MARCOS 8
8
Jesosaa 4.000 huisome dejja, eponacuana pea-ai bobiacapoa
(Mt 15.32-39)
1-2Majoya aje quijje pea pojjajo queahuisoneecuana jjachichaquicapoa Jesosa nequiyasijje. Tres cahuime huisotii ejjachichaqui anicapoa cuana, jamajjeya queashoenee pocacuanapoa. Majoya Jesosaa o shajja-ajjajji poanicuana iyaacapoa onijje emimijji. Jama mimime poa onijje ba'a: —Eya queayeno jjashahuabaquiani jiquio anicacuanajo. Oya tres cahuime huiso jiquiojotii anica enijje, jjeya bobima' anica oja bobi ijjiajeyo epo. 3Eya jamatii huoojea'yajje bobima'tii queamanonee poaje cuana ejeojjijje epoqui'yojji. Becacuana ca queahueshanee ba'e poe.—
4Jesosa shajja-ajjajji poanicuana saja-acapoa jama ba'a: —¡De! Jiquiojo chama'nei bobi ejjeshejji queahuisoneecuana bobiajji, jiquio meshi se-ejjama'neinei, ¿achacua ejjeshejji?—
5Jesosaa o shajja-ajjajji poanicuana huohuiajjacapoa jama ba'a: —¿Ache huiso pahui acue oe miquianajaya che ani?—
Saja-acapoa cuaa jama ba'a: —Siete huisomenei che pahui yani.—
6Majoya Jesosaa ojjaña majo anicacuana huohuicapoa eanioquejji meshiyasijje. Jesosaa pahui siete huisome jjeshemajje Eyacuiñajji bihuiacapoa. Majoya pahuicuana mijimajje Jesosaa o shajja-ajjajji poanicuana pahui quiacapoa oja ma ejjachichaqui anicacuana quiajji. Jamajjeya o shajja-ajjajji poanicuaa pahui quiacapoquiapoa cuana oja ijjiajji. 7Nahuoosisi pea-ai ejaa poa oepojji. Jesosa Eyacuiñajjinijje mimiapoa nahuoojo pea-ai. Mimipajeamajje ohuaya o shajja-ajjajji poanicuana nahuoosisi quiacapoa oja majo anicacuana quiajji. 8Ojjaña majo anicacuaa pahui, nahuoo pea-ai ijjiacapoa, jejjecapoa cuana. Majoya o shajja-ajjajji poanicuaa onaja ijjiajeyojjima ani chichaca'yapoa. Siete eshaja-aijo cuatajeameecapoa cuaa majo anicacuanaja ijjiajeyojjima aniya. 9Ma Jesosaa bobiacapoa beshahuanei 4.000 huisome dejjacuana esico poa.#8.9 Nota: Eponacuana, esho'iquiana pea-ai ca sicojjima poa.* Majoya aje Jesosaa huoojeaca'yapoa cuana oja equiyasijje epoqui'yojji. 10Ojjañacuana poqui'yajo Jesosa bishe'aiyasijje anisohuaqui'yapoa besapoqui'yohua o shajja-ajjajji poanicuananijjetii. Oya besapoqui'yapoa provincia Dalmanuta meshiyasijje.
Fariseo dejjacuaa Jesosa dejjaja ajjima'neinei ameemajamajasa-acapoa
(Mt 16.1-4; Lc 12.54-56)
11Majoya aje quijje Jesosa ba'eñaquije bamajje fariseo dejjacuana poeapoa Jesosanijje mimiya. A'a ohua dejjaja ajjima'neinei acaje ebajji huohuiajjaa poepea-aiapoa. Jamajjeya oya jama huohuiajjame acapoa cuaa ba'a: —Jjeya miyaya dejjaja ajjima'neinei acue miya e'ejojonei Eyacuiñajjija huoojeanei poani jjabaquimajje ecuanajaya miya ebajji queaja'a.— 12Jesosaja ebatii poa fariseocuanaja ejjashahuabaquijji ojo. Jamajjeya Jesosa queayenonee poa. Jama poa jjajjeanajeaquimajje ba'a: —¿Apiojji ojjaña jiquio jjeya ba'ecacuaa eya dejjaja ajjima'neineicuana ameesa-acani? Ecuea e'ejojonei jjeya jama eajji pojjeama macuanajaya ebajji.—
13Majoya aje Jesosaa fariseocuana jiñajeaca'yapoa. Oya bishe'aiyasijje anisohuaqui'yomajje huacuaya besapoqui'yapoa bae ojjemijiyasijje o shajja-ajjajji poanicuananijjetii.
