Ñwaè' Mfaè' Ñgaâa Ntuu Jisoès 16
16
1Pol à du a ba' à rla' Dɛbè, a du à rla' Listrà. Ŋwɛ̀ yɛ'ni buu Jisos mò' à m ba àfo, a too ye enɛ Timotì. Yì ma à m ba ŋwɛ̀ Jus ce e m ba ŋwɛ̀ rbyemì, yì ta à ba yi ŋwɛ̀ Grês. 2Bfʉr ce a m ba à rla' Listrà ba Ìkonìyòm a m làa buu bbòŋboŋ àmbò ye sê. 3Pol à m ce kòŋ enɛ a Timotì a dû, yi ka' ba wa'a, a gee ye bʉ̀ njobè' Jus wɛɛwɛ ce a m ba à bdì' anà a m rìŋ enɛ yì ta yu ŋwɛ̀ Grês. 4Wowèe a ka' ce dù ce càa à mla' anà, a ce suŋ běe àfo buu ce ŋgǎa ntuu Jisòs ba btu embe cor à rla' Jɛ̀rusalɛ̀m a m sèesi a laa enɛ wowèe a gêe. A m làa nè wowèe enɛ wowèe a gee buu anà. 5Ca yi m gèe bcor wɛɛwɛ vi misì a tap à rbyemì, a ce kù' à bèe à mnòŋ wɛɛwɛ. 6Wowèe a m nàti a caa à ŋgǒŋ Frijìyà ba Gàlɛshà, njobè' Yʉ' Rara yi m kani wowèe efa rfè'shi blǎa Nyʉ̀ à ŋgǒŋ Ɛshà. 7Wowèe a ka' ce bà' njep ndèe ŋgǒŋ Misìyà, a ce tà' à rdù à ŋgǒŋ Bìtinìyà, Yʉ' Jisòs yi ma'shì enɛ wowèe a du ka'. 8Wowèe a m càa njǐ à ŋgǒŋ Misìyà a du a ba' à rla' Trowàs.
9À ka' ba nètʉ', Pol à yɛ yuu mo' àmbò rlo wa'a. E m yɛ àmbò ŋwɛ̌ à ŋgǒŋ Mɛ̀sɛ̀donìyà à tɛɛ, a ce bu' mmbo nè ye enɛ̂, “Vʉ̀ à ŋgǒŋ Mɛ̀sɛ̀donìyà, ja' wèr.” 10Pol à ka' yɛ wa'a, wèr à roo nduunjì à rdù à ŋgǒŋ Mɛ̀sɛ̀donìyà, njobè' wèr à m rìŋ nè mini-ŋwɛ̀ enɛ Nyʉ̀ à kɛ' wèr enɛ wèr fe'shi Nsuŋ Mbòŋmboŋ nè wowèe. 11Wèr à ka' lǒ à rla' Trowàs, a niŋ mbe keŋ, a dû, a tɛɛ à dì' mo' ka', caar a ba' à rla' Sòmatɛrɛ̀s. Tʉ̀' à ka' raa, wèr à ba' à rla' Nìyapolìs. 12Wèr à ka' lǒ àfo, a du a ba' à rla' Filèpâi. À m ba rla' ce bàrà' ce a m vʉ̌ Rum a m ce sa'. À m ba rla' rgǒr à ŋgǒŋ Mɛ̀sɛ̀donìyà. Wèr à m cu àfo à mnòŋ àŋgoo. 13À ka' ba nyʉ̀ mmbomntaa, wèr à fʉʉ efa mʉ̀ la' a ce du àwǎa rò, a ce kwà'shi enɛ wèr be yɛ dì' rloo àfo. Wèr à ka' bà', a cu à nshè, a laa nè bbyèŋge ce a m vʉ̀ à rgèe rloo àfo. 14Njeŋwɛ̀ mò' efa mʉ̀ bbyèŋge ca ce a m ce too enɛ Lidìyà a m yu' yuu ce wèr à m làa. À m ba ŋwɛ̌ à rla' Tàitirà, a ba ŋwɛ̀ ce e m ce fyèni bcɛ̀' ce vi m lùu ntaa. À m ba njeŋwɛ̀ ce e m ce loo nè Nyʉ̀. Nyʉ̀ à m mʉ̀' yi ntee, e byemì blǎa Nyʉ̀ ce Pol à m fè'shi. 15A m bàptir ye ker ba bèe embe yě ndàp, a ka' mìsi, e be wèr enɛ wèr vʉ mbe yě ndàp. E m làa enɛ̂, “Wèe à ka' yɛ nè mini-ŋwɛ̀ enɛ mɛ̀ byemi nè Tatâ, wèe vʉ cu mbe mɛ̌ ndàp.” E m làa nè wèr caar, wèr wowèe a dû.
