Ñwaè' Mfaè' Ñgaâa Ntuu Jisoès 17
17
1Wowèe a ka' dù càa rla' Àmfipolìs ba rla' Àpòlonìyà, a ba' à rla' Tɛ̀sàlonikà. Ndap rloo Jus à m ba àfo. 2Pol à niŋ mbe ndàp rloo anà àmbò e m gèe à mla' mo' nà. E m lòr mmbomntaa mi mtaar à rnàshi wowèe buu embe Ŋwǎ' Nyʉ̀, 3a ce sàr buu Nyʉ̀ nè wowèe, a ce dùŋshi nè wowèe enɛ yi m ba enɛ Krǎis anà à m tʉr à ryɛ ŋgɛ', kwe, fʉʉ efa rkwe. E m làa enɛ̂, “Jisòs ce m ce suŋ wèe àmbò ye na, yu Krǎis anà.” 4Bèe mo' efa wowèe a m byemi, a ba àbee a Pol ba Silàs. Bèe magòr efa mʉ̀ Grěk ce a m ce loo nè Nyʉ̀ ker ba bbyèŋge ce a m ba ŋgǎa mlii a m byemi foŋ a ba àbee a Pol wèe. 5Jus a m ko'ndoŋ nè wowèe, a du a yɛ ŋgǎa bsàrbuu mo' efa mʉ̀ ŋgǎa fa ŋgɛ', wowèe a baashì bèe, bèe anà a kɛ' ŋgɛ' à mʉ̀ la'. A ka' kɛ̀' ŋgɛ', a caŋ a du mbe ndàp mbe Jasìn à rkoo Pol ba Silàs, fʉr wowèe fa nè bèe. 6A ka' yɛ wowèe ka', a koo Jasìn ba bfʉr mo', a sʉ̂ŋ, a du àgho a fa nè ŋgǎa kansùr, a laa mbekì enɛ̂, “Bèe ca ce a bèesi ŋgòŋ tʉtʉ̀ŋ na, a vʉ̀ a ba' àfa foŋ. 7Jasìn à koo wowèe a lɛ mbe yě ndàp. Wowèe a ce bʉ' mncir Sisà à njì ce a ce laa enɛ ŋkʉʉ mò' ker ba, a ce too enɛ Jisòs.” 8Ku' bèe ce a m ba àfo ker ba ŋgǎa kansùr a ka' yu', ntee yi fʉʉ wowèe. 9Wowèe a laa enɛ Jasìn ba bfʉr ca a tee yap tu. Jasìn wèe a ka' tee yap tu àmbò a m làa, a ma'shì wowèe a dusè.
10Tʉ̀' à ka' sii, bfʉr a lor Pol ba Silàs a du àgho à rla' Bɛ̀riyà. Wowèe a ka' bà', a du mbe ndàp rloo Jûs. 11Ndèe bèe ca à boŋ a caa ndèe bèe embe ndàp rloo ce à rla' Tɛ̀sàlonikà, njobè' wowèe a m kòŋ à ryu'shi blǎa Nyʉ̀ sê, a ce bè' Ŋwǎ' Nyʉ̀ à mnòŋ wɛɛwɛ tɛ a bo yɛ enɛ yuu ce Pol à m ce làa yi m ba mini lɛ. 12Bèe magòr a m byemi. Bbyèŋge Grěk ce ŋgǎa mlii ba Grěk ce a m ba mmbaŋrù, a m byemi foŋ. 13Jus à rla' Tɛ̀sàlonikà a ka' yu' enɛ Pol ce fè'shi blǎa Nyʉ̀ à rla' Bɛ̀riyà foŋ, wowèe a vʉ foŋ a barsi bèe ce a m ba àfo enɛ a wowèe a kɛ' ŋgɛ'. 14Yi ka' ba wa'a, bfʉr a lor Pol njà' mò'sir a du àgho àwǎa rdip rgòr, Silàs ba Timotì a cu yap à rla' Bɛ̀riyà. 15Bèe ce a m dù a Pol wèe nà, a m dù caar a du a ma'shi ye à rla' Atɛ̀ns. A ka' ce kʉti, Pol à laa nè wowèe enɛ a du laa nè Timotì ba Silàs enɛ a vʉ cɛrcɛr vʉ yɛ ye.
