Ñwaè' Mfaè' Ñgaâa Ntuu Jisoès 18
18
1E ka' mìsi wɛɛ, a lǒ à rla' Atɛ̀ns a du à rla' Korèn. 2E ka' bà', a yɛ ŋwɛ̀ mò' embe ndʉ̀' Jûs, ce a m ce too enɛ Àkwilà. A m bi ye à rla' Pontùs. E m lǒ à rla' Italè a ŋgwa yì ce a m ce too enɛ Prèsilà njobè' ŋkʉʉ Klǎdìyòs à m fa rsa' enɛ Jus a fʉʉ à rla' Rum duse. Pol à m dù à ryɛ wowèe, 3a ka' yɛ enɛ yàp ntaa à m ba bcɛ̀' ce wowèe a m ce tar ce gèe btàp àgho ce fyèni àmbò ye ye foŋ, e cu a wowèe a ce fà' a wowèe àbee. 4E m ce dù mbe ndàp rloo Jus à mmbomntaa wɛɛwɛ, a ce nàshi wowèe buu tɛ Jus ba Grěk ce a m ba mbo a bo byemi nè Jisòs. 5Silàs ba Timotì a ka' vʉ̌ à rla' Mɛ̀sɛ̀donìyà, Pol à lo sè'ni a ku ce fè'shi ba blǎa Nyʉ̀ cà'cà', a ce suŋ Jus enɛ Jisòs yu Krǎis anà. 6Wowèe a ka' kani yuu ce Pol à m suŋ wowèe, ce cɛp ye, e kashì vi bcɛ̀' a laa enɛ̂, “Mɛ̀ làa ya wɛɛ, kwà' wèe. Kɛ' e sè'ni na, m be ce fè'shi blǎa Nyʉ̀ ba nè bèe enje jɛɛ.” 7E m lò a du mbe ndàp Taitìyùs ce e m ba àgee ndap rloo. E m ba ŋwɛ̀ ce e m ce loo nè Nyʉ̀. 8Krǐspòs ce e m ba tu embe ndàp rloo ba bèe wɛɛwɛ embe yě ndàp a m byemi nè Tata Nyʉ̀. Bèe magǒr à rla' Korèn a m yu' yuu ce Pol à m làa nè wowèe, a byemi, a baptìr wowèe.
9À ka' ba nètʉ' mò', Tata à laa nè Pol à rlo enɛ̂, “Fa wɛp ka', kù ce fe'shi blǎa Nyʉ̀, ke' borni à nfè' mò' ka', 10njobè' m ku ba wèe sò. Ŋwɛ̀ mò' be gèe yuu mo' bebep nè wɛ̀ ka', njobè' ku' yà bèe a yu à rla' ca sê.” 11Pol à m cu a wowèe à fè' bìi ba nto' a ce yɛ'ni wowèe blǎa Nyʉ̀.
12À m ba mbe nfè' ce Gàliyò à m ba govanǒ à ŋgǒŋ Àkayà, Jus a m tar cùu, a koo Pol a du àgho mbe kôr. 13A ka' bà' mbo, a laa enɛ̂, “Ŋwɛ̀ ca ce kòŋ à rgèe tɛ bèe a loo nè Nyʉ̀ à njɛ̀ɛ njì ce ncir yi byemi ka'.” 14Pol à ka' lò enɛ e ce làa, Gàliyò à laa enɛ̂, “Yu' ka nè lɛ Jûs! Wèe à ka' ba ce làa enɛ Pol à gèe yuu mo' bebep kɛ̀ e bʉ' ncir mo' tatap ɛ̀, mɛ̀ ba lòr nfè', yu' yuu ce wèe ce làa. 15À ka' ba njobè' wèe ce sɛr mnsɛr ba àmbò blàa ba mlii ker ba ye ncìr, banɛ wèe à ba sa' wee mnsa' mìsi fa wěe mʉ. M be sa' njɛ̀ɛ mnsa' anà ka'.” 16E ka' làa wa'a, a juu wowèe embe kôr. 17Wowèe a koo Sòstɛnì ce e m ba tu embe ndàp rloo a lip à bsii kôr. Ka' yi m ba wa'a, Gàliyò à m lòr yuu ce wowèe a m gèe anà à yuu ka'.
18Pol à m cu a bfʉr wèe à rla' Korèn à mʉ nfè' mò', a ma'shi wowèe a niŋ mbe keŋ a Prèsilà ba Àkwilà a du à ŋgǒŋ Sirìyà. Tɛ wowèe a ka' dù, e m ye lè' à rla' Sinkrìyà, a koo yi tu àmbò ndèe Jus à m ba. 19Wowèe a ka' dù bà' à rla' Ɛfɛsòs, Pol à ma'shì Prèsilà ba Àkwilà àfo. E m du mbe ndàp rloo a suŋ Jus buu àmbò Jisòs. 20Wowèe a m làa enɛ a wowèe a cu à mʉ nfè' mò'. E kanì. 21E ka' ce dù, a laa nè wowèe enɛ̂, “Nyʉ̀ à ka' byemi, m kʉtì vʉ yɛ wèe.” E ka' làa wa'a, a nàtǐ à rla' Ɛfɛsòs a niŋ mbe keŋ a dû.
22E ka' bà' à rla' Sisàriyà, a du Jɛ̀rusalɛ̀m a ca'ni cor yǐ àfo, a nati a kʉti à rla' Antìyòk. 23E ka' cu àfo à mʉ nfè' mò', a nati a jɛr à ŋgǒŋ Gàlɛshà ba Frijìyà, a ce fa ŋger nè ŋgǎa yɛ'ni buu Jisòs ce a m ba à bdì' anà wɛɛwɛ.
24Ŋwɛ̀ Jus mò' ce a m ce too enɛ Àpolòs à m vʉ̌ à rla' Ɛfɛsòs. A m bi ye à rla' Àlɛ̀ksandà. À m ba ŋwɛ̀ ce e m rìŋ à rlàa yuu, a riŋ Ŋwǎ' Nyʉ̀ bòŋboŋ foŋ sê. 25A m yɛ'ni ye buu kuu Tata Jisòs. E m làa nè ntee-ŋwɛ̀, a yɛ'ni bèe buu àmbò Jisòs yɛɛnì sê. Ka' yi m ba wa'a, e m ku riŋ yi ba baptìr yì Jǒn cà'cà'. 26E m niŋ mbe ndàp rloo a kɛ' a ce làa nè ŋger-ŋwɛ̀ sê. Prèsilà ba Àkwilà a ka' yu', a lor ye a du àgho mbe wǎp ndàp, a nashi mnduunjǐ Nyʉ̀ nè ye yɛɛnì sê.
27Àpolòs à ka' tà' à rdù à ŋgǒŋ Àkayà, bfʉr ce à rla' Ɛfɛsòs a fa ye ŋger, a ker saŋ ŋwà' nè ŋgǎa yɛ'ni buu Jisòs ce a m ba àfo enɛ wowèe a koni ye. E ka' bà', a ja' bèe ce a m byemi njobè' Nyʉ̀ à m tʉr wowèe à ntee bòŋboŋ nà. 28E m jà' wowèe a sɛr mnsɛr a Jus wèe àwaŋ tatap sê, a ce fyɛ' mbe Ŋwǎ' Nyʉ̀, a ce dùŋshi wowèe enɛ Jisòs yu Krǎis anà. E ka' sɛr wa'a, a so wowèe.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 18: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.