Marc 5
5
Jesus amapalisa yinyunyi yibi ombu dibaala
(Matt 8.28-34; Luc 8.26-39)
1Kabogu bamasabuga yiliba yiGalilee o yiari yibisi Gerasenie. 2Yika Jesus esunduyi mu bota dibaala omapalila o mambina amaruga ombu gandi. 3Jandi amaba na yinyunyi yibi na amatsananga o mambina. Asamagarungu utungu nesi na bapanga. 4Temu tsipuela bamamutunga na bapanga tumba amabatabulanga nopansanga bivangu; mutu asamaba na mangolu umuviolila. 5Nyangu na mukolu amalinganga o mambina nesi o mikongu; amayenagamuganga na amakenemisanga na mamanyi.
6Anolabilila Jesus amawenda mbangu uyegudama va gusu andi. 7Amagamuga rie: Jesus Muana Nsambi aguvu uneni, diambu yi divu va gari jetu nagu? Kokolu tsiagu guyatulasa maguga!
8(Amavosa nana mu mbari Jesus amaruma yinyupyi yibi upala.) 9Mbana Jesus amamuwivula rie: Diina diagu yi?
Jandi amawagula rie: Diina diami divu Dibuli, tuji bapuela!
10Jandi amalenda Jesus na yindandi rie: Kokolu, guyasindiga binyunyi biami o yairi yisusu.
11Vamaba mugamba uneni ubangulu abamalinganga va mukongu eni. 12Binyunyi bibi bimavosa na Jesus rie: Tusingisi utsana ombu bangulu.
13Jesus amabasingisa dionyi. Binyunyi bibi bimapalila dibaala na bimakota ombu bangulu. Vana vana bangulu botsu, diwendi rie: bebeli na tosini beji, bamavindama mukongu na botsu bamafu mu yiliba.
14Bakelisi babangulu bamarina na bamanyavisa musamu o misiengi nesi o masaku. Batu bamawenda uyelaba nana dimabila. 15Banotola ombu Jesus bamalaba dibaala adimapalusu binyunyi bibi, diwendi rie: Dibuli. Amaba atsana, amaduara na amaba asigama. Bamagaangu na goma. 16Abamadilaba bamatsingula basusu adimalabana ombu dibaala adimaba na binyunyi bibi nombu bangulu. 17Kabogu bamawivula Jesus ugusuga o yiari yiogu.
18Ava Jesus amanangimina o bota jandi omaleba na binyunyi bibi amamutsingula rie: Nyirondi uwenda nagu. 19Jesus asamagaru tumba amamutsingula rie: Gabuga o ndagu agu nombu batu bagu nobatsingula motsu ama Fumu amaguvayila na nana amagulasila yingeba. 20Ava dibaala dieni amayenagabuyilanga amabanganga na bitsiku o yiari yiDigumi Dimisiengi; botsu abamamugulungu bamakambulu.
Muana mugetu uJairus na mugetu agumabemba yiduaru yiJesus
(Matt 9.18-26; Luc 8.40-56)
21Jesus amagabuga o disimu dina diyiliba. Avana amarasuna bapuela bemuvivi. 22Va gari ogu vamaba dibaala diina diandi Jairus, omaba yivunda yiNdagu Yibenguna. Anolaba Jesus amagudama va gusu andi 23na amamulenda na yindandi rie: Muana ami umugetu ugeyi yika ufu efu. Kokolu yimusakayila miogu yiri oba na polu.
24Yika besoyimi batu bapuela bamamuduka te na bamamubandasana.
25Va gari ogu vamaba mugetu agumaba na muvuva umalungu yigumi na bilima bibeji. 26Jandi amanyambasana mbongu tsiandi ufuta banganga tumba asamalaba yilimba. 27Amagulu nana bevosili Jesus, kabogu amamuduka na amavioga o nsima andi va gari yinombu uyebemba yiduaru yiandi. 28Amatasa rie: Pa nyubemba ne biduaru biandi nyubeluga. 29Vana vana muvuva umakamuga na amagulu dunyuru yika sui. 30Vana temu eni Jesus amagulu yiri mangolu mamapala kabogu amageluga nowivula rie: Anyi amabemba biduaru biami? 31Badukitsi bandi bamamuwagula rie: Bapuela bapuela begubandisini ne nana guiwivuli, anyi amambemba?
32Tumba Jesus amagengila yiari na yiari ujaba agumamubemba.
33Mugetu anojaba adimamuvagulu amakueka noregama; amagudama va gusu andi na amatubula motsu. 34Jesus amamutsingula rie: Muana ami, yitu yiagu yimagubelusa. Wenda na buranga, gumabeluga.
35Yiotsu ayi Jesus evosi nana bilumbi bimaruga o ndagu Jairus na bamamutsingula rie: Muana agu amafu. Dibandu yi guimuetsoyisila Mulonsi?
36Tumba Jesus asamadikipa na amavosa nandi rie: Sunsa murima! Payili yitu!
37Jesus asamasingisa basusu uwenda nandi yika Pierre na Jacques na muana nguji andi Jean. 38Banotola o ndagu Jairus, Jesus amarasuna puela batu ulila belili na ugamuga begamuyi. 39Amakota nobawivula rie: Mu mbari yi duivayili nduku? Dibandu yi duilili? Muana asafu tumba amalengula mua yilu.
40Anolaba yiri bemupeji amapalisa botsu basusu na amakotisa yika taji na nguji muana na jogu abamaruga nandi. 41Jesus amagaanga gogu muana na amavosa nandi rie: Talitha koum, divindugulu rie: Menu nyirumi rie: Muana umugetu ugeyi, relama!
42Vana vana muana umugetu amarambuga na amatsana. (Jandi amaba na digumi na bilima bibeji.) Banodilaba, botsu bamakambulu puela. 43Jesus amabalubusa rie: Duyaditsingula mutu! Mbana amabuesa rie: Muveyianu biguji.
Επιλέχθηκαν προς το παρόν:
Marc 5: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.