Yoh 17
17
Ngogëlan Yesus
1Amana angamana kòbò e mam ma, ndò Yesus angabede mis a yob, nyè na#17,1Ngogëlan Yesus osusua yë na atuni emen.: A Tara, awola asò ya. Vaa nyò mòn duma, asu yë na nyò mòn avë wa duma, 2akyaè ya ongavë nyè ngul a ekokoma esë, asu yë na, e dzi esë ongavë nyè, avë dzò enyiṅ kòm. 3Enyiṅ kòm dzò enë na bëyëm wa, Zamba mbòg ai bëbëla, ai e nyò ongalom, Yesus Kristus. 4Mëngavë wa duma a si, ai mkpaèn mëngakpaèn esye ongavë ma na mëbò. 5Ndò hm, etoa dzi, wamen, a Tara, vaa ma duma, e kan mëngabë mëbëlë a mgbag dzoe osusua yë na si yazu bò. 6E bod ongavë ma a si-ndon, mëngakulan bò dzoe doe. Bëngabë emboe, ndò ongavë ma bò, ndò bëngabaala ebug dzoe. 7Etoa dzi, bayëm na, e bi bisë ongavë ma, biasò abë wa. 8Amu e mëbende ongavë ma, mëngavë bò, ndò bò bëngayëbë, bëyëmë fë bëbëla na, bingasò abë wa, bëyëbë fë na wa ongalom ma. 9Ma, makogëlan asu daban, së ki asu si-ndon ngò makogëlan, hë da asu eba ongavë ma, amu bënë emboe, 10ndò ebi bisë biawoge ai ma biawoge ai wa, embie bitoa embiama, ndò mëngavëëban olugu abë bò. 11Ndò hm, masëki fë a si-ndon; mfa waban, bënë a si-ndon; ma, mazu abë wa. A Tara ya onë mfufub, baala bò a dzoe doe ya ongavë ma, asu yë na bëbò dzom dzidzia anë bia. 12Eyòṅ mëngabë ai bò, mëbaala bò a dzoe doe ya ongavë ma, mëkalëga fë bò, ndò mod ziṅ ya abë bò andzëki dzaṅ, sësala hë mòn ndzaṅ-kòm, asu yë na Ntilan odzalëban. 13Eyòṅ hm dzi, mazu abë wa, ndò makòbò e mam ma a si-ndon mu, asu yë na mintag miama midzie abë bò. 14Ma mëngavë bò ebug dzoe, ndò emò minlaṅ yafëm bò, amu basëki bod ya si-ndon, akyaè fë masëki mod ya si-ndon. 15Makogëlan ki na ovaè bò a si-ndon, dzam da, asu yë na okaman ai bò abë Mbe. 16Basëki bod ya si-ndon e kan ma masëki mod ya si-ndon. 17Fubugu bò a bëbëla: Ebug dzoe enë bëbëla. 18E kan ongalom ma a si-ndon, ma mëngalom bò a si-ndon, 19ndò mafubu mamen, asu yë na bò bëbò mfuban a bëbëla. 20Së hm ki asu daban etam ngò makogëlan, makogëlan fë asu e ba bayëbë ma a ebug dzaban a yob, 21asu yë na bësë bëbò dzom dzia, anë wa, a Tara, onë abë ma, ma abë wa; asu yë na bëtòbò abë bia, si-ndon eyëbë na wa ongalom ma. 22Mfag wama, e duma ongavë ma, mëngavë bò dò, asu yë na bëbò dzom dzia anë binë dzom dzia: 23ma abë bò, wa ki abë ma, asu yë na bëtoan fò bò dzom dzia, si-ndon ezu hm yëm na wa ongalom ma, ai na ongadiṅ bò anë ongadiṅ ma. 24A Tara, e dzi ongavë ma, mayi na, e hom mënë, bò fë bëtòbò ai ma, asu yë na bëyen e duma dama ya ongavë ma, amu ongadiṅ ma osusua akomo-lë-yob ai si. 25A Tara ya onë sosoo, si-ndon endzëki wa yëm, hë da ma mëngayëm wa, ndò bëngayëm na wa ongalom ma. 26Mëngabò na bëyëm dzoe doe ndò fë mayi kë ai nala osu, asu yë na ediṅ ya ongadiṅ ma ebò abë ma, ma fë abë bò.
Επιλέχθηκαν προς το παρόν:
Yoh 17: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.