Ñwaè' Mfaè' Ñgaâa Ntuu Jisoès 19
19
1Àpolòs à ka' ba à rla' Korèn, Pol à jɛr nè mkùu a du a ba' à rla' Ɛfɛsòs. E ka' bà' a yɛ bèe mo' efa ŋgǎa yɛ'ni buu Jisòs. 2E m bipshi nè wowèe enɛ̂, “Wèe à m byemi wa'a, a koni Yʉ' Rara a?” Wowèe a beesì nè ye enɛ̂, “Wèr à m be yu' yuu mo' àmbò Yʉ' Rara ka'.” 3E laa nè wowèe enɛ̂, “Banɛ a m bàptir wèe ba à njɛ̌ɛ kɛ?” Wowèe a beesì enɛ̂, “A m bàptir wèr ba nè bàptir yì Jǒn.” 4Pol à laa nè wowèe enɛ̂, “Jǒn à m ce bàptir bèe njobè' wowèe a m kupse, a ma' yàp buu bbebep.” E m ker ce suŋ bèe enɛ wowèe a byemi nè ŋwɛ̀ ce e be vʉ̀ embe yě njì. Ŋwɛ̀ ce e m ce làa na à m ba Jisòs. 5Wowèe a ka' yu' wa'a, a byemi, a baptìr wowèe à rlii Tata Jisòs. 6Pol à ka' lɛ̀ mi mmbo mbe wǎp ndù, Yʉ' Rara yi suu mbe wǎp ndù, wowèe a laa bli ce a m yɛ'ni ka', a cep ntuu Nyʉ̀ nè bèe. 7Bèe anà a m ba àmbò bèe ncòp-baa à-rrʉ̀ʉ wa'a.
8Pol à m niŋ mbe ndàp rloo, a laa nè bèe nè ŋger-ŋwɛ̀ à mŋwɛɛ btaar, a ce nàshi wowèe buu àmbò Jisòs tɛ wowèe a bo rìŋ njɛ̀ɛ njì ce Nyʉ̀ ce sa' àmbò ŋkʉʉ. 9Bèe mo' efa wowèe a tee btu, a kani à rbyemì, a ce làa bebep àmbò nduunjì Tata à bsii bèe. Pol à fʉʉ efa wǎp mʉ a lor ŋgǎa yɛ'ni buu Jisòs a du àgho mbe ndap ŋwà' Tìranòs, e ce yɛ'ni wowèe buu mbo à mnòŋ wɛɛwɛ. 10E m yɛ'ni wa'a à bfě' bbaa. Yi ka' ba wa', bèe wɛɛwɛ à ŋgǒŋ Ɛsìyà, Jûs, ba bèe enje jɛɛ a yu' blàa Tatâ.
11Nyʉ̀ à m gèe buu bghagha' ce vi m ba jɛɛ se njì enjep Pôl. 12Bèe a m lòr bbishîr, ba bcɛ̀' mfà' ce vi m jòo Pôl, a dù jòo bèe ce a m ce yaŋse àgho, wowèe a luŋ efa wǎp byaŋ, byʉ' bbebep vi fʉʉ enjep wowèe. 13Jus mo' ce a m ce kar ce jùu byʉ' bbebep enjep bèe, a kɛ' a ce yòŋ rlii Tata Jisòs mbendù bèe ce byʉ' bbebep vi m ba njep wowèe. Wowèe a m ce làa enɛ̂, “À rlii Jisòs ce Pol e ke fè'shi nà, fʉʉ nè dû.” 14Bèe mo' bèe nsàambâ ce a m ce gèe wa'a, à m ba boo Sìkivà ce e m ba ŋwɛ̀ Jus mò' ce e m ba ŋwɛ̌ ŋgòr mò' efa mʉ̀ ŋgǎa taŋshi taŋshì. 15Yʉ' bebep ca yi m làa nè wowèe enɛ̂, “Mɛ̀ rìŋ Jisòs, a riŋ àmbò Pol foŋ, a wèe ye wèkɛ?” 16Ŋwɛ̀ ce yʉ' bebep ca yi m ba njep ye na à gwe mbe wǎp ndù, a lip wowèe sê, a gha' wowèe. Wowèe a caŋ a fʉʉ embe ndàp mbùuriŋ nè mnfur à nyòr. 17Jus wɛɛwɛ ker ba bèe enje jɛɛ ce a m ce cu à rla' Ɛfɛsòs a m yu' ca, a wɛp sê, a naa rlii Tata Jisòs mbekì sê. 18Bèe magòr efa mʉ̀ bèe ce a m byemi, a m vʉ̀se àwaŋ, a ce suŋ yàp buu bbebep. 19Bèe magòr efa wowèe ce a m ba ŋgǎa tʉ', a m vʉ̀ nè wap mŋwà' tʉ' a lɛ àbee, a too à bsii bèe wɛɛwɛ. A ka' bè' mbàa ce a m yuu mŋwà' anà àgho a yɛ enɛ à m ba mmalàr mntâ. 20Yi ka' ba wa'a, nlǎa Tata Jisòs yi du à ŋgòŋ nè ŋger-ŋwɛ̀.
21Buu ca à ka' koni wa'a, Pol à laa enɛ àde' e buu efa càa à ŋgǒŋ Mɛ̀sɛ̀donìyà ba à ŋgǒŋ Àkayà dù Jɛ̀rusalɛ̀m ka'. E m ker laa enɛ̂, “M ka' du ba' àfo, m ku du à rla' Rum foŋ.” 22E ka' làa wa'a, a tuu Timotì ba Ɛ̀rastòs ce a m ce jà' ye à li rfà', enɛ a du à ŋgǒŋ Mɛ̀sɛ̀donìyà, a biishi yi à ŋgǒŋ Ɛshà.
