MARCOS 4
4
Jesosaa huohuicapoa esohui ebameesahuajji eso' ejeaajajji poaje dejjajo
(Mt 13.1-9; Lc 8.4-8)
1Majoya aje quijjepishana Jesosa poquio'oyapoa baesahuahuasijje ona sohuihuohuiya. Queahuisonee jjachichaquicao'oyapoa oque. Jamajjeya Jesosa bishe'aiyasijje nequisohuaquimajje aniapoa ona sohuihuohuiya. Majo ejjachichaqui anicuana ca baesahuajotii anicapoa.
2Jesosaa esohui ebameesahuajjicuanajo huohuicapoa cuana. Jama sohuihuohuime acapoa cuana ba'a: 3—Shajja-ajjacue jiquio esohui. Oe dejja eso' jeaajajji poani poquinaje oja queyasijje eso' jeaajaa. 4Ohua eso' jeaajacajje becacuana eso' oquequinaje ejeojjiyasijje. Quijjepishana cuichojjicuaa anioquecuajimajje eso'cuana ijjiaca'yonaje ejeojjijo ejeaaja ani. 5-6Pea eso'cuana ca ohua jeaajacajje meicuana anicabiajje meshi oepojji aniyasijje oquequinaje. Majo aniya eso' pohuacuajiajja'yonaje meshi oepojji aniyasijje. Eshequi jaasohuajo epohua-ajja'yo nequi yaa'yonaje. Oja sajja nobiquijji meshi queahuiso chama' poanajejojoya yaa'yonaje. 7Pea eso'cuana jeaajacajje acuishatatasajjatejjee ani meshiyasijje oquequinaje. Majoya eso'cuana acuishatatatejjee ojee pohua'yajo acuishatataa beboca'yonaje queyaca'yonaje pea-ai. Jamajjeya oya jamatii tiinaje, jjajja-ajja poanaje. 8Pea eso'cuana ca ohua jeaajacajje oquequinaje meshi queapamenee aniyasijje. Jamajjeya pohua'yomajje queajjajjahuisonee poanaje tii'yomajje. Becacuana ecuijo ejjajja 30 huisome eso' poanaje, pea ecuicuanajo ca 60, pea ecuicuanajo ca 100 huisome eso' poanaje. Jamajjeya queapamenee jjajjanaje.
9¡Jamajjeya cua shajja-ajjasapoaniya quiaa oe jiquio esohui shajja-ajjaneineicue!— jamaya huohuicapoa Jesosaa.
Queahuisocuana Jesosajo jjashahuabaqui'yojjima poa jamatii oja esohui shajja-ajjacapoa cuaa
(Mt 13.10-17; Lc 8.9-10)
10Majoya aje quijje ma ojo ejjachichaqui anicacuana poqui'yajo Jesosa oenei nequi'yo bamajje o shajja-ajjajji poanicuaa oya huohuiajjacapoa jama ba'a: —¿Yajja poanijje shai jiquio esohui?— 11Jesosaa saja-acapoa cuana jama ba'a: —Eyacuiñajjiya miquianayanei queaja'a bameesahuacani ojaya ejjashahuabaquijjicuana ma yahuajo huohuijjima poanaje esohui, ojjañaja bajjima esohui. Ohuaya ojjañacuana huoojeacapoquianitii esohui huohuicani quiana. Jiquio peacuanaja ca Eyacuiñajjija ejjashahuabaquijjicuana ebajjitii pojjeama poaje. Jamajjeya eyaya pea esohuicuana huohuiaña cuana ojaya queaquehuatii epojji. 12Comacuaaya ecojjaa ba-ajjacani jamatii queaja'a epojji pojjeama. Eshajjaa shajja-ajjacani jamatii ojaya queaquehua poani. Jamajjeya comacuana ejjasejjaqui'yotii poani Eyacuiñajjijo. Oja mimishicuana ecuijea'yojji pojjeama poaje.—
Jesosaa esohui eso' ejeaajajjijo huohuicapoa yajja poanijje maya esohui
(Mt 13.18-23; Lc 8.11-15)
