MARCOS 6
6
Jesosa oja meshineijo pueblo Nazaretjo nequiapoa
(Mt 13.53-58; Lc 4.16-30)
1Majoya aje Jesosa poquio'oyapoa oja meshinei pueblo Nazaretyasijje o shajja-ajjajji poanicuananijjetii. 2Judiocuanaja equi-ai ejjachichaquijji aniyasijje Jesosa poquiapoa majo anica sohuihuohuiya ejomishocajji sábado epojjajo. Ma equi-aijo ejjachichaqui anicacuana Jesosaa queaja'anee huohuicani shajja-ajjamajje jama mimime poa cuana ojo ba'a: —De, ¿achejo oja bajo ohuaya esohui queahuiso eseya queaja'a huohuicani? ¿Ajea huohuijo shai ohuaya queaja'a esohui huohuicani eseya? ¿Acheya shai oya dejjaja ajjima'neineicuana ameecani? 3Jiquio nequi dejja acuicacajjija bacuaejja, María oja nae. Oja chahuacuana Santiago, José, Simón, Judas pea-ai. Oja jjo'icuana esenijje pea-aiya ba'e.— Jamajojoya aje Jesosa onijjejaajji pea-ai posojojoya cajaa oya acapoa cuaa.
4Oja meshijo ba'ecacuana jama mimime poani ojo shajja-ajjamajje Jesosaa jama acapoa cuana ba'a: —Cua Eyacuiñajjija esohuihuohuijji poanicuana poquije meshicuanahuasijje majo ba'ecaa oya shajja-ajjacaje, queapame ja'acajjequije pea-ai. Onijjejaajjinei oja meshijo ba'ecacuana, oja huapa pojjeamacuana pea-ai caca o shajja-ajjasapo-ajjanei poaje— jamaya acapoa Jesosaa.
5Jamajojoya aje oja meshijo ba'ecacuana jama queaquehua jjashahuabaquime poajo Jesosaa dejjaja ajjima'neineicuana queahuiso mi-acapoa oja meshineijo. Oepojjinei emanocuana jja-ajameequica'yapoa ona o sapo-ajjanei poanijojoya. 6Onijjejaajjineicuana oja esohuijo mijjashahuabaquica'yajo Jesosa queayeno jjabaneineiquiapoa ojo.
Jesosaa o shajja-ajjajji poanicuana huoojeacapoa peajaajjicuana sohuihuohuiya
(Mt 10.5-15; Lc 9.1-6)
Jamajjeya Jesosa pea meshicuanahuasijje poquinequiapoa ona sohuihuohuiya o shajja-ajjajji poanicuananijjetii. 7Majoya Jesosaa babacacapoa 12 huisome o shajja-ajjajji dejjacuana ona sohuihuohuiquinequijji epojji. Beca oja babaca, pea beca oja babaca huoojeacapoquiapoa pea meshicuanahuasijje. Eshahuamasecuana cuayajeameequi'yojji epojji pea-ai Jesosaa huoojeacapoa cuana. 8Jesosaa huohuicapoa cuana jamatii epoquijjijo aquianama', bolsa aquiana biojji, pahui, bejjo pea-ai dojoca-ajja. Acui o jjaquecuaca'aquijjinei caca oe che dojomeecapoa cuana. 9Jeojjishejeenei huoshocajji ejeojjijje epoquijji huohuicapoa. Oja eyamijonei ba'e daquijjinei epoquijjijo huohuicapoa. 10O poquijji Jesosaa jama huohuime acapoa cuana ba'a: —Miquianaya pea meshijo nequicaja equiyasijje nobiquimajje majotiiya aniñaquicue so'o onijjetii. A'a peacuanaja equiyasijje anipoquijji ma meshijo aniya. Majoya aje quijje mi poquije peaja meshiyasijje oe equijotii aniñaquicue. 11Ma meshijo ba'ecacuaa quiana cajaa acajje miquea esohui shajja-ajjasapo-ajjajjejojo, ¡a'a ma meshijo nequitiijji! Poqui'yomajje meshipohui mique ejeojjijo ani cuia-iyajajeana'yocue macuiñajjicuana jjabaquijji oya shajjama'nei jayojja poani.— Jamaya Jesosaa huohuicapoa cuana.
12Majoya aje Jesosaja babaca dejjacuana poquicapoa peajaajjicuanahuasijje ona sohuihuohuiquiya ona pea jjashahuabaquimee'yohua Eyacuiñajjijo. 13Eshahuamasecuana dejjacuanaja yamijo nequi huoojeacuayajeaca'yapoa pea-ai. Emano jaacuana eseiya shamajje jja-ajameequica'yapoa cuana oja babacacuaa.
