Echos 5
5
O bilachipe kai cherde o Ananias ta e Safira
1A saia iek lleno kai ikhardola Ananias kai pe rromiaia, e Safiraia, bichinda iek umal. 2Gava lleno dia orba pe rromiaia ta lia peke nesave love ta ogola dia len kai e apostolura. 3O Pedro phenda leke:
Ananias, ¿soke muklan te gazdaril pe tute o llavolo ta te cherel tut te kojave e Santone Duoke ta achilan nesave lovenchar kai pochinde chuke pe umal kai bichindan? 4¿ni saia chiri e umal? ta sar tu bichindan la, ¿inai sea chire e love? ¿Soke cherdan gua? Ni kojadan e manusenge. Ka manglan te kojave si e Devle. 5Kana asunda gala alava, o Ananias mulo, ta sa e llene kai sea kote daraile but. 6Ondaka avile nesave llene terne, ulisarde leki esnaga ta inllarde le te prajon le. 7Nakhle kotar preko trin saiata ta dia andre e rromi katar o Ananias, a voi ni llanela so nakhlaia. 8O Pedro puchla la:
Phen mange, ¿bichinden e umal pe love kai phenden amenge? Voi phenda:
Ea, pe gola love.
9O Pedro phenda lake:
¿Soke tumen manglen te kojaven e Duo e Gazdako? Goleke, etalen aven gola kai llele te prajon che rrome, ta akana ka inllaren i tut. 10Ondaka isto kote e Safira muli kai e porrne e Pedroke. Kana die andre e llene terne, malade la muli, ta inllarde la te prajon la pasa lako rrom. 11Ta sa e llene katar e khanlliri, ta sa e llene kai llangle gala ezgode, daraile but.
E apostolura sastaren bute llenen
12Katar e apostolura cherdona but bare ezgode Devlikane maskar e llene, ta sa chidiniaona po udar kai ikhardol Salomon. 13A ni iek katar ogola llene ni tromala te llan lenchar, a e llene katar o foro volina len. 14Ta cherdile mai but e llene kai pachaie ando Gazda, murus ta i diskinie. 15Ta ikanena e nasualen po drom ta thovena len pe kervetura ta pe postelie, soke saia te nakhel kotar o Pedro, ta gola llene aduricharena te del samo leki senka pe varesavo nasualo. 16Ta katar e forura kai si pasa o Jerusalem avena but llene ta anena e nasualen ta e llenen kai saia ande lende duura bilache, ta saurre sastona.
Llan pala e apostolura te maren len
17Ondaka o mai baro popo ta e saduseura kai sea lea, pherdile murzania, 18ta phangle e apostolen ta thode len ande rubie e foroke. 19A iek suecho e Gazdako orachaia putarda e udara katar e rubie ta ikanda len ta phenda lenge: 20Llan, ta thoven tumen pe porrne ando cher e Devleko, ta phenen e foroke sa gaia orba nevi zivotoki.#Jn 11.25; 14.6; Ro 6.4. 21Kana asunde gala alava, thiarinako rano die ando cher e Devleko ta thodepe te sikaven.
Ondaka, o mai baro popo ta e llene kai sea lea ikharde sa e phuren katar o Israel pe lengi kris e mai bari, ta bichalde te anen katar e rubie e apostolen. 22A kana e boñikura llele kai e rubie ni malade len andre, ta irisaile te phenen so cherde 23ta phende:
E rubie sea phangle, ta e boñikura sea anglal ta arakhena e udara. A kana putardam, ni maladam nika andre. 24Kana asunde lengi orba, o gazda katar e boñikura kai arakhen o cher e Devleko ta e mai bare popura puchenape so ka avelpe gale ezgodaia. 25Ondaka avilo iek lleno, kai phenda lenge:
E llenen kai tumen thoden ande rubie, etalen ando cher e Devleko ta sikaven e foro.
26Ondaka o gazda katar e boñikura llelo pe boñikonenchar te phanden len pale, a ni ande len pe zor, soke darana katar o foro te na chalaven len e barrenchar. 27Kana avile inllarde len kai e mai bari kris, ta o mai baro popo phenda lenge: 28Amen phendam tumenge te na sikaven niso katar gua lleno kai ikhardol Jesus. ¿A so cherden tumen? Ande sa o Jerusalem dien orba katar o Jesus ta i thoven pe amende e dos katar o meripe gole manuseko.#Mt 27.25. 29O Pedro ta ogola apostolura phende lenge:
Amen morabi te kanda mai anglal e Devle neko e manusen. 30O Del amare puranengo cherda te ustel o Jesus katar o meripe, isto gole kai tumen umbladen ta mundarden po krusto. 31O Del cherda le te ustel, ta thoda le pe pi chachi, ta cherda le te avel o lleno kai sikavel o drom ta Braduimari e foroke katar o Israel ta te cherel e foro te irilpe kai o Del ta te prostil lengo bilachipe. 32Amen sama kote kana nakhle gala ezgode, ta i o Santo Duo kai o Del dia golen kai kanden le. 33Kana asunde gala orbe, jolaile but ta mangena te mundaren len. 34A maskar gola sudura saia iek fariseo kai ikhardola Gamaliel kai saia iek kovachi e zakonoko ta sa e llene e foroke dena le liubao. Gava lleno thodape pe porrne ta phenda te ikanen avri e apostolen cherricha vreme. 35Mapalal phenda ogole sudonenge:
Israelitura, arakhen tumen katar so ka cheren gale llenenchar. 36Den tumen golli kai cherel nesavo vreme palpale sikadilo o Teudas, ta phenela kai vou saia iek lleno glamno, ta preko star stotine llene llele pala le, ta gale llene mundarde le, ta e llene kai llana pala le rispisaile, ta llik kote reslo sa. 37Mapalal, ande llivesa kana llinena e llenen, sikadilo o Judas katar e Galilea, ta cherda te llan pala le nesave llene, ta i gole mundarde ta sa e llene kai llana pala le rispisaile. 38A prema so llalpe akana, me phenav tumenge te muken gale llenen ta te na amin tumen lenchar. Soke te si gaia ezgoda e manusengi, ka nakhel; 39A te si iek ezgoda e Devleki, nasti ka dobin len. Arakhen tumen, te na avelpe kai maren tumen e Devlea.
Von kandie le. 40Ikharde e apostolen, marde len e bichoia ta phende lenge te na den orba ios kataro Jesus. Mapalal mukliarde len. 41E apostolura lleletar but vesele katar e sudura soke o Del mukla te nakhen patnia ta te den orbe bilache lendar cheres o Jesus 42Ta suako llive sikavena ta phenena e lachi viasta katar o Jesus o Mesias, ta dena orba ando cher e Devleko ta i pe chera.
Επιλέχθηκαν προς το παρόν:
Echos 5: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.