MARCOS 9
9
1Majoya Jesosaa jama huohuime apea-aicapoa cuana ba'a: —Eyaya e'ejojonei quiana huohuiaña. Beca quiaa jiquiojo mano'yojjima eshe nequiya Eyacuiñajji queaca'aneetii nequiya ojjañacuana huoojeacapoquianitii baje.—
Jesosa jjahuapaquiapoa, queacojjajijinee poa
(Mt 17.1-13; Lc 9.28-36)
2Majoya aje quijje seis cahuime huiso jjayejjequiajo Jesosa jaasohuaquiapoa eyiyoao nequiyasijje. Ohuaya Pedro, Santiago, Juan pea-ai dojosohuaquicapoa onijjetii. Ma eyiyo quea-aojo nequi aje Jesosa pea cojja ponanapoa, jjahuapaquiapoa oja dojosohuaqui, tres dejjacuana ojee o cojjaneijo nequijo. 3Oja daqui queasiyoja'anee poa, quea-osheneenee pea-ai. Daqui etajjaneinei'yo quea-oshepishana jama pojjeama quea-osheneenee poa. 4Jesosa majo nequi ma yahuajonei Eyacuiñajjija esohuihuohuijji poa Moisesnijje, Eliasnijje pea-ai mimije bacapoa cuaa. 5Majoya Pedrohua Jesosa jama acapoa ba'a: —Esohuihuohuijji, ¡queapame eseya jiquiojo ani! Miya sapoanijo ecuaa tres equisisicuana jjeya huanasohuaje. Oe miquea epojji, pea ca Moisesja, pea ca Elías anijji ecuaa jjeya huanasohuaje.—
6O shajja-ajjajji poanicuana majo ani Jesosa jjahuapaquije bamajje queametenee poa. Jamajjeya jamatii equi huanasohuajjijo mimijeapoa Pedro ojaya bajjima yajja mimime Jesosanijje pocajji. 7Pedro onijje mimianijotii bo quea-oshesiyonee nequioqueñapoa. Majoya queyacañapoa cuana bohua. Ohuaya shajja-ajjacapoa botejjee nequi mimije jama ba'a: —Jiquio ecue Bacuaejja queajeaneenee poani. Jamajjeya quiaa oya shajja-ajjaneicue.— 8Majo ani jjabajeasohuacuajiquimajje Jesosa oenei nequi bacapoa cuaa. Chama'nei pea onijje nequi bacapoa.
9Majoya aje jaaoquequi'yaniya eyiyojje Jesosaa acapoa cuana jama ba'a: —Jiquio jjeya miquiaa banaje, ¡a'a oe peacuana huohuiñaqui'yojji! Eya, Dejjapojji epo Eyacuiñajjiya shequimeeca'yajo quiana oe majoya huohuipo'yocue.— 10Jamajjeya aje o shajja-ajjajji poanicuanaja peacuana huohuiña'yojjima poa ma ohua eyiyojo nequiya bacanaje huisotii, jamatii Jesosa shequimeecaje'yo esohui ojaya queaquehua poa.