Juan ma ona iñajeanobiajji ponequinaje dejja mano'yapoa
(Mt 14.1-12; Lc 9.7-9)
14Galilea meshimeseya Herodes bajjaniya shajja-ajjacapoa Jesosaa queahuiso dejjaja ajjima'neineicuana ohua acapoquije. Queahuisocuana Jesosajo queapamenee mimipoquiani shajja-ajjacapoa Herodesya jama ba'a: —¡De Juan, ona iñajeanobiajji ponequinaje dejja shequi'yonaje! Jamajjeya ohuaya dejjaja ajjima'neineicuana acani queaca'anee poaniyajjejojo.— Jamaya Jesosajo mimiapoa cuana.
15Peacuana ca jama poa Jesosajo ba'a: —¡Chojja de! Oya pojja'a ca Elías bajjani ma emano'yo Eyacuiñajjija esohuihuohuijji poa dejjaya pojja'a.—
Pea dejjacuana ca jama poa Jesosajo ba'a: —Oya pojja'a ca ma yahuajo esohuihuohuijji nequiapoa mano'yoya shequi'yonaje.—
16Herodesya ona jama poani shajja-ajjamajje jama acapoa cuana ba'a: —¡Chojja de! Oya ca Juan, ma eya piqui jajasejjajeamee'yonaje dejja. Jjeya oya shequi'yonaje pojja'a.—
17-18Yahuajo Herodesya Juan jeanobiameecapoa. Herodesya oja dohue Felipe bajjanija ehuanase Herodías bajjani epona huanaca'yapoa. O jama poaje shajja-ajjamajje Juanya Herodes huohuimajamajacapoa jama ba'a: —¡Queapame pojjeama mique chahuaja ehuanase ehuana'yojji!— Jamajjeya emeshimese Herodesya Juan iñameecapoa ejeanobiameejji ohua esohui ojo jama amajamajacajo.
19-20Herodías eponaa Juan botiamanei acapoa oja esohuijo. Jamajojoya aje ohuaya Juan quecuamee'yosa-acapoa. Jamatii oja ahuea'yo Herodesya quecuamee'yojjima acapoa ojaya Juan queapame nequiani ebajojoya. Herodes Juanja esohui queaja'a shajja-ajjamajamajasapoa. Jamatii shajja-ajjamajje oya queayenopishana poa oja esohui jayojja asapo-ajja poajjejojo. 21Majoya aje quijje Herodías jjashahuabaquiapoa Juan onaja manomee'yojjijo. Emeshimese Herodesya o cuayajji epo epojja poe'yajo fiesta acapoa. Ohuaya iyaacapoa dejjacuana etii poani oja nequimee, oja soldadohuohuijji poani etiicuana pea-ai, oja meshijo dejja quea-aquianahuiso poanicuana pea-ai ojee onijje eijjijaijjiajji. 22Ojjañacuana ijjiaijjianijo Herodiasja bacuase oenei majamajanequiapoa ojjaña oja iyaacuanaja oya ebajji. Herodes ma onijje ijjiaijjianicuana pea-ai queabihuinee poa eponasho'ijo. Jamajjeya Herodesya eponasho'i jama acapoa ba'a: —Huohuicue mo oe cua miya saña. Eyaya jjeya cua miya saña quiaje. 23Eyaya e'ejojonei esohui aña, cua miya saña eyaya miya quianeije. Miya aquiana queahuisonee sapoanijo aje mi ecuea aquianacuana quiaje— jamaya ohuaya epona huohuicapoa ojjañacuana anicajo.
24Majoya eponasho'i poquiapoa oja nae huohuiajjaa jama ba'a: —¿A'ya acuae seya huohuiajjaje ejjeshejji?—
Oja naeya oya saja-acapoa ba'a: —Juan ona iñajeanobiajji ponequinajeja sapa oe huohuiajjacue epiqui jajasejjajeamee'yojji.—
25Oja nae jama poajo eponasho'i poquicuajio'oyapoa Herodes aniyasijje. Jama ohuaya oya acañaquiapoa ba'a: —Jjeyahuanei Juan ona iñajeanobiajji poanajeja sapa quiacue mo platojo piqui jajasejjajeamee'yomajje.—
26Eponasho'iya jama acajje emeshimese Herodes queacojjayenonee ponanapoa. Ohuaya e'ejojonei oja esohui acapoa ojjaña oja iyaacuanaja eshajja-ajjajji. Jamajjeya ojaya oya chojja yajji pojjeama poa. 27Majoya aje emeshimeseya oe soldado huoojeacuajicapoa Juan piqui jajasejjajea'yohua. 28Majoya oe soldado poquiapoa Juan ejjajeanobiaquijji equi aniyasijje o piqui jajasejjajea'yohua. Oja piqui jajasejjajea'yomajje oja sapa dojocapoa platojo iya eponasho'i quiaa. Eponasho'iya oja sapa platojo ani jjeshemajje quiacapoa oja nae Herodías.
