Yoh 18
18
Bazu bi Yesus
Mt 26,47-56; Mk 14,43-50; Lk 22,47-53
1Akòbògò nala, Yesus ayëmë zen ai bëyègè boe, ndò bëngakë a ndoṅ Kedron#18,1Kedron anë man ototoṅ a zaṅ Yerusalem ai nkol bile bi mbòn. ayat. Afub angabë hom te, ndò anyian a afub ai bëyègè boe. 2E Yudas angakuan ai nyè angabë ayëmë hom te, mbol Yesus angabë akadëga koan ete ai bëyègè boe. 3Ndò hm Yudas anganòṅ nkunda bëzimbi ya a bëfada bënen, ai bëbò bisye bëfarisea, asò ete ai ngoe, ai mëlamba, ai mëkòṅ. 4Mbol Yesus ayëmë e mam mësë mëyigi yënan ai nyè, ndò akui a nsëṅ, nyè ai bò na: Za miadzëṅ? 5Bò ai nyè na: Yesus, man Nazaret. Nyè ai bò na: Ma nyò. E Yudas akuan ai nyè nyè fë angabë atëlë ai bò. 6Eyòṅ angakad bò na, ma nyò, ndò bëngadugan ai mvus, bëkuu a si. 7Ndò adugan bò sili na: Za miadzëṅ? Bò na: Yesus, man Nazaret. 8Yesus nyè na: Mëdzo ya ai mina na ma mënë. Ngë ma hm miadzëṅ, dzogan e ba bëkë. 9Asu yë na ebug angakòbò edzalëban na: E ba ya ongavë ma, mandzëki dzèè tò mbòg ya ete. 10Simun Petrus angabë abëlë fa, ndò atie dzò, abaa dzò man olò fada-nen, ndò atsig nyè alò mbo-nnomo. Dzoe man olò angabë na Malkus. 11Yesus nyè ai Petrus na : Fudigi fa a abam. Dze yë mëbò të nyu e kòb Tara angavë ma ? 12Nkunda bëzimbi ai ndzoe waban ai bëlò bëfarisea bënòṅò Yesus, ndò bafaṅ nyè ngadag. 13Ndò batari kë ai nyè abë Annas. Ṅnyè angabë nkiè e Kaifas angabë fada-nen a mbu te. 14Kaifas te ṅnyè angavë Yuden mvulna na: layean na mod mbòg awu asu nkunda.
Petrus asie Yesus
Mt 26,69-70; Mk 14,66-68; Lk 22,55-57
15Simun Petrus ai ṅyègè mfë bëngabë toṅo Yesus ha. Ṅyègè nyò angabë ayëman ai fada-nen, ndò anganyian ai Yesus a abaa fada-nen. 16Petrus nyè aligi atëlë a mbè, a nsëṅ. Ṅyègè mbòg angabë ayëman ai fada-nen nyò akuig a nsëṅ, ndò akòbò ai e mininga ya mbè, ndò anyili Petrus a nda. 17E mininga ya mbè nyò nyè ai Petrus na: Wasë mbòg ya bëyègè bë e mod nyò a? Nyè na: Kokoa. 18Bëlò ai bëbò bisye bëngabë tëlë hala, a akoman ndoan, mbol ahëb angabë, bëngawòbò ndoan. Petrus nyè fë angabë atëlë ai bò, awòbògò ndoan.
Fada-nen asili Yesus minsili
Mt 26,59-66; Mk 14,55-64; Lk 22,66-71
19Fada-nen angasili Yesus mam bëyègè boe ai ayëgëlë die. 20Yesus nyè ai nyè na: Mëngakòbò ai bod a ngëëṅ, mëkarëga yëgëlë a nda-bikoan, mandzëki kòbò dzom ziṅ a asoe. 21Dze wasili ma? Siligi e bod bëngabë vogolo ma e dzam mëkada bò. Bayëm e mam mëngakad bò. 22Akòbò angakòbò nala, mbò bisye mbòg angabë atëlë babi hala, ndò abimi Yesus a amaṅ, nyè na: Eyë wayalan ai fada-nen na nga? 23Yesus nyè ai nyè na: Ngë mëkòbò abe, bòòlò dò. Ngë mëkòbò hm mbëṅ, a dze wayit ma? 24Ndò Annas alom nyè abë Kaifas, fada-nen, atoa mfaṅ a n ngadag. 25Simun angabë awòbògò ndoan. Bò ai nyè na: Wasë mbòg ya bëyègè boe a? Ndò asie, nyè na: Kokoa. 26Nsye fada-nen mbòg, angabë avuman ai e nyò Petrus angatsig alò, nyè na: Mandzë wa yen ai nyè a afub a? 27Petrus adugan sie; etye te, nnom-kub alòṅò.
Bakë ai Yesus abë Pilatus
Mt 27,1-2.11-14; Mk 15,1-5; Lk 23,1-5
28Ndò bakodo ai Yesus abë Kaifas, bëkëlë ai nyè a nda-mëdzo ai ndib kidi. Dzam da, bò tègè nyian a nda-mëdzo, asu yë na eboe eza kë bò a nyòl#18,28Ngë man Yuden ahë nyian a nda man haiden, eboe yakë nyè a nyòl., mbol bëyiigi di Paska. 29Ndò Pilatus angakui a nsëṅ a bëngabë, nyè ai bò na: Za sòman miasòman e mod nyò? 30Ndò bayalan na: Ngë e mod nyò atoa të ai nyè mbë mod, ngë biandzëki sòṅ ai nyè abë wa. 31Pilatus nyè ai bò na: Nòṅan nyè, midzòs nyè a mvende dzaan. Yuden bò ai nyè na: Biabëlë ki ngul ya awoe mod ziṅ. 32Asu yë na ebug Yesus angakad akyaè awu ya ayean wu etoban. 33Pilatus adugan a nda-mëdzo ete, ndò aloe Yesus, nyè ai nyè na: Yë wa onë nkukuma Yuden? 34Yesus ayalan na: Yë wadzo dò ai wamen, yë bod bëfë mbò ki bëkad wa dò atyan ai ma? 35Pilatus nyè na: Yë ma mënë man Yuden? Ayòṅ doe ai bëfada bënen bësò ai wa abë ma; Wasie za etòmò? 36Yesus nyè na: Edzoe dzama yasëki e si-ndon nyi; ngë edzoe dzama esòò a si-ndon, ngë bëlò bama bëṅyidan ana asu yë na të maku a mò më Yuden. Ndò hm, edzoe dzama yasò ki a si. 37Pilatus nyè ai nyè na: Ndë onë hm nkukuma a? Yesus nyè na: Ndò wadzo dili na mënë nkukuma. Mëngabyali etòm te, ndò fë mëngasò a si asu yë na mabòòlò bëbëla. Enyò osë asò a bëbëla awog kiṅ dzama. 38Pilatus nyè ai nyè na: Dze enë bëbëla?
Asili angasili nala, ndò adugan kui a nsëṅ a Yuden bëngabë, nyè ai bò na: Ma mayen ki nguma etòm abë nyè. 39Mbol hm anë mina tum na mëkuli mina mbog a Paska, yë miayi na mëkuli mina nkukuma Yuden? 40Bëngadugan bam, bò na: Të wakuli nyè, kuligi Barabbas. E Barabbas nyò angabë ezilgan.
Επιλέχθηκαν προς το παρόν:
Yoh 18: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.