16Pol à ka' cu à rla' Atɛ̀ns ce kè' Timotì ba Silàs, a yɛ ku' blaŋ ce běe àfo a m ce loo nè vi enɛ a mnyʉ̀. E ka' yɛ, nyor à bep ye. 17Yi ka' ba wa'a, e nashì buu mò' mbe ndàp rloo nè Jus ba nè Grěk ce a m ce loo nè Nyʉ̀. E m gèe wa' foŋ à mnòŋ wɛɛwɛ à ntaa nè bèe ce a m vʉ̀ àfo. 18Bèe mo' efa mʉ̀ bèe ce a m tʉr ba bfee Ɛ̀pɛ̀kuràn, ba bèe mo' ce a m tʉr ba bfee Stoyìk, a m sɛr mnsɛr a Pôl. Bèe mo' efa wǎp mʉ a laa yap enɛ̂, “Ŋwɛ̀ bu' cùu ca ce ròo à rlàa ba kɛ?” Bèe mo' a laa yap enɛ̂, “Yi ce yɛɛti enɛ e ce làa ba àmbò mnyʉ̀ mo' ce sèe rìŋ ka'.” Wowèe a m làa wa'a njobè' Pol à m ce fè'shi àmbò Jisòs ba nfʉʉ efa rkwe. 19Wowèe a lor Pol a du àgho mbe rcutè ce a m ce cute mbe rtǔu Àropagòs, a laa nè ye enɛ̂, “Wèr ce kòŋ à rrìŋ njɛ̀ɛ ryɛ'nǐ rfi ce à ce yɛ'ni na. 20Buu mò' ce wèe ce làa vi yu bfi nè wèr, wèr à ce kòŋ à rrìŋ vi.” 21Wowèe a m làa wa'a njobè' bèe wɛɛwɛ à rla' Atɛ̀ns ker ba bkìlò ce a m ce cu àfo a m lòr ku' yàp nfè' a ce gèe kìnfɛ̀r ba àmbò buu bfi, a ker ce yu' buu bfi.
22Pol à natì mbekì mbe rcutè embe Àropagòs, a laa enɛ̂, “Běe à rla' Atɛ̀ns! Mɛ̀ yɛ bòŋboŋ mɛnɛ wèe yu bèe ce wèe ce wɛp mnyʉ̀ sê. 23M ce làa wa'a njobè' mɛ̀ kar à mʉ̀ le rla' ca, a yɛ bdì' ce wèe ce gèe mloo. Mɛ̀ yɛ foŋ dǐ' rfa, a saŋ mbe dì' anà enɛ̂, ‘Nè Nyʉ̀ ce a rìŋ ka'.’ Banɛ Nyʉ̀ ce wèe ce loo nè ye, a riŋ ye ka' anà, a yì ce m be suŋ wèe àmbò ye. 24Nyʉ̀ ce e m gèe ŋgòŋ a ker gee buu enjep ŋgòŋ na wɛɛwɛ yu Nyʉ̀ ce e ce sa' mbe bùu ba njep nshè. E ke cu mbe ndàp Nyʉ̀ ce bèe a bà'ri nè mmbo ka'. 25Àde' bèe a fa' nè ye àmbò e buu lɛ buu wa' ka', njobè' ku ba ba ye ce e ke gèe bèe a cu btèe ce yòŋse, ker fa wowèe buu wɛɛwɛ. 26E m gèe mnjɛ̀ɛ wɛɛwɛ vi fʉʉ enjep ŋwɛ̀ mò'sir, tɛ vi bo cu à bdì' wɛɛwɛ enjep ŋgòŋ na. E m kwà'shi wɛɛ, a lɛ mnfè', a ker lɛ bdì' rcu nè wowèe. 27E m gèe wa'a tɛ bèe a bo ròo ye, ce ghàashi enɛ kɛ̀ seemò' a be yɛ ye lɛ. Geewa'a, Nyʉ̀ yu ànjìsàp ese ŋwɛ̀ mò' efa sèe ka'. 28Sèe cu btèe a ce jɛ̀r, a ba àgho njo' ye. Yi ku ba àmbò yè bèe ce a ke saŋ mghàghar a làa. Wowèe a làa enɛ̂, ‘Nè mini-ŋwɛ̀, sèe yu boo vi.’ 29Banɛ àmbò sèe yu boo Nyʉ̀ na, sèe fa kèr ce kwà'shi enɛ Nyʉ̀ yu àmbò blaŋ ce a lòr ba bco' kɛ̀ blùr ɛ̀, a gee àgho, à ba yuu ce ŋwɛ̀ à gèe ba nè vi bfee ba mi mmbo nà ka'. 30À m ba mbe nfè' ce bèe a m rìŋ yuu ce a m ce gèe ka' nà, Nyʉ̀ à ce fuse. À ka' ba sè'ni na, Nyʉ̀ à ce làa nè běe à bdì' wɛɛwɛ enɛ wowèe a kupse, ma' yàp buu bbebep, 31njobè' e lɛ̀ nòŋ ce a be sa' bèe wɛɛwɛ à njǐ yɛɛnì, a ker ce ŋwɛ̀ ce e be sa' bèe. Nyʉ̀ à gèe ŋwɛ̀ wɛɛwɛ à riŋ enɛ e be gèe wa'a njobè' e fʉr ŋwɛ̀ anà efa rkwe.”
32Wowèe a ka' yu' àmbò rfʉʉ ce bèe a be kè fʉʉ efa rkwe, bèe mo' efa wǎp mʉ a vʉshì ye, bèe mo' a laa yap enɛ̂, “Wèr be kèr yu' yuu ce à be làa kuu yuu ca nyʉ̀ mò'.” 33Pol à fʉʉ efa wǎp mʉ, a dû. 34Bèe mo' a ba a Pol àbee, a byemi. Bèe mo' efa bèe ca à m ba Dàyonishòs ce e m ba ŋwɛ̀ embe rcutè Àropagòs anà, ker ba njeŋwɛ̀ ce a m ce too enɛ Damɛrès, ker ba bèe mo'.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 17: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.