Ñwaè' Mfaè' Ñgaâa Ntuu Jisoès 20
20
1Bjep ca vi ka' mì, Pol à kɛ' ŋgǎa yɛ'ni buu Jisòs a laa buu nè wowèe, a fa wowèe ŋger, a daasi wowèe, a nati a ce dù à ŋgǒŋ Mɛ̀sɛ̀donìyà. 2E ka' ce jɛ̀r à ŋgòŋ anà a ce làa ku' buu nè bèe, a ce fa wowèe ŋger nè blàa anà. E ka' mìsi, a du à ŋgǒŋ Grês, 3a cu àfo à mŋwɛɛ btaar. E ka' ce tami nyor à rdù à ŋgǒŋ Sirìyà, a yɛ enɛ Jus a cu mncʉ̀ à rkoo ye yʉ, e kwa'shì à rkʉti dù njǐ à ŋgǒŋ Mɛ̀sɛ̀donìyà. 4Bèe ce a m dù a Pol wèe à m ba Sòpatà, muu yì Pairǔs à rla' Bɛ̀riyà, ba Àristakòs ba Sɛ̀kundǔs à rla' Tɛ̀sàlonikà, ba Gayǒs à rla' Dɛbè, ba Timotì, ba Tikikòs a Trǒfimòs ce a m ba běe à ŋgǒŋ Ɛshà. 5Wowèe a m dù entombì a du a tɛɛ wèr à rla' Trowàs. 6Mnòŋ ce a m ce ye brɛ̌d ce a lɛ̀ yes njo ka' vi ka' càa, wèr à niŋ mbe keŋ a lǒ à rla' Filèpâi, mnòŋ vi ka' bà' tâ, wèr à konì wowèe à rla' Trowàs, a cu àfo à mnòŋ sàambâ.
7À ka' ba à nòŋ entòmbì embe mʉ̀ ŋgàa, wèr a vʉ àbee à rye byee Nyʉ̀. Pol à fe'shì blǎa Nyʉ̀, a fe'shi caar a ba' nè ntee tʉ' njobè' e m rìŋ enɛ tʉ̀' be raa tɛ e dû. 8A m cʉ̀'shi ku' blâm, a tooshi mbe mʉ̀ ndap embekì mbe dì' ce wèr à m ba anà. 9Muu nsùnsù mò' ce a m ce too enɛ Yutikòs à m cu mbe wendù. Pol à ka' fè'shi dùni gòr, e buumì, a ka' buumi bòŋboŋ sê, a gwe embe ndàp ce e m ba mbendù yǐ mbekì. A ka' nàa ye mbekì e banì kwe. 10Pol à suu njep nshè a gwe mbe yě ndù, a baa ye nje nyòr, a laa enɛ̂, “Wèe fa wɛp ka', e ku bii ntèe.” 11E ka' gèe wa'a, a kʉti mbe dì' ce e ba ba, a bɛ' brɛ̌d a ye, a de' a wowèe, caar tʉ̀' à râa. Tʉ̀' à ka' raa, e ma'shì wowèe a dû. 12Wowèe a m lòr muu nsùnsù ca ntèe a du àgho, yap ntee yi fʉtè sê.
13Wèr à m nàti yer a du entòmbì, a du a niŋ mbe keŋ ŋgòr a du à rla' Asòs. Yi m ba enɛ wèr be bà' àfo koo Pol mbe keŋ. Pol à m sèesi a wowèe wa'a njobè' e m kòŋ à rdù àfo nè mkùu. 14E ka' vʉ̀ koni wèr àfo, wèr à koo ye mbe keŋ wèr wowèe a du à rla' Mitilèn. 15Wèr à natì a ce dù, tʉ̀' à ka' raa wèr à ba' a ce yɛ rla' Kiyòs nje wěr cùu. Tʉ̀' mò' à ka' raa, wèr à ba' à rla' Samòs. Tʉ̀' mò' à ka' kèr raa wèr à ba' à rla' Milɛtòs. 16Pol à m yɛ enɛ e be tɛɛ à rla' Ɛfɛsòs ka', fà dì' e bo càasi nfè' mò' à ŋgǒŋ Ɛshà ka', njobè' e m ce kòŋ enɛ e du cɛrcɛr tɛ e bo yɛ enɛ àde' e ba' à rla' Jɛ̀rusalɛ̀m à nòŋ Pɛntikòs lɛ.
