MARCOS 5
5
Gerasa meshijo nequi oe dejja eshahuamase yamijji aniapoa
(Mt 8.28-34; Lc 8.26-39)
1Majoya aje quijje Jesosa o shajja-ajjajjicuananijje besapoquimajje ba'eñaquiapoa Gerasa meshiyasijje bae ojjemiji meshi ejeojjiyasijje. 2-3Jesosa bishe'aijo ani nequisohuaquiajo oe dejja eshahuamase yamijji jaaoquenanapoa Jesosa nequiyasijje. Oya emano'yosa' jaa chipineijo ani poeapoa Jesosa baa oya majotii ba'ejjejojoya. Oya queamaseneeneejjejojoya jjaiñameequiajjaneipoa, baajjonohua jeyocajje ohuaya jjequisejjajeacapoa pea-ai. 4Macuiñajjicuaa oja me jeyomajamaja-ajjacapoa ejeojjijje pea-ai baajjonohua. Jamatii ohuaya jjequisejjajeamajje baajjono jjequisejjaquipijeacapoa. Jamajjeya oya dejjacuanajo jjaiñameequiajjaneinei nequiapoa queaca'aneejjejojoya. 5Oya mecajje, epojjajo pea-ai poaequinequiapoa eyiyoquibojje emano'yosacuana jaa jjanicuanajje pea-ai. Oya sasia-aequinequiapoa. Jjajehuijea-aequinequiapoa meijo pea-ai. 6Majoya Jesosa queahueshapishana nequi bamajje oya cuajicuajijaaoqueapoa Jesosa nequiyasijje. Jesosa bañamajje o nequi cojjaneijo ecuioshajjajo anioqueñapoa. 7-8Jamajjeya Jesosaa eshahuamase dejjaja yamijo nequi jama acapoa ba'a: —Eshahuamase jiquio dejjaja eyamijo nequi miya cuayaqui'yocue.—
Jesosaa jama acajje eshahuamase jama taaame poa ba'a: —¡A'a e nequiyasijje poejji, Eyacuiñajji Eyajo queaca'aneetii nequija Bacuaejja! Eyaya miya huohuiajjaneineiaña, ¡a'a jjeya eya queaneenee pomee'yojji!—
9Jesosaa oya eshahuamase huohuiajjacapoa ba'a: —¿Ae bajjani miya?—
Ohuaya saja-acapoa jama ba'a: —Ecuana ca Queahuisoneenee bajjani ecuana queahuisonee poanijjejojoya.—
10Eshahuamase yamijji dejjaa Jesosa huohuiajjaneineicapoa Jesosaja eshahuamasecuana queahuesha pea meshiyasijje huoojea'yojjima yajji. 11Ma meshijo eyiyo cueihuesahuajo cuichicuana queahuiso ijjiaijjianequiapoa. 12Jamajjeya eshahuamasecuaa Jesosa huohuiajjacapoa jama ba'a: —Ecuana oja yamijo nequi huoojeacuayajea'yomajje cuichicuanaja eyamidojjohuasijje huoojeanobiacue.—
13Majoya Jesosaa eshahuamasecuana dejjaja yamijo nequi huoojeacuayajeaca'yajje cuichicuanaja eyamiyasijje nobiquinanapoa. Queahuisonee nequiapoa ma cuichicuana, 2.000 huisome poa. Majoya eshahuamasecuana cuichicuanaja eyamiyasijje nobiquiajo cuichicuana cuajicuajijaaoquequicapoa bae enaojjohuasijje. Ojjañatii cuichicuana hui'ijeaca'yapoa.
14Majoya cuichijaahuanajji poanicuana ojjaña cuichicuana hui'ijea'yonaje bamajje poquicuajiapoa ma meshijo ba'ecacuana huohuiya ma Jesosaa cuichicuana acanaje huohuiya. Jamajjeya queahuiso ma meshijo ba'ecacuana poquicananapoa dejja shahuamasecuana yamima'yo baa, cuichicuana ehui'i'yo baa pea-ai. 15Macuiñajjicuaa Jesosa nequi bañamajje dejja queahuisonee eshahuamase yamijji poanaje eanioque ani bapea-aicañapoa. Oya daquijji, queapame'yo ani bamajje queametenee poa cuana. 16Ma Jesosaa eshahuamase huoojeacuayajeacaje'yo bajji poanajecuaa onijjejaajjicuana huohuicapoa achajja Jesosaa ma dejja shahuamase yamijji shahuamase yamima' pomeeca'yonaje, oja cuichicuana queahuisoneenee hui'imeeca'yonaje pea-ai huohuicapoa. 17Jamajojoya aje Gerasacuiñajjicuaa huohuiajjamajamajacapoa Jesosa pea meshiyasijje ebesapoquicuajijea'yojji, cajaa.
