MARCOS 7
7
Etiiquianaja esohuicuana
(Mt 15.1-20)
1Majoya aje quijje fariseo dejjacuana pea Moisesja tehuehuohuijji poanicuana pea-ai Jerusalén meshijo ani ojee poeapoa Jesosa baa. 2Beca Jesosa shajja-ajjajji poanicuaa oja eme shacuajjimahuajo bobi jamatii ijjiacani bacapoa fariseo dejjacuaa. Jamajjeya oja etiiquianaja esohui jayojja mi-acanijo niñebacapoa cuaa. 3Fariseocuaa ojjaña judiocuaa pea-ai bobi ijjiajjimahuajo oja eme oja etiiquianaja esohui jayojjaya shacuacapoquianinaje. Oja etiiquianaja esohui shahuabacapoquianinajetii. 4Judiocuana bobiquiajji equicuana acaniyasijje poqui poe'yomajje jamatii ijjiaijjiaña'yoajja poa. Ebionei eme shacuacapoa cuaa oja etiiquianaja esohui jayojjaya. Queahuiso oja etiiquiaa esohui huohuicaninaje achajja shacuacajji oja oñacuana, enanequijjicuana, platocuana pea-ai ojaya etiiquianaja esohui jayojja eapoquiajji. Jamajjeya Jesosa shajja-ajjajji poanicuana jama mipopoajo fariseocuana queaquene poa onijje. 5Majoya fariseo dejjacuaa pea etii poanicuaa pea-ai Jesosa huohuiajjacapoa jama ba'a: —¿Yajjajje shai mi shajja-ajjajji poanicuana eseja etiiquianaja esohuicuana achajja ba'ecajji shahuaba'yoajja? Bobi ijjiajjimahuajo oja eme shacua-ajja, eseja etiiquianaja esohui jama po-ajja oya.—
6Jesosaa saja-acapoa cuana jama ba'a: —Yahuajonei esohuihuohuijji Isaías dejjaa esohui queaja'a huohuicapoa Eyacuiñajjija epeejjinisho poanicuanajo, miquianajo. Ohuaya tehuecapoa jama ba'a:
“Jiquiocuiñajjicuaa oja enabaa eya bihuiacani
jamatii ojaya esohuiquipajje eya cajaa acani,
quea-ehueshatii jayojja nequipoquiani.
7Jamatiiya ohuaya eya bihuiacani e'ejojonei pojjeama poaniya.
Jiquio ohua huohuicani esohuicuana ecuea esohui anishocani jamatii ojayaneitii ejjashahuabaquijji poani.”
Jama tehuemeya Isaiasya acapoa yajja Eyacuiñajji poani miquianajo. 8Jama pea-aiya quiana poani. Miquiaaya esohui e'ejojonei Eyacuiñajjija cajaa aña miquianajanei esohui eapoquiajji.—
9Jesosa jama poa pea-ai onijje ba'a: —Miquiaaya miquianaja etiiquianaja esohui shahuabapoquiaña, jiquio Eyacuiñajjija esohuinei ca pajea'yaña. 10Yahuajonei Moisesya jama huohuime acapoa jama ba'a: “Mique chii mique nae pea-ai queapame apoquiacue, oja esohuijo jjashajja-ajjaquipoquicue. Joya oja chiijo queatainee mimiani cuana oja naejo pea-ai cajajahuejjajeaca'yahua cuaa oja mimishijo.” 11-12Jamatii quiaa peacuana huohuitaiaña jama ba'a: “Dejjacuaa oja chii, oja nae pea-ai jama huohuime acajji ba'a: Ecue chii, jjeya ecuea miya eba'emeesahuajji pojjeama ecuea aquianacuana Eyacuiñajji quiajji huohuinaje. Jamajjeya ecuea chama' mi quiajji.” Ojjaña joya jama mimime poanicuanaja oja chii, oja nae pea-ai eba'emeesahuajji pojjeama poaje miquianaja huohuijo jamatii Eyacuiñajjija esohui etehue jama poani oya queapame apoquiacue. Jamaya miquiaaya huohuitaiaña cuana. 13Jamajojoya aje quiaa Eyacuiñajjija esohui cajaa aña miquianaja etiiquianaja esohuineitii eshahuapoquiajji. Queahuiso miquianajanei esohui huohuipoquiaña cuana, Eyacuiñajjija esohuinei pojjeama.—
14Majo aniya Jesosaa dejjacuana iyaacapoa esohui huohuijji. Jama huohuime acapoa ba'a: —Shajja-ajjaneineicue jiquio eya miquiana huohuije esohui queaja'a miquianaja epojji. 15-16Joya ojjaña dejjacuanaja enabajje nobiquiani bobicuana cua ohua ijjiacani majo pojjeama Eyacuiñajjiya oya queamimishi poani bacani. Joya ojjaña dejjacuanaja enabajje cuayaquiani esohui queataicuana caca oe queamimishi. Ma esohuicuanajoya Eyacuiñajjiya oya bacani queamimishi poani— jamaya poa.
17Majoya Jesosa ojo ejjachichaqui anicacuana jiña'yomajje nobiquiapoa equiyasijje. O shajja-ajjajji poanicuaa Jesosa huohuiajjacapoa oja ehuohui esohuijo yajja poanijje shai ojaya queaquehua poajojoya. 18Jamajjeya Jesosaa jama acapoa cuana ba'a: —De, ¿a'a miquianaja pea-aiya queaquehua jiquio esohui eya huohuiaña? ¿A'a quianaja bajjima bobiya pojjeama quiana queamimishi pomeecani? 19Bobi caca esapadojjohuasijje nobiquiajja miquiana queamimishi pomeejji. Bobicuana caca see-aiyasijje nobiquiani majoya quiaa quijje seejea'yaña.— Jamaya Jesosaa huohuicapoa cuana bobijo ojjaña bobicuana queapame eijjiapoquiajjijo, queamimishi pomeejji pojjeamajo.
