Mitteko 3
3
Ochirihiwa wa mullopwana ookhwa meto
1Nllapo nimodda Petro ni Yohane yaaya o enyumba ya Mulluku 3 koloko otthaana eyo yaari enthawi yamavekello. 2Nave muthu mmodda ookhwa meto eyariwellwaaye aakuselliwawo. Olliyooyo mallapo mattheene aanakusiwa anahiyiwa vamullakoni wa enyumba ya Mulluku wooromolliwa “Mullako Wooreera” wi aavekeke makobiri athu yaavollowaka mu enyumba ya Mullukweeyo. 3Awoonilleeye Petro ni Yohane ewaaka wi evollowe mu enyumba ya Mulluku, ahaaveka makobiri. 4Alliwaayo yaamuwehesesa nave Petro aallota wi, “Niwehe hiyaano!” 5Ahaaweha, anatiyera wi aakhelle ello. 6Koma Petro aamulleella wi, “Makobiri nginna koma kineerewuuvaha kiriimina. Mu nnddina na Yesu Khrisitu o Nazareti kinuulamulella wi, venya weete.” 7Vano aamuphara nnattanatta amwiimesa. Enthawi yeeyo manyallwaaye ni mookumanella manyallo ni meto mwaallipa. 8Aallupha, iimella nave aneeta. Vano aavollowana mu enyumba ya Mulluku, eetaka, alluphaka, amutitimihaka Mulluku. 9Nave athu attheene yaamoona eetaka amutitimihaka Mulluku. 10Nave yaamudduwella wi tti yoolle akeraatthi va Mullako Wooreera wa enyumba ya Mulluku avekaka. Yaattikhina ni ohalleella va ddamweereyellennddo.
Ollalleya wa Petro mu enyumba ya Mulluku
11Muthooyo aaphareelleeye Petro ni Yohane mu nikhote nooromolliwa wi Nikhote na Solomoni, athu attheene yaathamakellawo moottikhina. 12Petro awoonilleeye athwaayo, aallota wi, “Aisraele nyu, munattikhinella tini ni yeella apaalle munaniweherati wonanko nimweetihalle muthoolla ni masivaahu apaalle wi niri aweellesesa? 13#Eks 3.15Mulluku a Abrahamu, Mulluku a Isaki ni Mulluku a Yakobo, Mulluku a makhollwaahu, aamutitimiha Oorumeyellaaye, Yesu, voomuchirihani muthoolla. Koma Yesu yoolla mwaamuvelleella wa oolamulella navettho mwaamukhoota vamiitthoni va Pilato naari Pilato apaallille wi amuttaphulle. 14#Mat 27.15-23; Mrk 15.6-14; Luk 23.13-23; Yoh 19.12-15Mwaamukhoota oyo aari aweella ni oolungama nave mwaamuveka Pilato wi uuttaphullelleni muthu awiipha. 15Nave mwaamwiipha oyo aari oovaha okumi koma Mulluku aamuvenyiha wa ookhwa nave hiyaano tti amboni a ddenndda. 16Nnddina naye ni echikhulupililo mu nnddina naye sika emullipihalle muthu ooheeta olla munamooneenyu nave munamudduwelleenyu. Echikhulupililwaaye mwa Yesu, yoomuchiriha muthoolla attheenenyu moonaka.
17“Nave vano, akhwaakanyu, kinnadduwella wi nyuwaano ni attekweenaanyu mwaamweerella ddenndda Yesu ekaamba ya ohidduwella wanyu. 18Mulluku aallotella khalle oweella mwa anamallotella attheene wi Mesiya anaphwanella wi ahoosiwe nave ddaakwakhwanihiwa. 19Sika rukunuwani murima nave muwe wa Mulluku wi uukhululukelleni machimwaanyu 20Vano Apwiya eneerewuuvahani enthawi yawiithuuwa nave eneeromurumiha Yesu, oyo tti Mesiya, oyo amutthoonlleeye khalle ekaamba ya nyuwaano. 21Anaphwanella wi akhalle oddullu ophiyera ekwakhwanihiwe enthawi yoopotokosa ddeko ddittheddene wi ddikhalle ddanaanweene moollikana ni ddallotille Mulluku oweella mwa anamallotella aweella murima ayo yaariwo mallapo akhalle. 22#Deu 18.15,18Vawi Mose aallota wi, ‘Apwiya Mullukwaanyu aneerewuurumihellani namallotella wonanko miyaano#3.22 wonanko miyaano: apaalle wonanko mmo akitthoollelleeye miyaano. ovenyera mwa nyuwaano. Mwiiwellelle erive ello anaalloteeye wa nyuwaano. 23#Deu 18.19Arive muthu ahinaamwiiwellelle namallotellooyo aneerewoonongiwa variyari va athu.’ 24Navettho anamallotella attheene waambeella va Samuele ni yaayo yawiille vatulli vaye, yaallotella ddineereyanndda. 25#Gen 22.18Nyuwaano muri edduullu dda anamallotella nave munnakawanana dda echipangano eyo Mulluku eerilleeye ni makhollwaanyu, allotilleeye wa Abrahamu wi, ‘Mwa edduullu ddawo athu attheene a va ellapo yavatthi eneerodalisiwa.’ 26Nave Mulluku amutthoonlleeye oorumeyellaaye, aambille omurumiha wa nyuwaano wi uudaliseni vooweerihani attheenenyu wi murukunuwe murima o machimwaanyu.”
Επιλέχθηκαν προς το παρόν:
Mitteko 3: MW2019
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible in Elhomwe © The Bible Society of Malawi, 2019.