11Majoya o shajja-ajjajji poanicuaa Jesosa huohuiajjacapoa jama ba'a: —¿Yajjajje shai Moisesja tehuehuohuijji poanicuaa huohuicani Elías ebionei poeje Eyacuiñajjija huoojea ojjaña nahue'yojji epojji poejjimahuajo?—
12Jesosaa saja-acapoa cuana jama ba'a: —E'ejojonei ebionei Elías poeje. Ohuaya ojjañacuana apoa epojji Eyacuiñajjija huoojea ishoajji esohui ebionei huohuicañaje. Eyacuiñajjija esohui jama poani pea-ai ba'a: “Oja huoojea Dejjapojji epo queaneenee acaje cuaa, cajaa oya acaje cuaa” jamaya poani. 13Eyaya quiana huohuiaña Elías epoe. Oya poeyanaje bajjima poanaje cuanaja, pea poso oya acanaje cuaa. Jamajjeya cua oya queaneenee amee'yosa-acanaje huisotii oya queanee ameeca'yonaje cuaa. Jamaya Eyacuiñajjija esohui Eliasjo etehue jaa yajja oya acaje'yo cuaa ebajji. Oja tehue jayojjaya aca'yapoa cuaa.—
Jesosaa dejjasho'ija yamijo nequi eshahuamase cuayameequica'yapoa
(Mt 17.14-21; Lc 9.37-43)
14Jesosaa eyiyoaojo nequi jaaoque'yomajje bacañaqui'yapoa ma pea o shajja-ajjajji poanicuana queahuiso peacuananijje ani. Moisesja tehuehuohuijji poanicuana jjamimicuianobiaquiani o shajja-ajjajji poanicuananijje bapea-aicapoa. 15Majoya Jesosa poeje bamajje ma ejjachichaqui nequicacuana cuajicuajipoquiapoa Jesosa baa. Oya queabihuineeya bacajjequi'yapoa cuaa. 16Majoya Jesosaa huohuiajjacaña'yapoa cuana jama ba'a: —¿Ajeo, ache esohuijo jjamimicuiajeanobiaquiani quiana peanijje?—
17Oe dejjaa majo nequiya jama saja-ame acapoa ba'a: —Esohuihuohuijji, jiquio eyaya ecue bacuaejja yenaje mique. Oya eshahuamase yamijji, ohuaya ecue bacua mimiajja pomeecani. 18Cua o poquije meshiyasijje eshahuamaseya oya niñepoquimeecani. Oya meshiyasijje jeabichajeamajje oja enabajje huapameecani. Oja ese' ijjiayaimeecani, ojaya eyami jjequijjajjajeameecani pea-ai. Eyaya mi shajja-ajjajji poanicuana huohuiajjanaje oja eshahuamase huoojeacuayajea'yojjijo. Chojja, cuayameequi'yoajja ojaya.—
19Jesosaa o shajja-ajjajji poanicuana jama acapoa ba'a: —Miquianaya jiquio jjeya eshe ba'ecacuana queamimishica'a poani. Miquianaya ejo jjashahuabaqui'yoajjatii ba'epoquiani. ¿Ache ba'i huiso shai eya jiquio meshijo miquiananijje nequije so'o? Eya miquiananijje enequitiitiijji pojjeama.—
Majoya Jesosaa ma dejja jama acapoa ba'a: —Jiquiacua jjeyahuanei dejjasho'i eshahuamase yamijji yecue eque.—
20Majoya dejjasho'i shahuamase yamijji yecapoa Jesosaque. Jesosa ohua bacañajeahuajo eshahuamaseya esho'i niñepoquimeecao'oyapoa. Meshiyasijje esho'i jeabichajeamajje jjajeapajjajeameequicajaapoa. Oja enabajje huapapea-aimeecapoa. 21Jesosaa esho'i jama poani bamajje oja chii huohuiajjacapoa jama ba'a: —¿Ache shequiajame huiso oya eniñepoqui poani?—
Oja chiiya jama acapoa ba'a: —Esho'yahuatii oya niñepoquinaje. 22Oja yamijo nequiya eshahuamaseya oya cuaquiyasijje jeacani queahuiso. Enahuasijje pea-ai ehui'ijea'yojji nisho queahuiso jeacani. Jamajjeya, ¿a'a miya queaca'anee poani o huoojeacuayajea'yojji epojji? Miya ecuanajo queayeno pomajje queapame ecuana pomee'yocue. Eshahuamase huoojeacuayajea'yocue.—
23Jesosa jama poa onijje ba'a: —¿Yajjajje acuae mi jama poani a'a eya queaca'a poani o huoojeacuayajea'yojji epojjijo? Ojjaña ecuea acajji joya ejo jjashahuabaqui'yanicuana.—
24Majoya esho'ija echiimese janobajjimanei jama poa Jesosanijje ba'a: —Eya Eyacuiñajjijo e'ejojonei jjashahuabaqui'yani. Eya queaja'atii jjashahuabameequi'yocue ojo.—
25Queahuisoneecuana ojo jjachichacuajiquiani bamajje Jesosaa eshahuamase huoojeacuayajeaca'yapoa. Jama huohuime acapoa ba'a: —Eshahuamase, miya esho'i mimiajja shajjaqueba pea-ai pomeejji poani, eyaya miya huohuiaña jjeyahuanei cuayaqui'yocue esho'ija yamijo nequi. ¡A'a nobibecaqui'yojji oja yamiyasijje!—
26Jesosaa esohui jama acajeahuajo eshahuamase taaasajajeapoa. Ohuaya esho'i niñepoquimeecao'oyapoa. Majoya esho'i jama ao'oyamajje eshahuamase oja yamijo nequi cuayaqui'yapoa. Ohuaya cuayaqui'yaniya dejjasho'i eshema'yotii jayojja jaameecana'yapoa. Jamajjeya oya mano'yonaje poso acapoa majo ejjachichaqui nequicacuaa. 27Jamajjeya Jesosaa dejjasho'i me iñacajje nequisohua'yapoa. Oya epii nequi'yapoa quea-ajanee'yo.
