Yoh 19
19
1Ndò Pilatus anòṅ Yesus, abòò na bëyit nyè. 2Bëzimbi bëmana tiṅ ekadi biyò, bëbede nyè dzò a nlo, bëwòman fë nyè ndzòmbò ewòman oviege, 3bëngalod nyè osu, bò na: Ovuma, a nkukuma Yuden; bëngabimi nyè a mëmaṅ. 4Ndò Pilatus adugan kui a nsëṅ, nyè ai bò na: Yënan, mazu ai mina nyè a nsëṅ, asu yë na miyëm na mayen ki etòm ziṅ abë nyè. 5Ndò Yesus akui a nsëṅ, abëgë ekadi biyò ai ewòman eviege. Nyè ai bò na: Yënan, mod te hm nyò. 6Ayen bëfada bënen ai bëbò bisye bëngayen nyè, bëngabam, bò na: A klos, a klos! Pilatus nyè ai bò na: Mina bëben, nòṅan nyè, mibomë nyè a klos. Amu ma mayen ki etòm abë nyè. 7Yuden bò ai nyè na: Bibëlë mvende, ndò, a mvende te, ayean wu, amu atele emen a etye mòn Zamba. 8Awogo Pilatus angawog e dzam di, angafëdan kòn wòṅ. 9Ndò adugan nyian a nda-mëdzo, nyè ai Yesus na: Wasòsò he? Yesus tègè nyè vë eyalan. 10Ndò hm Pilatus adzo ai nyè na: Wakalan ki ai ma nkòbò nga? Wayëm fò na mëbëlë ngul ya asoe wa ai ngul ya abomë wa a klos? 11Yesus nyè na: Ngë ngul te ebò të wa vëëban a yob, ngë wabëlë ki ngul ziṅ a nyòl dzama. Asu te, e mod akuan ai ma abë wa abëlë mod nsëm abui. 12Atarigi hala, Pilatus angadzëṅ na asoe nyè. Yuden bëngabam, bò na: Ngë ohë soe nyè, oyëmë na wasëki mvoe Kaiser. E mod osë abò emen nkukuma aluman ai Kaiser. 13Awogo Pilatus angawog e mam ma, ndò akui ai Yesus a nsëṅ, atoa nyè a etoa ntsigi ntol, e hom baloe na Lithostrotos, a nkòbò hebrea na Gabata. 14Angabë amos mëfaṅ më Paska, dzam bò a awola samëna. Nyè ai Yuden na: Nkukuma waan hm vi! 15Bëngabam, bò na: Kodogo ai nyè hala, bomo nyè a klos. Pilatus nyè ai bò na: Mëbom nkukuma waan a klos nga? Bëfada bënen bò na: Biabëlë ki nkukuma mfë hë Kaiser. 16Ndò hm Pilatus avë bò nyè na aboman a klos.
Babomë Yesus a klos.
Mt 27,32-44; Mk 15,21-32; Lk 23,26-43
Ndò hm banòṅ Yesus. 17Ndò emen abëgë klos dzie, akui e hom baloe na hom ekogëlo nlo, a nkòbò ebrea na Golgota; 18ete ngò bëngabomë nyè a klos, ndò fë babomë bod bëfë bëbè ai nyè ha, enyò mfag hi, enyò mbòg mfag mbòg, Yesus a zaṅ. 19Pilatus angatil abam, abòò na bëbaè dò a klos. Angabë ntilan na: Yesus man Nazora, nkukuma Yuden. 20Abui dzam ya Yuden bëngalaṅ abam te, amu e hom bëngabomë Yesus a klos ongabë babi ai tisòn, ndò fë abam angabë ntilan a nkòbò ebrea, ai alatan, ai grek. 21Ndò bëfada bënen bë Yuden badzo ai Pilatus na: Obë til na: Nkukuma Yuden; Tili na: angadzo na: Mënë nkukuma Yuden. 22Pilatus nyè na: E dzi mëtil ya, mëtil ya. 23Eyòṅ bëzimbi bëngabomë Yesus a klos, ndò banòṅ biwòman bie, bëbòò ngab enyii, anë man bëzimbi ngab dzia, ai edud. Edud dzi engabë nguma, tègè ai ekudëga; 24Ndò badzo na: Të bianyab dzò; ṅdoan abia, biyen e mod akyëbë ai dzò. Asu yë na ntilan otoban na: Bëngakaban ma biyie a bò bò, bëdòò abia ai edud dzama#19,24Sal.22,18. Bëzimbi mbò bëngabò nala. 25Nyia woe, ai manyaṅ nyia, Maria nga Klopas ai Maria ya Magdala bëngabë bëtëlë babi ai klos Yesus. 26Ayen Yesus angayen nyia ai ṅyègè adiṅi atëlë babi, nyè ai nyia na: A mininga, nyò mòn nyòlò. 27Asò hm dzo ai ṅyègè na: Nyoa nyòlò. Atarigi awola te, ndò ṅyègè anganòṅ nyè a biwoge bie#19,27Eyòṅ ziṅ na hala te Yosef awu ya. Biwoge bie biatyan ha na a mëndie moe..
