Echos 6
6
Thoven efta llenen te pomozin
1Ande gua vreme, sar e llene kai pachana ando Jesus cherdona mai but, e llene kai dena orba griego jolaile e llenenchar kai dena orba arameo, soke gola kai dena orba griego phenena kai e llene kai pomozina suako llive bristarenape katar lenge diskinie phivle. 2E desudui apostolura chidie sa e llenen kai pachan ta phende lenge:
Inai sukar amen te muka e orba e Devleki ta te thova amen te fulava so si te pomozilpe maskar e llene. 3Goleke, phalalen, roden maskar tumende efta llenen te avel tumen vera ande lende, te aven bizai ta pherde katar o Santo Duo te da len gaia buchi. 4A amen ka moli amen ta ka inllara e orba e Devleki.
5Ta sa e llenenge avila drago gaia orba, ta esvirisarde e Estebane, iek lleno pherdo pachape ta Santo Duo, ta esvirisarde sove llenen ios. Gala si lenge anava:
O Felipe, o Prokoro, o Nikanor, o Timon, o Parmenas ta o Nikolas katar e Antiokia kai omanglal cherdiloia judio. 6Mapalal inllarde len kote kai sea e apostolura, ta e apostolura molisaile ta thode pe va pe lende.#Nm 27.23; 1 Ti 4.14.
7E orba e Devleki sa mai bariola, ta sa mai but llene sea ando Jerusalem kai pachana. Ta i but popura judiura pachaie ando Jesus.
Phanden e Estebane
8O Esteban, pherdo katar o blagosipe ta e zor e Devleki, cherela bare ezgode Devlikane e llenenge katar o foro. 9Nesave llene kai sea katar e khanlliri e judionengi kai ikhardola, Sluge Mukliarde, thodepe avere llenenchar katar o Sirene, katar e Alejandria, katar e Silisia ta katar e Asia, thode te janpe e Estebanea, 10a nasti dobina le, soke dela orba e bizaimaia kai dela le o Santo Duo. 11Ondaka pochinde nesave llenenge te phenen kai asunde le kai phenela alava bilache katar o Moises ta katar o Del. 12Ta gia divosarde e foro, e phuren ta e kovachen katar o zakono, ta cheres gua jolaile e Estebanea ta phangle le ta inllarde le kai e mai bari kris. 13Ta i rodie llenen te kojaven, ta gola llene phende gia:
Gava lleno sa o vreme del bilache orbe katar gava santo cher e Devleko ta i katar o zakono. 14Ta asundam kai phenela kai gua, o Jesus katar o Nazaret ka peravel o cher e Devleko ta kai ka pharruvel e zakonura kai mukla amenge o Moises.
15E sudura ta sa e llene kai besena, kana dikhle e Estebane, dikhle kai leko mui saia sargo iekhe suechoko.
Επιλέχθηκαν προς το παρόν:
Echos 6: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.