Fariseocuanaja esohui pahui shejjeemeejji jayojja poani ona queaquehua jjashahuabameequijji
(Mt 16.5-12)
14Majoya besapoqui'yaniya o shajja-ajjajji poanicuaa pahui pajeacana'yapoa eijjiapoquia'yojji. Oenei che pahui dojoca'yapoa cuaa. 15Jesosaa jama niñesheame acapoa cuana ba'a: —Bacue, jjajaahuananeiquicue oe quiana fariseocuanaja pahui eshejjeemeejji jayojjajo, Herodesja epeejjicuanaja pea-aijo.—
16O shajja-ajjajji poanicuana Jesosaja esohui shajja-ajjamajje ojee mimimimiapoa oja esohuijo. Oya pahui chamajo mimiani poso acapoa.
17Jesosaja ebatii poa ajeo mimimimiani cuana, jamajjeya jama acapoa cuana ba'a: —¿Apiojji acuae quiana pahui chamajo mimimimianitii? ¿A'a quianaja ecuea esohui queaquehuatii? ¿A'a quiana queasapaca'atii poani? 18Miquianaya cojjajji jamatii jjabaquiajja, shajjahuejjajji jamatii quiana jjashajja-ajjaquiajja pea-ai. ¿A'a ma yahuajo eya anaje queahuisocuanajo epajea'yo? 19Yahuajopishana eyaya cinco pahui mijimajje bobiameenaje 5.000 huisome dejjacuana. ¿Achehuiso eshaja-ai cuatajeameenaje majo anicaja ijjiajeyojjima poanaje pahuiya?—
Saja-acapoa cuaa jama ba'a: —Doce huisome eshajajo chicha'yonaje.—
20Jesosa jama poa pea-ai ba'a: —Yahuajopishana siete pahui jjeshemajje 4.000 ejjachichaqui anicacuana bobiameenaje. ¿Ache huiso eshaja-ai miquiaaya cuatajeameenaje majo anicaja ijjiajeyojjima poanaje pahuiya?—
Saja-acapoa cuaa jama ba'a: —Siete huisome eshajajo chicha'yonaje.—
21Jesosaa jama acao'oyapoa cuana ba'a: —¡De! ¿a'a ecuea esohui queaquehuatii poani miquianaja?—
Betsaida meshijo nequi cojjama' dejja Jesosaa jjacojjaja'ameequica'yapoa
22Majoya aje quijje Jesosa pueblo Betsaida meshiyasijje nequiñaquiajo macuiñajjicuaa oe cojjama' dejja yecapoa Jesosaja enapajji oja emeya. 23Jesosaa dejja cojjama' oja emeya iñamajje dojocuayaquicapoa Betsaida meshijo ani queahueshapishanahuasijje. Majoya Jesosaa oja cuichohua dejjaja cojja iñapepacapoa. Oja eme dejja cojjama'ja eyamibiajje huanamajje Jesosaa huohuiajjacapoa oya jama ba'a: —¿A'a mi jjeya queaja'a jjabaquiani?—
24Dejja cojjama' jama poa ba'a: —E de, queaja'apishana mo jjabaqui'yani. Eyaya dejjacuana ba'yaña jamatii oya acuicuana poaequiani jayojja pea-ai ba'yaña.—
25Majoya Jesosaa oja eme ma dejjaja ecojjahuasijje huanacao'oyapoa. Jesosaa jama acajje dejja queacojjaja'anee po'yapoa. Queaja'anee ojjañacuana baca'yapoa. 26Jesosaa oya oja equiyasijje huoojea'yomajje oya jama acapoa ba'a: —¡A'a Betsaida meshiyasijje poquio'oyajji!—
Pedrohua esohui queaja'anee acapoa Jesosajo oya Eyacuiñajjija huoojea ojjaña nahue'yojji epojji
(Mt 16.13-20; Lc 9.18-21)
27Majoya aje quijjepishana Jesosa o shajja-ajjajji poanicuananijje poquiapoa provincia Cesarea meshijo ba'ecacuanahuasijje. Ejeojjijje poquianijo Jesosaa o shajja-ajjajji poanicuana huohuiajjacapoa jama ba'a: —¿Yajja shai poani cuana ejo, ae dejja shai eya poani acani cuaa?—
28Oya saja-acapoa cuaa jama ba'a: —Miya pa Juan ma ona iñajeanobiajji ponequinaje dejja, maya. Peacuana ca jama poani mijo ba'a: “Elías coma ma yahuajo esohuihuohuijji ponequiapoa dejjaya.” Peacuana ca jama poani mijo ba'a: “Eyacuiñajjija esohuihuohuijji ma yahuajonei nequiapoa jjeya eshequi'yo nequi pojja'a”, jamaya poani cuana mijo.—
29Majoya Jesosaa huohuiajjacapoa cuana jama ba'a: —Miquianaya ¿yajja poani? ¿a'ya eya?—
Simón Pedrohua oya queaja'a saja-acapoa jama ba'a: —Miya caca e'ejojonei Quito, Eyacuiñajjija huoojea ojjaña nahue'yojji epojji.—
30Jamatii Jesosaa o shajja-ajjajji poanicuana huohuicapoa oja peacuana huohuijjima yajji ojo.