Awu Yesus
Mt 27,45-56; Mk 15,33-41; Lk 23,44-49
28A mvus hala, mbol Yesus ayëmë na mësë mëman ya, asu yë na ntilan odzalëban, nyè na: Mawog ekode. 29Ndëg engabë etëlë hala ai saṅ wayn a tuud. Ndò badu anya ete, bëfana a engëṅ, bëkèè nyè na anyu. 30Eyòṅ Yesus anganòṅ saṅ wayn, nyè na: aman ya. Ndò angalui nlo, asuu ṅhëbë#19,30Biadzo a nkòbò Bëti na mod asuu ṅhëbë eyòṅ awu, dzam da ebug ya Yohannes abëlan ai dzò ha enë na Yesus avë ṅhëbë, nala watyan na avë e bod bësë ya bayëbë nyè Mfufub Ṅhëbë, nala onë na awu die ndò lavë bod Nsisim Zamba, asu te ndò « avë ṅhëbë »..
Balum Yesus akòṅ a mviè
31Mbol hm engabë mëfaṅ më Paska, asu yë na të mimbim miakanga a klos a sabbat, amos sabbat te wa ongabë anen, ndò Yuden basili Pilatus na bëbug bò mëkol#19,31Eyòṅ babug e mod akëlë a klos mëkol, mod te awu avol avol., bëvaè bò. 32Bëzimbi bësòò, bëbugu e mod osu mëkol, ai e nyò mbòg a bëngabë bëbomo ai nyè a klos. 33Eyòṅ bëngakui abë Yesus, bëntala na awu ya, ndò bandzëki nyè bug mëkol, 34dzam da, ndò man bëzimbi mbòg angadzii nyè akòṅ a mviè; etye etye, mëki ai mëndim#19,34Mëki më Yesus masoeban a si asu akode dan. Mëndim mawòbò bia, mëvaaga minsëm, mëtoa fë mëndim ya bianyu amu biawog ekode na binë a nkod-nnam etòm minsëm mian. bingakui. 35E mod angayen angabòòlò, ndò fë mbòòlan woe onë bëbëla, ndò ayëm na akòbò bëbëla, asu yë na mina fë miyëbë. 36Amu, angayënan nala asu yë na ntilan otoban na: Eves yangâbugi ki nyè#19,36Mb.12,46. Sal.34,20. 37Ndò fë ntilan mfë wadzo na: Bayi fòmbò e nyò ya bëngatubulu#19,37Zak.12,10.
Edzëb-mbim Yesus
Mt 27,57-61; Mk 15,42-47; Lk 23,50-56
38A mvus hala, ndò Yosef ya Arimatea, ya angabë ṅyègè Yesus a asoe, ai e wòṅ a mbarëga Yuden, akë dzaè Pilatus na afami mbim Yesus a klos. Ndò azu kë vaè mbim woe. 39Nikodemus ya angasò abë Yesus ai alu, nyè fë asò ai mira, ai mëkëmëdë më zëg dzam bò kila mëwom mëtan. 40Ndò banòṅ mbim Yesus, bëmana wa wòbò ai e byem bianyum mbëṅ, akyaè tum Yuden enë a badzëb bod. 41E hom bëngabomë nyè a klos, afub angabë ete, sòṅ etoa ete, hala babë ki dzëb mod ziṅ ete. 42Ete ngò bëngadzëb Yesus, mbol sòṅ engabë babi, mëfaṅ më abog Yuden mëtoa fë.
Επιλέχθηκαν προς το παρόν:
Yoh 19: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.