Mitteko 4
4
Petro ni Yohane vanthatoni na attekweene a Ayuda
1Petro ni Yohane yallotiiwa wa athu, allupa mukutho amodda#4.1 allupa mukutho amodda: Ddoolemba ddimodda ddakhalle ddaari ni mawu awi allupa mukutho uullupalli. ni oohoollella a akhoto oowehera enyumba ya Mulluku vamodda ni Asaduki* amodda yaaphiya. 2Alliwaalla yaananariwa kaambiiwa amurummwa eellaalla yaanaahuddiha athu wi ttuuvenya wa ookhwa kaambiiwa Yesu aavenyattho wa ookhwa. 3Vano yahaaphara yaahiya mundende ophiyera osaka wene vawi waari osikuwalle khalle. 4Koma mwa athu yiiwalle othengooyo anchichi yaakhulupilila. Nave waata wa athu ookhulupilila wahaanjerereya ophiyera 5,000.
5Vano osaka wene oohoollella ni attekweene a Ayuda* ni ahuddihi a malamulo* yaatthukumana o Yerusalemu. 6Yaakumana ni Anasi, mullupa mukutho muullupalli ni Kayafa, Yohane ni Alekizandro navettho athu attheene amodda a munibanjani na mullupa mukutho muullupallooyo. 7Yaawiimesa amurummwaayo variyari viwa yaakohaka wi, “Mweerille ddenndda mwawiidde, tti masiva awiidde muriinyuna navettho mweerille ddenndda mu nnddina nawani?”
8Vano Petro, ahoollelliwe ni Munepa Waweella, aawaakhulla wi, “Oohoollella a athu ni attekweene, 9naakohiwaka ollello dda mitteko ddaphaama ddeerelliwe muthu ooheetoolle wi achirihiwe mwawiidde, 10vano attheenenyu mudduwelle ni athu attheene a o Israele edduwelle wi muthoolla ohiimella achirihiwe ekaamba ya masiva a nnddina na Yesu Khrisitu a o Nazareti, oyo mwamutthomeyilleenyu vamutandani nave oyo Mulluku aamuvenyihalleeye wa ookhwa. 11#Mas 118.22Dda Yesooyo mawu a Mulluku enallota wi,
‘Nlluku nno nakhootiwe ni oomaka enyumba
nenna naakhalla nlluku noopaalleya.’
12Nave khaavo muthu koma Yesuve oyo anawora waavullusa athu vawi va ellapo yavatthi ettheene khaniivo nnddina nimodda navahiwe ni Mulluku wi nivullusiwena.”
13Attekweene a Ayuda yoonilliiwa ollipa murima wa Petro ni Yohane nave wi yaari athu shisha oohihuddera, yaattikhina. Navettho yaadduwella wi yaanakhalla vamodda ni Yesu. 14Koma kheyaari ni yoollota kaambiiwa yaamoona muthu oochirihiwooyo iimenlle vamodda ni Petro ni Yohane. 15Sika yahaalamulella wi ekhume vaatte vanthatonno nave vano yahaamba okambirana weekhiiwa. 16Yaakohana wi, “Niweere tini athwaalla? Athu attheene mu Yerusalemu ennadduwella wi athwaalla aheera yoottikhiniha nave hiyaanottho khaniwora okhoota. 17Koma wi ehivirellelle ovuwiha wa athu amodda, niwoopopihe wi ehiromollettho nnddina na Yesu.”
18Vano yaawiithana yaalamula wi ehiromolle apaalle ohuddiha nnddina na Yesu. 19Koma Petro ni Yohane yaawaakhulla wi, “Mukamulle nyookha waari waphaama wa Mulluku, owiiwellellani nyuwaano apaalle omwiiwellella Mulluku. 20Vawi khaniwora ohiya ollota dda ello noonilleehu ni wiiwa weekhiihu.” 21Vano a va nthato na millatwaayo yaawoopopiha ohiyana ni vawaamba valle nave yahaattaphulla wi eroweke. Vawi kheyaadduwella wi enaallake mwawiidde kaambiiwa athu attheene yaanamutitimiha Mulluku va ddeko ddeereyillennddo. 22Nave muthu oyo achirihiwe moottikhiniha, aari ni miyakha ddookhwaranya 40.