Jesosaa huohuicapoa cuana o mano'yojjijo
(Mt 16.21-28; Lc 9.22-27)
31Majoya aje Jesosaa o shajja-ajjajji poanicuana huohuicoocapoa jama ba'a: —Eya Dejjapojji epo quijje queaneenee acaje'yo cuaa. Judío etii poanicuaa majo nequicacuaa eya queaneenee ameecaje'yo. Eyacuiñajjija equi-aijo chacochacopoquiani etii poanicuaa, Moisesja tehuehuohuijji poanicuaa pea-aiya eya queaneenee ameecaje'yo pea-ai. Jamatii eya tres cahuime huiso emano'yo jaa shequije'yo.— 32Jamaya Jesosaa queaja'anee huohuicapoa cuana ma quijje onaaya oya queaneenee acajejo. O jama poani shajja-ajjamajje Pedrohua Jesosa queahueshapishana dojoshiñacapoa o jama mimime pomeejjima yajji nisho. 33Jesosa ca o shajja-ajjajji poanicuana aniyasijje poeo'oyapoa. O shajja-ajjajji poanicuana bajea'yomajje Pedro jama tecueame acapoa Jesosaa ba'a: —Pedro, queahuesha nequicue ejo. Miya ebionei eshahua Satanás bajjani jama enijje mimiani. Eyacuiñajji jama pojjeama jjashahuabaquime miya poani. Miya caca minijje dejjacuana jama pea-aiya jjashahuabaquime poani— jama tecueameya acapoa.
34Majoya aje Jesosaa o shajja-ajjajji poanicuana, peacuana pea-ai iyaacapoa ehuohuijji. Jama huohuime acapoa cuana ba'a: —Joya e shajja-ajjajji posapoanicuana ojayanei eba'ejjijotii jjashahuabatiiquicapoquiajja. Jiquio ecua dejjaa acui ecuiata'apee abocani edojojji o quecuacaje'yohuasijje jama pea-aiya e shajja-ajjajji poani ba'epoquije ojjaña pojjajo, ejjanahuequi'yojji pojjeama poaje queacamajaneejo. 35Ojjaña joya ojayanei eba'ejjijo jjanahuequipoquianicuana ecuea echacojji eajji pojjeama. Comacuanaja eba'ejji peajja jayojja bacaje Eyacuiñajjiya. Ojjaña joya jjanahuequiajja poanicuana ecuea echacojji yajji, esohui queapame ejo ehuohuijji pea-ai ca Eyacuiñajjiya comacuanajaya eba'ejji queapamenee bacaje.#8.35 Nota: Acui ecuiata'apee jama poanijje ba'a: manoje'yo. Jamajjeya ojjaña joya acui ecuiata'apee dojojji poanicuana jjabaquiani emano'yo jayojja poani ojayanei ejjashahuabaquijji eajjitii pojjeama. Ohuaya ca Eyacuiñajjija ejjashahuabaquijji acapoquije.* 36Joya ema'tii jayojja ba'epoquianicuana quea-aquianahuisonee epojjijo jjashahuabaquianitii, cua ohua sacani huisotii jjeshecapoquije. Majoya oya quijje mano'yomajje, ¿a'a queapame nequije'yo Cuaqui-aiyasijje? Chojja. 37¿Ache sosehuisojo ohuaya jjeshecaje o ba'etiitiipoqui'yojji Eyahuasijje Eyacuiñajjinijje? Ache huisojopishana, jjesheca-ajja bejjo sosejje. 38Joya ecuea epeejji queabicho poani ejo, ecuea esohuijo pea-ai eya Dejjapojji epo queabicho poaje ojo quijje eya poeo'o'oyamajje. Eya Eyajo nequi ecue Chii queaca'aneeja jeasajajamee poeje o'oya angelcuana queapameneenijje ojee.—
Επιλέχθηκαν προς το παρόν:
MARCOS 8: ESE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Mision Nuevas Tribus, 2006