18Jamajjeya Jesosa bishe'aiyasijje anisohuaquije'yo bamajje eshahuamase yamijji poanaje dejjaa Jesosa huohuiajjacapoa onijje enequipoqui'yojji nisho. 19Jesosa ca o dojobesasapo-ajja poa onijje. Jamajjeya oya jama acapoa ba'a: —Miquea equiyasijje poqui'yocue. Mique huapa pojjeamacuana, minijje ba'ecacuana pea-ai huohuiñaqui'yocue ojjaña ma Emeshimeseneiya mi acanaje huisotiiya. Emeshimeseneiya mijo queayeno pomajje miya eshahuamase yamima'yo pomeecanaje huohuiñaquipea-ai'yocue cuana.—
20Jamajjeya oya poqui'yapoa. Ebionei ohuaya pueblocuana Decápolis meshijo ba'ecacuana huohuicañaqui'yapoa ma Jesosaa o aca'yonajejo. Ohua jama huohui'yome acajje jjabaneineiquiapoa cuana ojo.
Jesosaa Jairoja bacuase shequimeeca'yapoa
(Mt 9.18-26; Lc 8.40-56)
21Majoya aje Jesosa o shajja-ajjajji poanicuananijje huacuaya besapoquio'oyapoa bae ojjemijiyasijje. O ba'eñaquiajo queahuisocuana jjachichaquicao'oyapoa oque. Jamajjeya Jesosa baesahuajotii aniapoa so'o. 22Queahuisocuana jjachichaquianijo Jesosa bajji oe dejja judiocuanaja equi-ai ejjachichaquijji etii poani, Jairo bajjani, poepea-aiapoa Jesosa baa. Jesosa nequi bañamajje oya ecuioshajjajo nequiñapoa Jesosa huohuiajjajji. 23Jama huohuiajjaneineime acapoa Jesosa ba'a: —Ecue bacuase queamanoneenee jaa, manopoqui'yani, jamajjeya poecuajicue oe ecuea equiyasijje. Mique eme ecue bacuaseja eyamibiajje huanaquicue o miquea ejja-ajameequi'yojji.—
24Majoya aje Jesosa onijjetii poquiapoa oja equiyasijje. Queahuisocuana poquipea-aicapoa onijjetii. Jamajojoya aje Jesosa cuiape'ecapoa cuaa queahuisohuajjejojo. 25Ma Jesosanijje poquicapoa queahuisocuana oe epona queamanotii poani poquipea-aiapoa. Oya 12 shequiajame huiso, queamano anipoquiapoa, najjitii. 26Eshicuijjibajji poanicuaa oya shicuiajjacapoquiapoa. Ohuaya eponaa ojjaña oja aquianacuana quiacapoquiapoa o na' huosamee'yojji sosejje nisho. Jamatii oya queamanotii anipoquiapoa, najjitii. Shicuiajjacajje oya jamatii queamanonee popoquiapoa. 27Ma eponaa najjitii poaniya shajja-ajjapea-aicapoa Jesosajo ma ona ojo mimiani. Jamajjeya oya Jesosa poquije quiijje jjanequichipiquiapoa ona ojeepejjejotii poquije. Majoya eponaa Jesosaja daqui-ao napacapoa. 28Oya jjashahuabaquiapoa equipajje jama ba'a: —Eya oja daqui-ao napamajje quea-aja poaje'yo, na' huosaje'yo.— 29Eponaa Jesosaja daqui-ao napacajeahuajo oja na' huosanana'yapoa. Majoya aje oya jjabaquiapoa quea-ajanee ponana'yonaje. 30Jesosa jjashahuabaquiapoa acheya shai ojaya daqui napacanaje o oja ejja-ajameequi'yojji. Jamajjeya Jesosa jjabajeaquiapoa ona o chipineijo nequica ehuohuiajjajji. Jama acapoa ba'a: —¿Aya ecuea daqui napacanaje?—
