Mitteko 5
5
Mwaha wa Ananiya ni mwaariye Safira
1Waakhalla muthu mmodda nnddina naye Ananiya.* Olliyoolla ni mwaariye yaakulliha ematiiwa. 2Ananiya aavukullawo makobiraayo mwaariye adduwellaka nave oohallaayo avelleella wa amurummwa. 3Petro aallota wi, “Ananiya kaambiiwa tini Satana addanlleeye m'murimani mwawo wi woottotthe Munepa Waweella voovukullani makobiri waakhenlleewe okullihalle emataawo? 4Ohinakullihe emateeyo yaari yaawo nave oyikullihalle makobiraayo yaari aawo. Kaambiiwa tini, waganizalleewe weera ello yeella? Khowoottotthille athu koma omoottotthille Mulluku!” 5Ananiya iiwalleeye mawu yaalla, ahiikuha akhwa nave attheene ayo yiiwalle dda yeella yahoova. 6Asombwe amodda yaawa, ehuruwella mutembwaayooyo mukuwoni, etukhulla yawuvittha o mahame.
7Viviralle maora mararu, mwaariyoolle aavollowa moohidduwella yeereyilleeyo. 8Petro aamukoha wi, “Okilleelle, Weyaano ni mamuno mwakullihalle emateeyo makobiriine yaallave?”
Mutthiyanooyo ahaakhulla wi, “Ddawoona, tti yaallave.”
9Vano Petro aallota wi, “Kaambiiwa tini wiiwananneewe ni mamunooyo wi muweese Munepa wa Apwiya? Asombwe emuvitthalle mamuno eri vamullakonimvo nave eneerewuutukhulla wi yuuvitthe naweenettho!” 10Enthawi yeeyo ahiikuha vakhuviru ni Petro akhwa. Vano asombwaalle yavollowiiwa yaamoona wi ookhwa, emutukhulla nave yamuvitthattho vakhuviru ni mahame a mamune. 11Mpingo muttheene ni athu amodda attheene ayo yiiwalle ddenndda yahoova.
Amurummwa eneera ddoottikhiniha
12Amurummwa yaheera ezizindikiro ddinchichi ni ddoottikhiniha ddinchichi variyari va athu. Ookhulupilila attheene yaanatthukumana vamodda ni murimiiwa muttheene moowiiwanana mu Nikhote na Solomoni mu enyumba ya Mulluku. 13Kheyaarivottho athu amodda ayo yatthukumannena vamodda ni mpingooyo kaambiiwa athu yaanoova koma athwaayo yaanallota ddaphaama ddiwa. 14Athu anchichi, allopwana ni atthiyana yahaamba okhulupilila mwa Apwiya. 15Ekaamba ya mitteko dda amurummwa, athu oovoriiwa yaanakhumihelliwa omusewuni ekonaatthille vamachirani ni vaminllini wi Petro aaviraka naari muuthuuchaayeve waaphwanye. 16Nave athu anchichi yaawa ovenyera o etawoni ddoomwaapheella Yerusalemu. Yaawaana athu oovoriiwa apaalle athu ookhalla ni minepa ddoonanara nave attheenaayo yaachirihiwa.
Amurummwa enaamba ohoosiwa
17Vano mullupa mukutho muullupalli ni akhwaaye, ayo yaari a mulloko wa Asaduki,* yahaakhallella ehache amurummwaayo, sika yaapaalla oweerella ello. 18Yahaaphara amurummwaayo yaahiya mundende. 19Koma mahiiyu yaayo mungelo a Apwiya aahulla millako dda ondendenko, aakhumiha amurummwaayo, aalleella wi, 20“Khaweni mu enyumba ya Mulluku nave mwaalleelle athu dda okumi wanaanweenoolla.” 21Amurummwaayo yahiiwellella nave ohinase yaavollowa mu enyumba ya Mulluku yaamba ohuddiha.