13Majoya aje Jesosaa huohuicao'oyapoa cuana jama ba'a: —¿A'a jiquio esohui eso' ejeaajajo queaquehuatii poani quianaja? Jamajjeya achajja jjabahuejjaquime quiana poaje pea esohuicuanajo jiquio esohui eso'jeaajajo queaquehuatii poani quianaja. 14Jiquio esohui eso' ejeaajajo jama poanijje ba'a: Eso'jeaajajjicuana jiquio ecua Eyacuiñajjija esohuihuohuijjicuana jama pea-aiya poani. 15Becacuana ma ecua eso' ejeojjiyasijje oquequinaje jama pea-aiya poani. Ohuaya Eyacuiñajjija esohui shajja-ajjacani. Majoya ma esohui oja sapadojjojo nequi ebionei eshahua Satanasya pajeacuajimeeca'yani. Jiquio ecua eso'cuana ejeojjiyasijje oquequinaje majoya cuichojjicuaa eso' ijjiaca'yani jama pea-aiya oya poani. 16Ma pea eso'cuana mei anicabiajje meshi oepojji aniyasijje oquequinaje joya ecua dejja, epona pea-ai Eyacuiñajjija esohui shajja-ajjamajje queabihuinee jjashahuabacuajiquiani jama. 17Majoya ohuaya Eyacuiñajjija esohui queapame oja sapadojjohuasijje nequimeejjimatii acani. Jiquio ecua meshi oepojjijo esajja nobiquijjima poani jama pea-aiya oya ba'yani. Majoya quijje oya Eyacuiñajjija esohuijo peacuaa queanee acajje, queacamajanee pomeecajje pea-ai ohuaya cajaa acuajica'yani Eyacuiñajjija esohui. 18Ma pea eso'cuana acuishatatasajjatejjee ani meshiyasijje oquequinaje joya ecua dejjacuana, eponacuana pea-ai Eyacuiñajjija esohui shajja-ajjamajje jjashahuabaqui'yani jama. 19Majoya quijje oya jiquio meshijo ani eba'epoquijji aquianajo, echacojjijo pea-ai jjashahuabamajamajaquipoquiani. Oya queabejjohuiso pomajje queabihui epoaje'yotii poso jjabaquiani ma aquianacuanajoya. Jamajjeya Eyacuiñajjija esohui oja sapadojjojo nequi pajeaca'yani ohuaya, nequimeejjimatii acani. Jiquio ecua ebanacuana acuishatatatejjee pohua'yo jjajjajjima poani, jama pea-aiya oya ba'epoquije. 20Ma pea eso'cuana meshi queapameneeyasijje oquequinaje joya ecua dejjacuana, eponacuana pea-ai Eyacuiñajjija esohui shajja-ajjamajje e'ejojonei jjashahuabaqui'yani oja esohuijo. Oya Eyacuiñajjijo queaja'a ba'epoquiani jiquio ecua ecuicuana queaso'huisonee poani, jama pea-aiya oya ba'epoquiani. Beca ecuijo tiimajje 30 eso' huisome poani, pea 60 eso' huisome poani, pea ca 100 eso' huisome poani jama pea-aiya queapame ba'epoquiani cuana— jamaya Jesosaa huohuicapoa cuana.
Pea esohui ebameesahuajji cuaquijijijo
(Lc 8.16-18)
21Majoya Jesosaa pea esohui huohuipea-aicapoa cuana jama ba'a: —¿A'a cuae quiaa cuaquijiji nequiame cajonquimejjejje miquiana jaajjiquimejjejje pea-ai nequiame? ¡Chojja de! Cuaquijiji nequiacajji eyajo mesabiajje ejeaja'anequijji. 22Jiquio ecua cuaquijijiya jeaja'acani dejjacuanaja queaja'a ebajji jama pea-aiya Eyacuiñajjiya ojjañacuana bacaje. Ojjañacuanaja mimishi cua oja huanaquehua jaa queaja'a huohuicaje'yo quijje. Cua oja iyaquehua ani pea-ai bacaje'yo cuaa queaja'a quijje oja esohui queaja'a ebajji cuanaja. Chama' queaquehuatii epojji poaje cuanaja. 23Jamajjeya joya shajja-ajjasapoaniya quiaa esohui shajja-ajjaneicue.—
24Jesosa jama pea-ai poa ba'a: —Jiquio eyaya jjeya quiana huohuiaña huisotii esohui shajja-ajjaneicue. Jiquio ecua quiaa peacuana queapame apoquiaña jama pea-aiya Eyacuiñajjiya quiana queapame apea-aicapoquije. Ohuaya quiana queapamenee acapoquije. 25Jamajjeya ojjaña joya oja esohui shajja-ajjasapoanicuana Eyacuiñajjiya queaja'a bameesahuacaje oja esohui. Joya oja esohui sapo-ajja poanicuanaja ca queaquehuaneetii ojaya esohui popoquije'yo. Joya ecua aema'neija oepojji oja aquiana peaa jjesheca'yani, jama pea-ai Eyacuiñajjija esohui sapo-ajjacuana poaje, sohuima' poaje'yo— jamaya acapoa Jesosaa.