31O shajja-ajjajji poanicuaa Jesosa jama acapoa ba'a: —Bacue, queahuisoneecuaa miya cuiape'ejeacani ojjañamijijje. Jamajjeya, ¿apiojji jama huohuiajjame aña ba'a: “Aya ecuea daqui napacanaje?”—
32Jamatii Jesosa jjabajeaquinequiapoatii ma o daqui napajji poanaje ebajji. 33Majoya ma epona queametenee pomajje cacacacapoa. Jesosaja daqui napajeahuajo na' huosananaje'yo oya jjabaquiapoa. Jamajjeya oya Jesosa nequi cojjaneijo oja ecuioshajjajo nequiñaquiapoa o ehuohui'yojji. Eponaa Jesosa huohuijeyoca'yapoa ma o daqui napamajje na' huosa'yonajejo. 34Jesosaa oya jama acapoa ba'a: —E'e she, e'ejojonei miya ejo jjashahuabaqui'yani, jamajojoya eyaya miya na' huosamee'yonaje. Queabihuinee poqui'yocue, jja-ajaqui'yonaje mi.—
35Jesosa eponanijje mimianijotii pea dejjacuana Jairoja equijo ani poeapoa o oja bacuaponasho'ijo huohui'yohua. Jama oya acañaquiapoa cuaa ba'a: —Mique bacuapona jje ca mano'yonaje, chama'yotii. ¿Apiojji miyaya jjeya Jesosa dojoje o baa? ¡Mano'yonaje coma!—
36Jamatii Jesosa oja esohui shajja-ajjajjima jayojja amajje poquiapoa. Ohuaya dejja equi-aijo esohuihuohuijji poani Jairo bajjani jama acapoa ba'a: —¡A'a queamete pojji! ¡Miya ejoneitii jjashahuabaqui'yocue!—
37Majoya Jesosaa ma onijje anicacuana poquimeejjima acapoa Jairoja equiyasijje. Pedro, Santiago, oja chahua Juan pea-aiya caca oe Jesosaa dojocapoa mahuisoya onijje eponasho'i emano'yo jaa baa. 38Jesosaa bacañaquiapoa Jairoja equijo queahuisonee paca-ani. Queashajjaquijjonee ojjañaa iñapaca-ani bacañaquiapoa. 39Majoya Jesosa oja equiyasijje nobiquimajje jama poa ba'a: —¿Apiojji acuae quiana queashajjaquijjoneenee pame poequi so'o? ¿Apiojji acuae quiana jama pame poani? ¡Jiquio eponasho'i emano'yo pojjeama jaa, ecahui iquio jaa!—
40Oya Jesosa jama poajo soadojocapoa cuaa oja esohuijo. Ebatii poa cuanaja ma eponasho'i chama'yotii, mano'yonaje. Majoya aje Jesosaa ojjaña equijo pa-anicuana huoojeacuayacapoa esecueyasijje. Jesosa oja chiinijje, oja naenijje, ma onijje poe o shajja-ajjajji poanicuananijje pea-ai nobiquiapoa pea eyiye equecuayijjiyasijje ma eponasho'i emano'yo jaahuasijje. 41Jesosaa eponasho'i me iñamajje jama acapoa ba'a: —Talita cum.— Jama poanijje ba'a: —Eponasho'i eyaya miya huohuiaña, anisohua'yocue.—
42Ohua o jama acajeahua eponasho'i anisohuanana'yapoa. Oya 12 shequiajame huiso etii poa. Majoya oya anisohua'yomajje jeojeo'yonequiapoa. O eshe nequi ba'yomajje ojjañacuana jjabaneineiquicapoa ojo. 43Jesosaa ojjaña ma eponasho'i shequi'yonaje bajjicuana huohuineicapoa oja peacuana huohuiquijjima yajjijo. Majoya ohuaya eponasho'i bobiameeca'yapoa.
Επιλέχθηκαν προς το παρόν:
MARCOS 5: ESE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Mision Nuevas Tribus, 2006