Mullupa mukutho muullupalli ni akhwaaye yaawiithana attekweene attheene a millatu a Ayuda omutthukumanoni wa vanthatoni namillatu. Vano yahaarumiha akhoto ondende wi yaakuse amurummwaalle eweena vamiitthoni viwa. 22Koma akhotwaayo yaphiyalliiwa ondendenko, kheyaaphwanyillemo amurummwaayo. Sika yaahokollowa yallota wi, 23“Naphiyalleehu ondendenko, naphwanyille millako ddiwalliwe ni oowehera attheene eweheraka m'millakonimmo. Koma nahullalleehu millakonnddo, khanaamphwanyillemo muthu!” 24Ooholleella a oowehera o enyumba ya Mulluku ni allupa mukutho uullupalli yiiwalliiwa yeella, yaahalleelliwa nave yaanakhupanya eyo enaaweereye muhoollo. 25Vano muthu mmodda aavollowa nave allota wi, “Ngiiwani! Athu mwaahiyalleenyu mundendaalle eri mu enyumba ya Mulluku, enaahuddiha athu!” 26Vano ooholleella ni oowehera o enyumba ya Mulluku yaatimulla eya yaakusattho amurummwaayo. Kheyawaakusalle mwakhoto kaambiiwa yawoova athu wi yaawerowaavokha malluku.
27Yawiilliiwana amurummwa, yaawiimesa vamiitthoni va attekweene a millatu nave mullupa mukutho muullupalli aamba waakoha. 28#Mat 27.25Aallota wi, “Valle nahuuhiihani wi muhihuddihe wiilli muromollaka nnddina na muthu yoolla koma moovuwiha ehuddihwaanywiilla mu Yerusalemu mutthewene nave munapaalla muniphwanyelle mullatu wawi tti hiyaano namwiiphalle!”
29Koma Petro ni amurummwa akhwaayaayo yahaakhulla wi, “Ninaphwanella omwiiwellella Mulluku ohiyana ni owiiwellella athu. 30Mulluku a makhollwaahu aamuvenyiha Yesu wa ookhwa, nyuwaano mumwiiphalle nave mumutthomeyille vamutandani. 31Yooyo Mulluku aamuwelliha akhalla onnattanatta naye wi akhalle Oohoollella navettho Oovullusa wi aavahe athu a o Israele ekari yoorukunuwa murima ni okhululukelliwa machimwiiwa. 32Hiyaano tti amboni a ddeko ddenndda vamodda ni Munepa Waweella, oyo Mulluku aavahilleeye ayo enamwiiwellella olliye.”
33Athu a va nthato namillatu yiiwalliiwa yeella, yaananariwa wunchichi wawi yaapaalla owiipha amurummwa. 34Koma waakhalla muthu mmodda a Afarisi* nnddina naye Gamaliyeli oyottho aari muhuddihi a malamulo* nave ooriiheya ni athu attheene. Ahiimella vanthatoni namillatunno aalamulella wi amurummwa ekhumihiwe vaatte vang'ono. 35Nave aallota wa athu attheene a vanthatonimvo wi, “Aisraele akhwaaka, chenjerani wa eyo munapaalleenyu wi muweerelle athwaalla. 36Munnuupuwella wi Teyudasi aawa khalle valle allotaka wi olliye tti muthu awiiweya nave athu vakhuviru 400 yaamuthwara. Koma iiphiwe, attheene yamuthwanraalle yaapallalleya nave mullokwaayooyo waamallavo. 37Aviralle yooyo, Yudasi a o Galileya aawattho enthawi ya kalembera akopa mulloko wa athu anchichi koma nayeenettho ahiiphiwa nave attheene yamuthwanraayo yaapallalleya. 38Ekaamba ya mwaha yoolla, kinimuulleellani, muheere erive ello va athu yaalla. Mwaahiye! Eneereewanndda ddakhalla ddoovenyera wa athu ddineeromalla. 39Koma eneereewanndda ddakhalla ddoovenyera wa Mulluku, khamuwora waahiiha. Muneerewoona nyookha wi munallipana ni Mulluku!”
Athu a va nthato na millatwaayo yaakopiwa ni Gamaliyelooyo. 40Yaawiithana amurummwaayo wi evollowe, yahaawashulla, yaalamulella wi ehiromollettho nnddina na Yesu nave yahaattaphulla. 41Amurummwaayo yavenyilliiwa o nthatoni namillatu nko, yaahakallalla wi Mulluku aaweerengella alliwaayo wi tti woophwanella ohoosiwa ekaamba ya nnddina na Yesu. 42Nave nllapo ni nllapo mu enyumba ya Mulluku ni mu enyumba dda athu yaavirellella ohuddiha ni ollalleya othenga waphaama wa Yesu, Mesiya.*
Επιλέχθηκαν προς το παρόν:
Mitteko 5: MW2019
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible in Elhomwe © The Bible Society of Malawi, 2019.