28Majoya aje Jesosa quijjepishana equiyasijje oenei nobiqui nequi o shajja-ajjajji poanicuaa oya huohuiajjacapoa jama ba'a: —¿Yajjajje shai ecuana ca'a-ama poanaje ma eshahuamase huoojeacuayajea'yojji?—
29Jesosaa saja-acapoa cuana jama ba'a: —Jiquio eshahuamasecuana queaca'anee, jamatii cuayaqui'yoajja oya. Eyacuiñajjinijje mimimajje caca oe oya huoojeacuayajeameeca'yojji. ¡Mimijjimajo ca cho, ecuayaqui'yojji pojjeamatii poaje!—
Jesosaa huohuicao'oyapoa cuana o mano'yojjijo
(Mt 17.22-23; Lc 9.43-45)
30-31Majoya Jesosa o shajja-ajjajji poanicuananijjetii poquiapoa Galilea meshijje. Jesosa peacuanajo jjabameequisapo-ajja poa o shajja-ajjajji poanineicuana oopana pea esohuicuana ehuohuijji. Jamajjeya Jesosaa jama acapoa cuana ba'a: —Eya Dejjapojji epo iñameecaje cuaa peaja equecua'yojji. Jamatii tres cahuime huiso poajo eya shequimeecaje'yo— jamaya poa Jesosa.
32O shajja-ajjajji poanicuanaja queaquehuatii poa oja esohui. Jamajojoya aje queamete poa cuana o huohuiajja'yojji majoya.
Jesosaa huohuicapoa cuana ache dejja ebionei nequije queaca'atii epojji
(Mt 18.1-5; Lc 9.46-48)
33Majoya aje Jesosaa Capernaúm meshi bacañaquiapoa o shajja-ajjajji poanicuananijjetii. Oja equiyasijje nobiquiñaqui'yomajje Jesosaa huohuiajjacapoa cuana jama ba'a: —Jiquiacua poe'yani quiana ejeojjijje, ¿ajeo shai jjamimicuiajeanobiaquinaje miquianaya oopana?—
34O shajja-ajjajji poanicuana ca Jesosa saja-ajjima poa oya mimimimijebe'yapoa ache queaca'a ebionei etii nequije ebajjijo. Jamajjeya queabicho poa cuana Jesosa saja-ajji. 35Jamajjeya Jesosaa anioquemajje oja babaca 12 huisome dejjacuana iyaacapoa o aniyasijje ehuohuijji. Jama huohuime acapoa ba'a: —Cua queaca'a ebionei etii epojji nequisapoani dejja oyaneitii queaca'a pojjeama jjabaquicajji. Jiquio ecua dejjaa asahuacani cuana jamatii sosema' jama pea-ai ojaya peacuana acapoquijji.—
36Majoya Jesosaa oe esho'i nequimeecapoa oja babaca dejjacuana aniyiyesamaneijo. Esho'i mapamajje Jesosaa jama acapoa cuana ba'a: 37—Ojjaña joya jiquio dejjasho'i queapame ja'ajjequijji poani ecuea bajjanijo, eya pea-ai queapame ohuaya ja'acajjequiani. E queapame ja'ajjequijji poanicuaa e huoojeajji epo pea-ai queapame ja'acajjequije.—
¿Ache acuae Jesosaja epeejjicuana poani?