29Juan shajja-ajjajji poanajecuaa oya chama'yotii shajja-ajjamajje poquiapoa oja yami jjequi'yohua. Majoya oja yami jjequi'yomajje mojeacapoa cuaa meshiyasijje.
Jesosaa 5.000 huisome dejjacuana bobiacapoa oepojji bobijo
(Mt 14.13-21; Lc 9.10-17; Jn 6.1-14)
30Majoya aje quijje Jesosaja babaca dejjacuana ona sohuihuohuiquinequijji poani peajaajjicuana sohuihuohuiya poqui huacuaya poe'yapoa. Jesosa huohuicaña'yapoa cuaa ma oja babacacuaa sohuihuohuicanaje huisotiiya, ma oja babacacuaa acanaje huisotii pea-aiya. 31Queahuisoneecuana Jesosaque poemajamajanequiapoa, jamajjeya queacamajanee poa Jesosa oja babaca dejjacuananijje emimimimijji, bobi ijjiajji pea-ai. Jamajjeya Jesosaa oja babaca dejjacuana jama acapoa ba'a: —Ocue poeajja jocuama se-ejjama' meshiyasijje ejomishocaqui so'o.—
32Majoya Jesosa o shajja-ajjajji poanicuana pea-ai bishe'aijo ani besapoquiapoa se-ejjama' meshiyasijje. 33Jesosa oja babaca dejjacuananijje besapoquije bamajje queahuisoneecuana ma meshijo ba'ecacuana cuajicuajicapoquiapoa ma Jesosa besapoquije meshiyasijje o bañaquiya. Jesosa besapoquianijo ma meshi bacañaquiapoa cuaa o ba'eñaquijjimahuajotii. 34Jesosaa bishe'aijo aniya nequisohuaquimajje etajahuasijje epoquijji bacañaquiapoa cuana queahuisoneenee ani o ishoapoequi. Ma dejjacuana, eponacuana pea-ai Jiquio ecua ovejacuana jaahuanajjima queacamajanee nequi jama bacapoa. Jamajjeya Jesosa queayenonee jjashahuabaquiapoa macuanajo. Majoya aje Jesosaa esohui queahuiso huohuicapoa cuana. 35-36Majoya siñajo o shajja-ajjajji poanicuaa Jesosa jama acahuapoa ba'a: —¡Sinia-aje! Jiquio meshi se-ejjama'neinei. Jamajjeya jiquio ejjachichaqui anicacuana huoojea'yocue peaja meshicuanahuasijje bobi jjesheya oja bejjojo.—
37Jesosaa o shajja-ajjajji poanicuana huohuicapoa jama ba'a: —¡Chojja de! Miquiaayatii oe bobiacue jiquio anicacuana.—
Ohua jama acajje o shajja-ajjajji poanicuaa jama acapoa ba'a: —¿A'a ecuana miyaya poquimeesa-aña queahuisoneeneecuanaja eijjiajji pahui jjesheya? Queasosehuisonee pome, 200 denario huisome eso'dojjo sosejje quiacajji joya queahuisoneeneecuana ani bobiajji.—#6.37 Nota: 200 denario queasosehuisonee poa jiquio ecua 200 epojjahuiso echacojji sosejje jama.*
38Jesosaa o shajja-ajjajji poanicuana huohuiajjacapoa jama ba'a: —¿Ache huiso acuae quianaja pahui jjeya ani? Ba-ajjaquisocue.—
O shajja-ajjajji poanicuana ba-ajjaquimajje jama poña'yapoa ba'a: —¡De! Che ca oepojji cinco huisome pahui ani jjeya. Nahuoosisi ca becaneijji pea-ai jaa.—
39Majoya aje Jesosaa ojjañacuana ojo ejjachichaqui nequica anioquemeecapoa siponebiajjetii. 40Macuanaya anioqueapoa 100 huisome ejjachichaqui aniapoa, pea ca 50 huisome ejjachichaqui aniapoa. Jamaya Jesosaa anioquemeecapoa cuana, mahuisoya. 41Majoya aje Jesosa cinco huisome pahui, beca nahuoosisi pea-ai jjeshemajje eyahuasijje jjabajeasohuaquiapoa Eyacuiñajjinijje emimijji. Eyacuiñajji bobijo bihuiamajje Jesosaa pahui mijicapoa o shajja-ajjajji poanicuanaja majo anicacuana quiapoquiajji. Nahuoo pea-ai quiacapoquiapoa cuaa ma eanioque anicaja eijjiajji. 42Majoya ma eanioque anicacuaa bobi ijjiacapoa, jejjecapoa.#6.42 Nota: Jesosa shajja-ajjajji poanicuaa quiacapoquijejotii pahui, nahuoocuana pea-ai Eyacuiñajjiya jjahuisomeecuajiquicapoquiapoa ojjañacuanaja ijjiajji.* 43Majo ejjachichaqui anicacuaa ijjiajeyocajo o shajja-ajjajji poanicuaa onaja pea ijjiajeyojjima ani chichaca'yapoa eshaja-aijo. Doce huisome eshaja-ai cuatajeameecapoa majo anicacuanaja ijjiajeyojjima ani pahuiya, nahuoohua pea-ai. 44Queahuisoneeneecuaa bobi ijjiacapoa ma pojjajotiiya. Cinco mil huisome dejjacuaa ijjiacapoa.#6.44 Nota: Epona, esho'iquiana pea-ai ca sicojjima poa.*