20Jesosa jama poa pea-ai ba'a: —Joya queaquehua jjashahuabaquiani oja sapadojjojje comaya caca queamimishi poani. Oja eyamineiya oya queamimishi pomeecani. 21Eyamiquipajje, esapadojjojje ebionei queaquehua jjashahuabaquiani cuana. Majoya queaquehua jjashahuabaquimajje queamimishi poani, pea epona cojjocani, pea quecuaca'yani, aquiana siicani pea-ai. Oja eyamineijotii queamimishi poani. 22Dejjacuana, eponacuana pea-ai oja esapadojjojje queaquehua jjashahuabaquimajje dejjaa peaja ehuanase cojjocani, epona peaja yahuejo jjacojjomeequiani, peaja aquianacuana jeabacani, queamase poani, peacuana dasiacani, oya huoomajamajani, peacuana botiamanei poani o jayojja posapoanijjejojoya, peacuanajo jjaniñebaquiani queahuesha, oyanei queaca'a poani poso jjabaquiani, peacuana dasiacani pea-ai. Jamaya poani queamimishi epojji. 23Jamajjeya ojjaña jiquio mimishicuana dejjacuanaja eponacuanaja yamineijo nequiani. Majoya oya queaquehua jjashahuabaquimajje queamimishi poani.— Jama huohuime acapoa cuana Jesosaa.
Oe epona jaajji pea Jesosajo jjashahuabaqui'yapoa
(Mt 15.21-28)
24Majoya aje Jesosa poquiapoa pea meshiyasijje, provincia Tiro bajjani meshiyasijje. Macuiñajjicuanaja oya bajjima nisho yajji Jesosa oe equiyasijje quehuanobiajjaquiñaquiapoa. 25Jesosa ma equijo ani shajja-ajjamajje oe epona poquicuajiapoa o baa. Oja bacuase shahuamase yamijji aniapoa jamajjeya Jesosa ani cojjaneijo epona oja ecuioshajjajo nequioqueñaquiapoa o huohuiajjaneijji oja bacuasejo. 26Ma epona jaajji pea poa, judío epona pojjeama. Oya sirofeniciacuiñajji epona poa. Ohuaya Jesosa huohuiajjaneicañaquiapoa oja bacuasejo Jesosaja eshahuamase oja yamijo nequi ehuoojeacuayajeamee'yojjijo. 27Jesosaa ca oya jama acapoa ba'a: —Ebacuaneicuana ebionei caijjiaijjiasahua. Queapame pojjeama ebacuaja pahui ejjeshe'yojji iñahuehuacuana quia'yojji.—#7.27 Nota: Yahuajonei judiocuaa peajaajjicuana bacapoa peajja jayojja iñahuehua jayojja. Jamajojoya aje oyanei Eyacuiñajjija queajeanee poso jjabaquiapoa, peajaajji ca ojaya botiama poso acapoa judiocuaa.*
28Ma eponaa Jesosa saja-acapoa jama ba'a: —Jamatii iñahuehuacuaa bobishaa ijjiacapoqui'yani equimeseja mesajo ani oquequi.—
29Oya jama poajo Jesosaa epona jama acapoa ba'a: —Queaja'anee miya miminaje. Ee, poqui'yocue. Eshahuamase mique bacuaseja eyamijo nequi cuayaqui'yonaje.—
30Majoya aje eponaa oja equiyasijje poqui'yomajje oja bacuase bacañaqui'yapoa oja peeibiajje jaa eshahuamase yamima'yo, queapame'yo jaa.
Jesosaa dejja mimiajja, shajjaqueba queaja'a jjashajja-ajjameequicapoa, mimimeecapoa pea-ai
31Majoya aje quijje Jesosa provincia Tiro meshijo nequi poquio'oyapoa Decápolis meshiyasijje. Ohuaya Sidón meshi pea meshicuana pea-ai yejjemajje Galilea bae bacañaquiapoa. 32Jesosa baesahuajo nequi oe dejja mimiajja shajjaqueba yecapoa cuaa oque. Ma o yejji poanajecuaa Jesosa huohuiajjaneicapoa oja o napajjijo emeya o queaja'a jjashajja-ajjameequijjijo. 33Jesosaa dejja mimiajja shajjaqueba jjequishiñacapoa ona ejjachichaqui nequicajo. Majoya dejjaja shajjahuejja huoshocapoa oja emeya. Oja eme cuichomajje dejjaja yana iñapepacapoa pea-ai. 34Jesosa eyahuasijje jjabajeasohuaquimajje jjajjeanajeaquiapoa. Majoya dejja huohuicapoa jama ba'a: —Efata.— Jama poanijje ba'a: —Mimicue queaja'a, jjashajja-ajjaquicue pea-ai.—
35Jesosa jama pojeahuajo dejja jjashajja-ajjaquinanapoa. Oja yana queapame ponanapoa, queaja'a mimiapoa pea-ai. 36Majoya Jesosaa ojjaña o queaja'a mimije bajji poanicuana huohuicapoa pea oja huohuijjima yajjijo. Jamatii queahuisocuana huohuicapoqui'yapoa cuaa Jesosajo. 37Jamajjeya queahuisocuana jjabaneineiquiapoa Jesosajo. Esohui queapame acapoa ojo jama ba'a: —De, Jesosaa ojjaña queapame acapoquiani. Ohuaya shajjaquebacuana jjashajja-ajjameequicani, mimiajjacuana pea-ai queaja'a mimimeecani.—
Επιλέχθηκαν προς το παρόν:
MARCOS 7: ESE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Mision Nuevas Tribus, 2006