Pea esohui ebameesahuajji eso' pohua'yanijo
26Jesosaa pea esohui huohuipea-aicapoa cuana jama ba'a: —Eyacuiñajjiya ojjañacuana huoojeacapoquianitii jiquio ecua dejjaa eso'cuana jeaajacani jama pea-aiya Eyacuiñajjiya acani oja nahue'yocuana queahuiso epomeejji. 27Joya eso'jeaajajji poani ecahui'yo jaajo o eshe anijo pea-ai oja jeaaja eso' pohua'yani mecajje epojjajo pea-aiya. Eso' pohua'yani jamatii ojaya bajjimatii achajja pohua'yome poanaje. 28Oyaneitii eso'cuana pohua'yoajja meshijo banajjima ani. Meshijo bana anijjejojo eso'cuana pohua'yani. Majoya pohua'yomajje tiiani. Tii-aomajje oya shashani. Majoya shashamajje jjajjani, queaso'huiso poani. 29Majoya eso' jahuajo sejjaca'yani cuaa o sejja'yojji ba'ijo apoa poajo. Jama Eyacuiñajjiya oja nahue'yocuana queahuiso pomeecaje.—
Pea esohui ebameesahuajji eso'bisonei mostaza bajjanijo
(Mt 13.31-32; Lc 13.18-19)
30Jesosaa pea esohui huohuipea-aicapoa jama ba'a: —¿Ae jayojja poani ma quijje Eyacuiñajjiya ojjañacuana huoojeacapoquianitiijo? 31Jiquio ecua dejjaa mostaza eso' quecuacani jama. Ojaya eso' che bisoneinei, chama' pea eso'bisonei mostaza eso' quemoajjaya poani. 32Majoya quijje pohua'yomajje queaquemonee tiipoquiani pea ebanacuana jama pojjeama. Oya quea-aonee tiiani pea acuicuana jayojja pea-ai. Quea-aahuesha tiime poani yajjanajji. Jamajjeya cuichojjicuaa eja iyacani oja aabiajje.—#4.32 Nota: Jamaya Jesosaa huohuicapoa onaja queaja'a ebajji quijje oja epeejjicuana queahuisonee poaje. Jiquio ecua eso'bisonei pohua'yomajje acui queaquemo tiiani jama pea-aiya queahuisonee Jesosaja epeejjicuana poaje.
33Jamaya Jesosaa huohuicapoa cuana esohui ebameesahuajjicuanajo. Jesosaa mahuisoya huohuicapoa joya onaja eba'ejjiijo queaja'a poani esohui. 34Esohui ebameesahuajjicuanajo oopana huohuicapoa cuana Jesosaa. Majoya aje ma ojo ejjachichaqui anica poquijeyo'yajo Jesosaa o shajja-ajjajji poanicuana queaja'a yajja poanijje oja esohuicuana huohuicapoa.
Jesosaa beni queaquemonee enashajoai pea-ai nequioquemeequicapoa
(Mt 8.23-27; Lc 8.22-25)
35Majoya aje ma pojjajotii siñajo Jesosaa o shajja-ajjajji poanicuana jama acapoa ba'a: —Cua'a ebesapoqui jocuama ojjemiji baeyasijje.—
36Jamajjeya Jesosa shajja-ajjajji poanicuana oopana nequisohuaquiapoa Jesosa ani bishe'aiyasijje onijje besapoquiya. Ma baesahuajo ejjachichaqui anicacuana jeacananapoa cuaa ebesapoquijji ojjemijiyasijje. Peacuana pea bishe'aicuanajo o quiquishijji besapoquipea-aiapoa. 37Majoya Jesosa o shajja-ajjajji poanicuananijje besapoquianijo beni queaquemonee poecuajiapoa. Enashajo queaquemonee anicuayananapoa. Jamajjeya bishe'ai nanejeacapoa cuanaja. Enashajohua cuatajeacuajicapoa bishe'ai. 38Jesosa ca bishe'aiquiijo esapajaabiajje ecahui jaapoa beni queaquemonee poequijotii. Jamajjeya o shajja-ajjajji poanicuaa queametenee pomajje Jesosa ishe'acapoa onijje emimijji. Jama poa ba'a: —Esohuihuohuijji, ¡Coya aje pajjaja se jaanobiqui'ya de! ¿A'a se jamatii hui'ijeaje'yo? ¿A'a miquea ecuana enahuejji pojjeama?—
39Jamajjeya Jesosa nequisohuapoa beni queaquemonee tecueajji. Jama tecueame acapoa ba'a: —Beni queaquemonee nequioquequicue, enashajoai nequioquepea-aiquicue.— O jama mimime pojeahuajo beni queaquemonee, enashajo pea-ai nequioquenanaquiapoa, bae nashajoma'yo ponanapoa. 40Majoya aje Jesosaa o shajja-ajjajji poanicuana jama acapoa ba'a: —¿Yajjajje acuae quiana queametenee poani? ¿A'a quiana ejo jjashahuabaqui'yojjimatii poani?—
41O shajja-ajjajji poanicuana ca queametenee poa ohua beni jama pomeecaje bamajje. Ojee mimimimiapoa cuana jama ba'a: —¿Ae dejja shai jiquio queasohuipojanee? ¡Beni queaquemonee, enashajoaicuana jjashajja-ajjaquiani oja esohuijo, nequioquenanaquinaje!—
Επιλέχθηκαν προς το παρόν:
MARCOS 4: ESE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Mision Nuevas Tribus, 2006