Jesosa bae enabiajje jeojeoapoa
(Mt 14.22-27; Jn 6.16-21)
45Majoya queahuisoneecuana bobiajeyomajje Jesosaa o shajja-ajjajji poanicuana huohuicapoa eanisohuaquijji bishe'aiyasijje ojjemiji baeyasijje ebesapoquijji ebionei. Jamajjeya Jesosa oja bobiacuananijje mimiquijo ona poqui'yojjijo o shajja-ajjajji poanicuana Betsaida meshiyasijje ebesapoquijji bishe'yasijje anisohuaquiapoa. 46Jesosa dejjacuana queahuiso ojo jjachichaquiani huoojea'yomajje jaasohuaquiapoa eyiyohuasijje oja Chiinijje mimiya. 47-48Majoya aje bishe'ai baeyiyesamaneijo ba'ejo sineapoa, jjamisiquiapoa. Jesosa oenei etajajotii nequiya bacapoa o shajja-ajjajji poanicuana queacamajanee yoyome po-ajja besapoquije beni queaquemotejjee. Majoya jjapojjaquiyasijje Jesosa bae enabiajjetii jeojeonequiapoa ma o shajja-ajjajji poanicuana besapoquijeyasijje. O shajja-ajjajji besapoquijejje Jesosa ejjayejjequijji nisho poa. 49-50Majoya Jesosa queahueshapishana jeojeojebeje enabiajjetii bamajje oya Jesosa ecuiquia poso acapoa o shajja-ajjajji poanicuaa. Jamajjeya taaapoa cuana ojo queameteneenee pomajje. Jesosa jama poa ba'a: —Queaca'a pocue. ¡A'a quiana oe queamete pojji ejo! Eya ca iña quio Jesosaya.—
51Majoya aje Jesosa bishe'aiyasijje nequisohuaquiajo beni queaquemonee nequioquequinanapoa. Beni queaquemonee nequioquequije bamajje o shajja-ajjajji poanicuana jjabaneineiquiapoa ojo. 52Jesosaa queahuisoneeneecuana bobiacaje oepojjinei pahuijo bamajje jjabaneineiquiapoa cuana pea-ai ojo. Jamatii ojaya queaquehuatii poa yajjajje shai Jesosa queaca'aneetii poani dejjaja ajjima'neinei yajji.
Jesosaa Genesaret meshijo nequiya emano jaacacuana jja-ajameequica'yapoa
(Mt 14.34-36)
53Majoya aje Jesosa bae ojjemijiyasijje besapoquiapoa o shajja-ajjajji poanicuananijje. Genesaret meshiyasijje ba'eñaquimajje oja bishe' jeyocañaquiapoa cuaa. 54Jesosa bishe'aijo ani nequisohuaquiajo ma meshicuiñajjicuaa oya baca'yapoa. 55Jamajjeya Jesosa oja meshijo nequi bamajje ojjaña oja meshiyasijjeyee huohuicuajiquicapoa cuaa emano jaacacuana oja dojocuajijji Jesosaque. Cua Jesosa anije meshicuanahasijje emano jaacacuana daqui ejjequiquinijo jaa dojocapoa cuaa oja jja-ajameequi'yojji. 56Cua Jesosa poquije meshiyasijje, pueblo, aldea, se-ejjama' meshiyasijje pea-ai ma meshicuiñajjicuaa emano jaacacuana huanacapoa ejeojjisahuajo Jesosaja ebajji. Jesosa jjayejjequije bamajje oya huohuicapoa cuaa majo jaa emanocuana che oja daqui-aocuema napameejji oja emeya o Jesosaja jja-ajaquimee'yojji. Jamajjeya ojjaña joya emano jaacacuana o daqui napajji poanaje huisotiicuana jja-ajameequica'yapoa Jesosaa.
Επιλέχθηκαν προς το παρόν:
MARCOS 6: ESE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Mision Nuevas Tribus, 2006