16À ka' ba nyʉ̀ mò', wèr à ce dù à rgèe rloo. A tarte wèr muunje mò' ce e m ba ŋkwàa. Njɛ̀ɛ yʉ' mo' yi m ba njep ye, a ce gèe e ce suŋ bèe buu ce vi bii ka' ba. E m ce kap ku' mbàa nè bèe ce a m yuu ye sê, njobè' e m ce suŋ bèe buu anà. 17E m dù àmbùu wèr Pol wèe, a ce fuŋ enɛ̂, “Bèe ca yu ŋgǎa mfà' nè Nyʉ̌ ŋgòr. A ce suŋ wèe njɛ̀ɛ njì ce àde' wèe gee ka' lûŋ.” 18E m fuŋ wa' à mnòŋ àŋgoo, ntee yi yaŋ Pôl, e karsì nyor a ke' ye, a laa nè yʉ' ce yi m ba njep ye anà enɛ̂, “M ce làa nè wɛ̀ à rlii Jisos Krǎis enɛ à fʉʉ enjep ye.” E ka' làa wa'a, yʉ' anà yi ku fʉʉ à nfè' anà. 19Bèe ce a m tʉr ŋkwàa ca a ka' yɛ enɛ njì mò' ker ba àgho nè wowèe à rkap mbàa ka', wowèe a koo Pol ba Silàs a sʉŋ a du àgho à ntaa, a fa wowèe nè ŋgǎa sa' to'. 20A m vʉ̀ nè wowèe kùntombì nè ŋgǎa nsa' mnsa' a laa enɛ̂, “Bèe ca yu Jûs. Wowèe a ce jepsi lisèe rla'. 21Wowèe a ce yɛ'ni ndèe to' mò' ce yisèe ncir yi byemi enɛ sèe gee ka'. Sèe yu yisèe běe à to' Rûm.” 22Kʉr bèe ce a m ba àfo a m niŋ njep mʉ̀ mo, a baa Pol wèe foŋ. Ŋgǎa nsa' mnsa' a m shàshi bcɛ̀' efa nyòr Pol ba Silàs, a laa enɛ a lip wowèe nè mbàŋ. 23A ka' lìp wowèe bòŋboŋ, a fa wowèe mbe shaŋ, a laa nè ŋwɛ̀ ce e m kè'ni shaŋ enɛ e ke'ni wowèe bòŋboŋ. 24A ka' làa nè ye wa'a, e lɛ wowèe mbà mʉ̀ ndap embe shaŋ, a taa wowèe à bù'.
25À ka' ba àmbò nè ntee tʉ' wa'a, Pol ba Silàs a ce gèe rloo a ce yɛɛ byɛɛ nè Nyʉ̀, ŋgǎa shaŋ a cu a ce yu'shi. 26Ka' cu ŋgòŋ yi ci'tì, a ci' kǔu shaŋ foŋ. Bkèŋ shaŋ vi mʉ'ŋgèr njà' mò'sir, bkwàŋ vi gweŋgěr à mkoo ŋgǎa shaŋ wɛɛwɛ. 27Ŋwɛ̀ ce e m ce kè'ni shaŋ à ka' lɛ' efa mmirlò yɛ enɛ bkèŋ shaŋ vi mʉ̀'ŋger, e co' kàafà' enɛ e bo yʉ yì nyor àgho njobè' e m ce kwà'shi enɛ ŋgǎa shaŋ a fʉʉse embe shaŋ a caŋ a duse. 28Pol à waa enɛ̂, “Fa bɛɛsi yò nyor ka'! Wèr ku ba tǎa wɛɛwɛ!” 29Ŋwɛ̀ rkè'ni shaŋ anà à laa enɛ a bɛrsi mor fa nè ye. A ka' bɛrsi fa nè ye, e caŋ a du mbe shaŋ, a gwè njeptii Pol ba Silàs, a ce kàŋ. 30A ka' nàti mbekì, a fʉr wowèe njepmbè a laa nè wowèe enɛ̂, “Masà wèe, yuu ce àde' m gee ka' luŋ yu kɛ?” 31Wowèe a beesì enɛ̂, “Byemi nè Tata Jisòs tɛ à bo luŋ, wɛ̀ ker ba bèe embe wɛ̌ ndàp.” 32A m fè'shi blǎa Tata nè ye ker ba nè bèe wɛɛwɛ embe yě ndàp. 33À ka' ba à nfè' ana nètʉ' anà, e lor wowèe a su'si wap mnfur. E ka' sù'si mìsi, a baptir ye ker ba bèe wɛɛwɛ embe yě ndàp. 34E m lòr Pol ba Silàs a du àgho mbe yě ndàp, a fa wowèe byee. A bèe embe yě ndàp wèe a m lu'shi se njobè' wowèe a m byemi nè Nyʉ̀.
35Tʉ̀' à ka' raa, ŋgǎa teni mnsa' a tuu yap ŋgǎa ntuu enɛ a du laa enɛ a fʉr bèe anà embe shaŋ. 36Ŋwɛ̀ rkè'ni shaŋ à laa nè Pol enɛ̂, “Ŋgǎa teni mnsa' a tuu bèe enɛ a fʉr wèe Silàs embe shaŋ. Banɛ wèe fʉʉ là embo, du bòŋboŋ.” 37Pol à laa nè wowèe enɛ̂, “Wèe à be sa' wer mnsa' ka', a lip wèr à mʉ̀è bèe, a ku lor wer ce wèr yu běe à to' Rum a fa mbe shaŋ. Wowèe a ce roo sè'ni à rfʉr wèr embe shaŋ ba à bsʉ̀ti njokɛ? Àde' yi ba wa' ka'. Làa nè tɛ wowèe a vʉ fʉr wèr embo nè yap bo.” 38Ŋgǎa ntuu ca a du a suŋ nè ŋgǎa teni mnsa'. Wowèe a ka' yu' enɛ Pol ba Silàs a yu běe à to' Rum, a wɛp sê, 39a dû, a bu' mmbo nè wowèe, a fʉr wowèe embe shaŋ, a laa nè wowèe enɛ wowèe a fʉʉ efa lap rla' dû. 40Pol ba Silàs a ka' fʉʉ embe shaŋ a du mbe ndàp mbe Lidìyà, a tarte a bfʉr wèe, a fa wowèe ŋger. A ka' misì, a dû.
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 16: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.