Yoh 16
16
1Mëngakad mina e mam ma asu yë na të miakam. 2Bayi mina tsidan a mënda-bikoan. Ndò fë awola lazu, a e mod osë awoe mina ayi tsog na avë Zamba mëtunëṅa. 3Ndò bayi bò mam mëtë amu bandzëki yëm tò Tara, tò ma. 4Ndò hm mëngakad mina e mam ma asu yë na eyòṅ awola daban layi zu, midugan tsog na mëngakad mina. Mandzëki mina kad mam mëte atarigi a mëtari, amu mëngabë ai mina. 5Etoa dzi, mazu kë abë e nyò angalom ma, ndò tò mod mbòg ya abë mina asilisili ki ma na: Eyë wakë ve? 6Dzam da, mbol mëkad mina mam mëte, ndò mëlunga mëdzie mina a minnëm. 7Ma makad mina bëbëla; anë mbëṅ asu daan na mëkë. Amu, ngë mëbò të kë, nkè ayi ki sòṅ a bë mina. Eyòṅ hm ki mayi kë, mayi mina nyè lom. 8Eyòṅ e nyòlò te ayi sò, ayi bòòlò si-ndon asu nsëm, ai asu sosoo, ai asu nkat. 9Asu nsëm, amu bandzëki ma yëbë. 10Asu sosoo, mbol makë abë Tara, ndò miayi ki ma bad yen. 11Asu nkat, mbol ndzoe e si-ndon nyi atsigëban ya ntol. 12Mëngëlë bëlë abui mam ya akad mina, dzam da miasëki mò dzam wog etoa dzi. 13Eyòṅ hm e nyòli ayi sò, nsisim bëbëla, ayi mina lëdë zen a bëbëla osë. Amu ayi ki kòbò ai emen, dzam da, e ma mësë ayi wog, ayi mò kòbò, ndò fë ayi mina bende e mam mayi sò. 14E nyòlò te ayi ma vë olugu, amu ayi nòṅ a endzama, abende mina; 15E dzi esë Tara abëlë, enë endzama. Asu te madzo na, ayi nòṅ a endzama, abende mina.
Mëlunga mayi vëṅan mintag
16Man eban ayi kog, mina tègè ma bad yen, man eban mfë, midugan ma yen. 17Bëvòg ya bëyègè boe bëngadzo bò a bò na: Dze ben tug akad bia na: Man eban ayi kog, mina tègè ma bad yen, man eban mfë, midugan ma yen, amu makë abë Tara? 18Bëngadzo hm na: E man eban nyò ṅnyè anë dze? Biayëm ki e dzam adzo. 19Yesus angabë ayëmë na bayi nyè sili, nyè ai bò na: Dze yë miakë miasili a mina mina mbol mëdzo na: Man eban ayi kog, mina tègè ma bad yen, man eban mfë, midugan ma yen? 20Bëbëla emen, makad mina na miayi yon, mitada, si-ndon dzò efono. Miayi tòbò a mëlunga, dzam da mëlunga maan mayi vëṅan mëfon. 21Eyòṅ mininga abye, abëlë mintye amu awola die asò ya. Eyòṅ abye ya man mòn, adugan ki tsog mintye, asu e mintag yë na mod abyali a si-ndon. 22Ndò hm mina, minë a mëlunga etoa dzi. Mayi mina dugan yen, eyòṅ te minnëm miayi mina fon, ndò fë tò mod ayi ki mina fadi mëfon maan. 23A amos te, miayi ki ma sili tò dzom. Makad mina bëbëla na, ngë mindzaa Tara dzom ziṅ adzoe dama, amvëë mina dzò. 24Akui etoa dzi, miabë ki dzaè dzom ziṅ adzoe dama. Dzagan, miayi bëlë, asu yë na mëfon maan mëbò ntud. 25Mëngakad mina e mam ma a minkana. Awola lazu, a mayi ki bad kòbò ai mina a minkana, dzam da, mayi mina kad mam më Tara a kpaam. 26Amos te, miayi sili a dzoe dama, ndò makad ki mina na mayi dzaè Tara asu daan. 27Amu Tara emen adiṅ mina, amu mingadiṅ ma ndò fë mingayëbë na mëngasò abë Tara. 28Mëngasò abë tara, ndò mëngazu a si-ndon. Ndò madugan kodo a si-ndon, mëkëlë abë Tara. 29Bëyègè boe bò na: Watala na ongakòbò ya a kpaam, të kòbò a minkana a? 30Eyòṅ dzi, biayëm na wayëm mësë ai na wayaṅan ki ai na mod asili wa. Asu te biayëbë na ongasò abë Zamba. 31Yesus nyè ai bò na: Etoa dzi, miayëbë. 32Awola lazu, lësòsò ya, a miayi tsaman, anë mod a biwoge bie, miligi ma etam. Dzam da, masëki etam, amu Tara anë ai ma. 33Mëngakad mina e mam ma asu yë na mibi mvoè abë ma. Mibëlë mintye a si-ndon. Dzam da, vaan koa, mëngatègè ya si-ndon.
Επιλέχθηκαν προς το παρόν:
Yoh 16: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.