Ookhulupilila enavekella vamodda
23Yaattaphullalliiwa, Petro ni Yohane yaahokollweella wa ookhulupilila akhwiiwa nave yaalleella ddallotiwe ni allupa mukutho uullupalli ni attekweenaayo. 24#Eks 20.11; Neh 9.6; Mas 146.6Ookhulupililaayo yiiwalliiwa, yaavekella ni murimiiwa muttheene moowiiwanana wa Mulluku wi, “Apwiya nyuwaano muri oophatusa oddullu, ellapo yavatthi, enyanja ni ddittheddene ddiri mwemmo! 25#Mas 2.1,2Ni Munepa Waweella mwaallota mwa nikhollo nahu Davide, oorumeyellaanyu, allotilleeye wi,
‘Athu oohimullapella Mulluku yashelle tini murima
athu yiiwananelle tini va ddeko ddoohikhalla ni mutteko?
26Mamweniiwa ennapangana ddakhoto,
oolamulelliiwa enniiwanana ddoonanara,
ddawaawukila Apwiya ni Mesiyaaye.’*
27 #
Luk 23.7-11;
Mat 27.1,2; Mrk 15.1; Luk 23.1; Yoh 18.28,29 Vawi tti ddawoona wi mwene Herode* ni oolamulella Pontio Pilato yaatthukumana m'muzindani mulle ni athu oohimullapella Mulluku navettho athu a o Israele ollipana ni Yesu, oorumeyellaanyu aweella, oyo mwamuzozilleenyu wi akhalle Mesiya. 28Yaatthukumana wi yeere ddittheddene nnddo mwakhozilleenyu khalle ni masivaanyu ni opaalla wanyu. 29Vano, Apwiya, neerelleni echifundo kaambiiwa ennanoopopiha nave nillipiheni hiyaano oorumeyellaanyu wi nillote othengaanyu moollipa murima wunchichi. 30Onihani masivaanyu wi ochiriha, ezizindikiro ni ddoottikhiniha ddeeriwe mu nnddina na oorumeyellaanyu aweella, Yesu.”
31Yamallihalliiwa ovekellanko, vanipuroni mvo yatthukumanniiwa vaatikheya. Attheenaayo yaaddalliwa ni Munepa Waweella nave yaamba ollalleya othenga wa Mulluku moollipa murima.
Ookhulupilila enakawana ddeko ddiwa
32 #
Mit 2.44,45 Mulloko wa ookhulupililaayo waari wowiiwanana m'murimani mwiwa mutthemwene ni m'maganizoni mwiwa mutthemwene. Khaarivo oyo allotille wi ello aariiyena tti yaayeyaaye koma yaanakawana attheene ddeko ddittheddene yaariiwana. 33Amurummwaayo yaavelleella omboni mwamasiva muullupalli dda ovenya wa ookhwa wa Apwiya Yesu nave Mulluku aaweerella echifundo yuullupalli. 34Khaarivo muthu a va mullokwiiwa oyo aari oopaalla ello. Vawi ayo yaari ni emata apaalle enyumba yaanakulliha nave makobiri yaakhelliiwa yakulliha yaanawaana, 35yaavelleella wa murummwa nave makobiraayo yaanakawiwa wa arive muthu ollikana ni opaalla waye.
36Nave waakhalla muthu mmodda nnddina naye Yosefe a nlloko na Levi oyo avenyera o Kupro. Amurummwa yaamuvaha nnddina nawi, Baranaba ottaphullella wi, “Oollipiha murima.” 37Aakulliha emataaye awaana makobiraayo, aavelleella wa amurummwa.
Επιλέχθηκαν προς το παρόν:
Mitteko 4: MW2019
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible in Elhomwe © The Bible Society of Malawi, 2019.