17Pol à ka' bà' à rla' Milɛtòs, a cep ntuu enɛ btu embe cor à rla' Ɛfɛsòs a vʉ yɛ ye. 18Wowèe a ka' vʉ̀ bà', Pol à laa nè wowèe enɛ̂, “Wèe rìŋ njɛ̀ɛ njì ce mɛ̀ m cu a wěe mʉ kɛ̌' à nòŋ ce mɛ̀ m tɛr kùu à ŋgǒŋ Ɛshà. 19Mɛ̀ m ce fà' nè Tatâ, a ce nàa tu ka', a ce fà' nè mŋgoommir-ŋwɛ̀, ker ba mmòoshì ce mi m vʉ̀ nè mɛ̀ njo' mncʉ̀ ce Jus a m cʉ̀ mɛ̀. 20Wèe rìŋ enɛ mɛ̀ m buu efa rsuŋ wèe yuu mo' ce àde' wèe à m ba ye sɛ' enjo ka'. Mɛ̀ m ce fè'shi, a ker ce yɛ'ni wèe à mʉ̀ bèe ker ba à mndàp. 21Mɛ̀ m ce làa nè Jus ker ba bèe enje jɛɛ tatap se enɛ a kupse, ma' yàp buu bbebep, kʉti à mbèp yì Nyʉ̀, byemi nè Tata Jisòs.
22“M ce dù à rla' Jɛ̀rusalɛ̀m sè'ni na àmbò Yʉ' Rara yi làa enɛ m dû, a ke' riŋ yuu ce yi be dù koni mɛ̀ àfo ka'. 23Yuu mɛ̀ rìŋ cà'cà' yi yu enɛ Yʉ' Rara yi ce suŋ mɛ̀ à bbu' mla' wɛɛwɛ ce m ce dù enɛ m be dù shaŋ, kèr yɛ ŋgɛ'. 24Ka' yi yu wa'a, m ce lòr la ryòŋ àmbò ku' yuu mo' se ka', ku ba ba enɛ m du gee rfà' ce Tata Jisòs à m fa nè mɛ̀. Rfà' anà li yu enɛ m suŋ bèe Nsuŋ Mbòŋmboŋ àmbò ntee bòŋboŋ ce Nyʉ̀ tʉr nè bèe.
25“Mɛ̀ m jɛ̀r fa wěe mʉ a ce fè'shi àmbò kʉʉ Nyʉ̀. M rìŋ sè'ni na mɛnɛ àde' mò' efa wèe ker yɛ mɛ̀ ka'. 26M ce làa ntìni na nè wèe mɛnɛ ŋwɛ̀ mò' efa wèe ka' bʉ, àde' a taa mɛ̀ ka', 27njobè' mɛ̀ m buu efa rsuŋ wèe buu wɛɛwɛ ce Nyʉ̀ à kòŋ enɛ vi ba ka'. 28Kè'ni nè wee btu ker ke'ni njèe ce Yʉ' Rara yi fa mba wěe mmbò. Fyɛ' nè à cor Nyʉ̀ ce e m yuu nè blɛɛ muu yì. 29Mɛ̀ rìŋ mɛnɛ m be dù wɛɛ tɛ bkuura vi ŋaa bcùu niŋ a wěe mʉ, fa ŋgɛ' nè bèe Nyʉ̀ wɛɛwɛ. 30Bèe mo' efa wěe mʉ seesê, a be toosi blàa mini tɛ a bo sʉ̀ŋ bèe mò' efa ŋgǎa yɛ'ni buu Jisòs dù àgho à mbèp yàp. 31Banɛ wèe lor nfè', ker kuushi foŋ enɛ mɛ̀ m cep wèe nè mŋgoommir-ŋwɛ̀, nètʉ' ker ba nèmootì, à bfě' btaar.”
32“Kɛ̌' sè'ni na, mɛ̀ lɛ̀ wèe mbe mmbo Nyʉ̀, a ker ma'shi wèe nè yi nlàa àmbò yi ntee bòŋboŋ. Àde' nlàa anà yi gee wèe ce ba yɛɛnì, koni bti' wèe bèe wɛɛwɛ ce Nyʉ̀ à gèe a ba brara. 33Mɛ̀ m gani mbǎa ŋwɛ̀ mò' kɛ̀ bcɛ̌' ŋwɛ̀ mò' ka'. 34Wee wèe foŋ rìŋ enɛ mɛ̀ m fà' nè ma mmbo, a ja' ya tu, a ker ja' bèe ce wèr wowèe à m ce fà'. 35Buu wɛɛwɛ ce mɛ̀ m gèe vi m ba à rdùŋshi wèe enɛ sèe fa' à njɛ̌ɛ wa'a tɛ sèe bo ce jà' bèe ce a buu ŋger. Sěe gèe wa'a ce kuushi blàa ce Tata Jisòs à làa.” E m làa enɛ̂, “Ŋwɛ̀ ce e ce fa fa, yu ŋwɛ̀ mbǒŋtu caa ŋwɛ̀ ce e ce koo yi koo.”
36E ka' làa wa' mìsi, a wowèe a gʉ'shì nè mŋkʉʉshi, e gee rloo. 37Wowèe a warsè sê, a baa ye nje nyòr nè ntee-ŋwɛ̀. 38Yuu ce yi m gèe wowèe a koosìmnse sê, à m ba blàa ce e m làa enɛ wowèe a be kèr yɛ ye ka' nà. A wowèe a m dù a ba' àgee keŋ ŋgòr.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 20: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.