23À m ba à nfè' anà ku' ŋgɛ' à kɛ' àtu buu ce a m ce yɛ'ni kuu nduunjǐ Tatâ. 24Ŋwɛ̀ ntòo nlàa mò' à m ba a ce too ye enɛ Dɛ̀mitròs. E m ce gèe mʉ mndap nyʉ̌ bkɛ'kɛ' nè njɛ̀ɛ bco' mo' ce a m ce too enɛ Silvà, vi feesè ndap nyʉ̀ Àtɛmìs. Bèe ce a m ce fà' nè ye a m ce ye sɛ' enjep rfà' anà sê. 25E m kɛ' wowèe a bèe ce a m ce gèe njɛ̀ɛ ntaa anà foŋ àbee, a laa nè wowèe enɛ̂, “Yà bèe, wèe rìŋ enɛ see ke yeŋger bòŋboŋ sê, njobè' lisèe rfà' ca. 26To wee wèe foŋ à yɛ a ker yu' yuu ce ŋwɛ̀ ce a too enɛ Pol na ce gèe à rla' Ɛfɛsòs, ker ba à ŋgǒŋ Ɛsìyà wɛɛwɛ. Byɛ anà à làa enɛ mnyʉ̀ ce bèe a kupshi kupshi yu lɛ mnyʉ̀ ka'. E gèe wa'a, a beesi mntee ese bèe magòr. 27Yi ku ba ba enɛ ŋgɛ' be koni sèe tɛ lisèe rfà' ca li kwe ntaa ka', bèe a be kèr lòr ndap nyʉ̀ Àtɛmìs anà à yuu ka', tɛ nyʉ̀ ca seese ce běe à ŋgǒŋ Ɛshà wɛɛwɛ a ce cà'ni na, ker kʉti ba yì ce àde' bèe a yu'nì nè ye ka'.”
28Wowèe a ka' yu' ca, ntee yi bep wowèe sê, wowèe a kɛ' a ce ghaa a ce làa enɛ̂, “Àtɛmìs ce à rla' Ɛfɛsòs yu nyʉ̌ ŋgòr.” 29Nfè' à m tuuse ka', ghaa yi ko' à rla' Ɛfɛsòs wɛɛwɛ. Bèe ca a m koo Gayòs ba Àristakòs a du àgho mbe mambe ŋgòr. Bèe a mmbaa ca a m ba běe à ŋgǒŋ Mɛ̀sɛ̀donìyà ce a m ce kar a Pol wèe. 30Pol à m ce kòŋ enɛ e du niŋ mbe mʉ̀ bèe anà, ŋgǎa yɛ'ni buu Jisòs a kanì. 31Bèe mǒ' à ŋgǒŋ Ɛsìyà ce a m ba bkar Pôl, a m cep ntuu nè ye, a laa enɛ e fa mòo ka'. 32Bèe ce a m kaari anà a m jep, a ce ghaa a ce làa buu jɛɛ jɛ̀ɛ jɛɛ njobè' bèe magòr a m rìŋ yap yu mbùu ce wowèe a m vʉ̀ mbo ka'. 33Jus a m dòori Àlɛ̀ksandà a tɛr kùntombì nè bèe, a laa nè ye enɛ e laa yuu. Àlɛ̀ksandà à naa bo mbekì enɛ bèe a cu nyaŋ tɛ e laa yuu. 34Wowèe a ka' yɛ enɛ e yu ŋwɛ̀ Jûs, wowèe a ghaa àbee àmbò awà baa wa'a, a ce làa enɛ̂, “Àtɛmìs ce à rla' Ɛfɛsòs yu nyʉ̌ ŋgòr.”
35Ŋwɛ̀ nsaŋ ŋwà' ce à rla' ca à gee bèe wɛɛwɛ a cu nyaŋ, e laa enɛ̂, “Yà běe à rla' Ɛfɛsòs, ŋwɛ̀ wɛɛwɛ riŋ enɛ rla' Ɛfɛsòs a rla' ce li ke kè'ni ndap nyʉ̀ Àtɛmìs ce yu nyʉ̌ ŋgòr, a ker ba rla' ce li ke kè'ni yuu ce yi m gwè embe bùu nà. 36Àde' ŋwɛ̀ mò' mɛŋnì buu ca ka', banɛ ŋwɛ̀ mò' fa kèr fa ŋgɛ' ka'. Cu nè mʉnyaŋ. 37Wèe à vʉ̀ nè bèe ca mbena ce àmbò wowèe a yɛ̀ɛ buu embe mndap nyʉ̀ ka', a laa yuu mo' bebep àmbò yìsèe nyʉ̀ ka'. 38Dɛ̀mitròs ba yi ŋgǎa mfà' a ka' tʉr yuu mo' kuu ŋwɛ̀ mò', banɛ wowèe a riŋ enɛ bkor vi ku tɛɛ btoo, ŋgǎa rsa' a ba àgho, banɛ wowèe a du mbo sa' wâp mnsa'. 39Wèe à ka' ker tʉr yuu mo' ce wèe à ba làa, wèe laa ba mbe rcutè ce bèe ce a ce sa' rla' a kɛ'. 40Àmbò yi yu sè'ni na, àde' a ku koo sèe àtu ŋgɛ' ce e koni ntìni na. Yi ka' koni wa'a, sèe tʉr yuu à rlàa ka'.” 41E ka' mìsi, a laa bèe à da'sè a duse.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 19: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.