Marc 3
3
Dibaala na gogu ugasa
(Matt 12.9-14; Luc 6.6-11)
1Jesus amamuekota o Ndagu Yibenguna. Amuna mumaba dibaala adimaba na gogu ugasa. 2Batu bamosi bamaromba diela ufuengilila Jesus. Kabogu bamamuketanga ulaba yeri obelusa mutu mu yilumbu yitsona. 3Jesus amavosa na dibaala adimaba na gogu ugasa rie: Relama, lerugati!
4Mbana Jesus amawivula rie: Diambu yi divu diwelimina mu migaga mietu? Uvaga maboti mu yilumbu yitsona vo uvaga mabi? Ugobula mutu vo umuboka?
Tumba bamavola sui. 5Jesus amabagengila yisuisu, diuleba murima andi umapinda amagaangu na yingeba mu diambu diugala umirima miogu. Amavosa na dibaala rie: Simbula gogu agu.
Amagusimbula; gogu andi umabeluga.
6BaJuif abamaba baPharisie bamapala o Ndagu Yibenguna na vana vana bamatunga fundu na bambatsi baHerode nana bobokila Jesus.
Yinombu uruga yiruyi ombu Jesus
7Jesus amagusuga nowenda o yiari yimubu na badukitsi bandi. Yinombu yimamuduka o Galilee no Judee 8no Jerusalem no Idumee no yiari yiJourdain no migula miTyre na Sidon. Batu bapuela bamaruga ombu Jesus mu mbari bamagulungu motsu ama amavaganga. 9Kabogu amavosa na badukitsi bandi rie: Tombilianu bota jigeyi yiri bagombandasana. 10Anobelusanga batu bapuela botsu abamaba na maali bamasindasana umubemba. 11Yiotsu ayi batu abamaba na binyunyi bibi bamamulabilanga bamagudama va gusu andi nogamuga rie: Ndeʼ la Muana Nsambi. 12Tumba amabagandisa rie: Duyanjabisa ombu batu.
Jesus usola esoli digumi na bilumbi bibeji
(Matt 10.1-4; Luc 6.12-16)
13Mbana Jesus amamata o julu mukongu; amanengila aba amaronda, bamamuduka. 14Va gari ogu amasola digumi na babeji aba amanengila bilumbi. Amabasola ulinganga nandi na amabasindiga ulonsanga. 15Amabavega mangolu upalisa binyunyi bibi. 16Miina madigumi na babeji aba amasola amama: Simon (Jesus amamuvega diina diPierre,) 17Jacques na Jean, baana baZebedee (Jesus amabavega diina diBoanerges, divindugulu rie: baana babukanyi;) 18na Andre na Philippe na Barthelemy na Matthieu na Thomas na Jacques muana Alphee; na Thaddee na Simon muisi Canaan 19na Judas Iscariote jandi omafunda Jesus.
Biburu biJesus
20Mbana Jesus amagabuga o ndagu. Batu bapuela bamagukama vana te na Jesus na badukitsi bandi basamamuedila diweru uji. 21Biburu biJesus banodigulu bamawenda uyemulanda mu mbari bamagulu yiri batu bevosi rie: Amalaguga.
Jesus uwagula ewaguli abemufuengilili
(Matt 12.22-32; Luc 11.14-23; 12.10)
22Milonsi mimigaga abamasunduyila o Jerusalem bamavosa rie: Jandi amafubana murima na Beelzebul, diwendi rie: Diabu!
Basusu bamasinga rie: Yivunda yibinyunyi bibi emuveyi mangolu upalisa binyunyi bieni.
23Kabogu Jesus amabanengila; amababuayila nongu nobawivula rie: Tsie Satan orungulila ukebinga? 24Dilongu diotsu adi batu betoyingi joʼ beni na joʼ beni digotsiemuga? 25Mukuta uotsu aguvu na burandu ugotsiemuga? 26Kabogu pa Satan eketoyisa na durumu duandi duvu na dupasu, dugotsiemuga?
27Mutu agorungula upatula dibaala adivu na mangolu biandi te na olemutunga mbana oyenakindanga biandi biotsu.
28Guluanu adi nyidutsinguli rie: Batu abevayi masumu maminongu na minongu botandu monyi, nesi abevosili Nsambi mambu makulini 29tumba abevosili Yinyunyi ayiruyili ombu Nsambi kulini bagotandu, via! 30Jesus amavosa nana mu mbari bamavosanga rie: Jandi amafubana murima na yinyunyi yibi.
Nguji na baana banguji baJesus
31Nguji na baana banguji baJesus bamaruga. Bamasikama va gusu kana na bamasindiga yilumbi uyenengila Jesus. 32Batu bapuela abamaba nandi vana bamamutsingula rie: Nguji na baana banguji bagu baji va gusu kana, begurombi.
33Jesus amabawivula rie: Anyi avu nguji ami na banyi bavu baana banguji bami?
34Mbana amabagengila yisuisu novosa rie: Ababa la nguji ami na baana banguji bami. 35Uotsu oyivayingi adi Nsambi erondi aji muana nguji ami vo nguji ami.
Επιλέχθηκαν προς το παρόν:
Marc 3: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.