Marc 4
4
Nongu jimukukitsi
(Matt 13.1-9; Luc 8.4-8)
1Jesus amamuebanda ulonsa va disimu diyiliba yiGalilee. Batu bapuela bamagukama vana kabogu amanangama o bota na amatsana. Yinombu yiotsu yimasiala va disimu. 2Jandi amababuayila banongu bapuela ubalonsa. Amavosa rie: 3Guluanu! Mukukitsi amawenda ukuka tsangu tsiandi. 4Ava amakukilanga tsangu tsimosi tsimabonduga va nsila. Batsoli bamayetsidoda. 5Tsimosi tsimabonduga va yilala yimamanyi, tsimasundila ubenda. 6Tumba nyangu jinobala tsimanyensa na tsimagumuga mu mbari ngansi mbe tsisakafuna. 7Tsimosi tsimabonduga va gari ngansi tsimatsiendi: ngansi tsieni tsimabenda na tsimatutsa bivaru la dibandu bisamamuebura. 8Tsimosi tsimabonduga va butamba buboti: tsimabendisa bivaru bipuela abimabura milunda: bimosi magumarie-marieru, bisusu magumasia-masiamunu na bisusu kama kama. 9Mbana Jesus amavosa rie: Jenu adugaa madiba guluanu!
Dibandu dibanongu baJesus
(Matt 13.10-17; Luc 8.9-10)
10Jesus yika utsana etsani na batu bamosi abamagulu banongu, bamagabuga va mosi na digumi na babeji yiri obavindiyila banongu. 11Amabagabusila rie: Ombu genu dumatsingulu diambu adisakajabunu diDurumu duNsambi tumba ombu jogu abasakakota mu muyitsa egugu motsu mevosulu na banongu. 12Diwendi rie:
Begengila yika ugengila tumba bagelabi,
begulu yika ugulu tumba bagetsiyisi,
mbe bobatsiyisa mbe bokalula diela
na Nsambi mbe obatanda masumu mogu.
Divindugulu dinongu jimukukitsi
(Matt 13.18-23; Luc 8.11-15)
13Amamuebawivula rie: Jenu dugejabi divindugulu dinongu ejiji? Kabogu tsie dujabila divindugulu dibanongu basusu? 14Mukukitsi la jandi oyisamuni Mambu maNsambi. 15Bamosi bavu nana atsimabonduga va nsila; belegulu Mambu maNsambi mbana Satan ebagungisi yiri amamalonsu motsiemuga. 16Basusu bavu nana tsangu atsimabonduga va yilala yimamanyi; ava begululu malongi belemadila na nsangu. 17Tumba mbe masakakota viri kabogu bededi. Diwendi rie: ava belabili maguga vo dikuana mu diambu dimalongi besundili udeda. 18Basusu bavu nana atsimabonduga va ngansi tsimatsiendi. Jogu begulu malongi 19tumba mitatu mitemu ejiji na durondu dumbongu na dunyungi bitutsi malongi na bagefuningi. 20Basusu bavu nana atsimabonduga va butamba buboti. Begulu malongi, bemadili na befuningi: bamosi magumarie-marieru, basusu magumasia-masiamunu na basusu kama kama.
Nongu jipaga
(Luc 8.16-18)
21Amamuebawivula rie: Batu bebangisi paga ujisuega o tsi ponsi vo o tsi tangi? Tsia uyivakiga va dingasa? 22Vagaa diambu adimasuegu adigojabunu na vagaa fundu ajigowansulu muansu. 23Jenu adugaa madiba guluanu!
24Jesus amabuesarie: Lubuganu! Migaga ami duitabulili basusu bunsonsi amina Nsambi odutabulila bunsonsi wandi; jandi agaa na yimbambila. 25Kabogu ona yima obuesu yisusu tumba ogaa na yima opatulu ne ayi etasi ayivu nandi.
Nongu jiputu
26Jesus amabuesa uvosa rie: Durumu duNsambi duvu nana rie: Mutu etsoki putu o nungi andi. 27Ewendi yilu, emoyi, nyangu jibali, wisi uitsimi na yiotsu yina bivaru bibendi. Mutu eni agejabi nana bibendili. 28Yika butamba buibendisi bivaru na buibiveyi mangolu ubura: tetega yirongula, mbana muiri, mbana bisuli. 29Ava putu tsimawelila mutu ebandi utsidokula mu mbari diweru diudokula dimatola.
Nongu jitsangu jimutarada
(Matt 13.31-32; Luc 13.18-19)
30Jesus amamuewivula rie: Na yi tubagusunu Durumu duNsambi? Nongu yi tubuaga ulasa nana dubila? 31Duibagunu na tsangu jimutarada ajivu jigeyi uviolila tsangu tsiotsu. 32Mutu ojikuka na jiubenda nonega uviolila bivaru biotsu na bitayi biuwala te na biveyi yivosi na batsoli borungula urunga muva muna.
33Jesus amabuayila batu banongu bamunongu na munongu ubalonsa malongi mandi; asamarangisa mambu uviolila diela diogu. 34Ava amabila va mosi na batu basusu amalonsanga yika na banongu tumba anokakana nogu amabavindiyila badukitsi bandi.
Jesus uvotsa evotsi mungudi
(Matt 8.23-27; Luc 8.22-25)
35Vana tsisiga eni Jesus amatsingula badukitsi bandi rie: Tʼwendianu o disimu dina. 36Banoganina batu bamanangama mu bota va mosi na Jesus. Vamaba bota tsisusu atsimafubana konga nogu. 37Mungudi uneni umagumba na mingiba mimabubasa bota. 38Jesus amaba yilu o matina mabota. Badukitsi bamamurambusa na bamagamuga rie: Fumu, rambuga yika ufu tukafuanu!
39Jesus anorambuga amaruma punga rie: Vola sui! Punga jimavola na duvotsu dumaba duneni. 40Mbana Jesus amabawivula rie: Dibandu yi duilabili goma? Dibandu yi dugaa na yitu? 41Bamagaangu na goma na bamawivusana rie: Munongu mutu yi avu? Nesi punga na mingiba bimudedili?
Επιλέχθηκαν προς το παρόν:
Marc 4: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.