(Mt 10.42; Lc 9.49-50)
38Majoya aje Juan jama poa Jesosanijje ba'a: —Esohuihuohuijji Jesosa, ecuaaya pea dejja banaje. Ohuaya miquea bajjanijo eshahuamasecuana huoojeacuayajeameeca'yani. Oya pea, esenijje nequiajja. Jamajjeya ecuaaya oya eshahuamase huoojeacuayajeamee'yojjima anaje.—
39Jesosaa saja-acapoa cuana jama ba'a: —¡Chojja, a'a jama ameejjima ajji! Ohuaya queapame apea-aicani. Jamajjeya joya ecuea bajjanijo dejjaja ajjima'neineicuana ohua acani, queapame ohuaya apea-aicani. Quijje oya ejo ejjaniñebaquijji pojjeama poaje. 40Jamajjeya joya esejo jjaniñebaquiajja poanicuana comacuanaya ese chacosahuajji poani. 41Ojjaña joya enahuoe bisonei canecojo nequi quiajji poaje Quito shajja-ajjajji poanija eishijji comaaya jjeshecaje Eyacuiñajjija quia o queapame poanaje sosejje.— Jamaya huohuicapoa cuana Jesosaa.
Peacuana queamimishi pomeeca-ajja
(Mt 18.6-9; Lc 17.1-2)
42Jesosaa huohuipea-aicapoa cuana jama ba'a: —Ojjaña joya ecuea epeejji ca'a-ama eyacua ejo ejjashahuabaqui'yo queamimishi pomeesapojjicuana comaya canaajeyocahua mei-aijo bae-ai enaojjo queadoeneeyasijje edojonobiajeameequi'yojji ohua o queamimishi epomeeca cuahuajo. Jamaya queapame pome ojaya pea queamimishi pomeejjima yajji, Eyacuiñajjija oya queaneeneetii pomee'yojjima yajji. 43-44Mique emeya miya queamimishitii pomeecanijo jjamejajasejjajeaquicue. Majoya quijje miya queapame poqui'yome Eyahuasijje jamatii mehuojja nequi. Queapame pojjeama mi po'yome Cuaqui-ai quijjo'yoajja jaahuasijje mejjitii nequi. 45-46Mique ejeojjiya miya queamimishitii pomeecanijo jajasejjajeacue miquea ejeojji. Majoya quijje mi queapame poqui'yome Eyahuasijje jamatii jeojjihuojja nequi. Queapame pojjeama mi po'yome Cuaqui-aiyasijje jeojjiñatii nequi. 47Oya jayojja miya miquea ecojjaa queamimishitii pomeecani jjabaquimajje jjacojjacajjajeaquicue. Majoya miya quijje queapame poqui'yome Eyacuiñajjiya ojjañacuana huoojeacapoquiani meshi Eyahuasijje jamatii cojjamiji oe nequi. Queapame pojjeama mi po'yome Cuaqui-aiyasijje ejeajea'yo nequi jamatii cojjabecatii. 48Cuamaya Cuaqui-aijo soso mano'yoajjaneinei, cuaquijiji pea-ai quijjo'yoajjaneineitii jijiqui.
49Cuaquijijiya ojjaña meshijo ba'ecacuana queaja'anee jjabameequicaje achajja oya ba'epoquinaje. 50Sane queapame bobi shicuijji. Sane jjaseseamaquiajo, ¿yajja acajji oya queasese epo-o'oyajji? Yajjapishana de, peajja po'yonaje. Jamajjeya ecuea epeejjicuana sane queasese jama pocue. Queabihui queneama ba'epoquicue peacuananijje pea-ai.—
Επιλέχθηκαν προς το παρόν:
MARCOS 9: ESE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Mision Nuevas Tribus, 2006