiandi. Botsu abamadibemba bamabeluga.
Επιλέχθηκαν προς το παρόν:
Marc 6: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.