Ñwaè' Mfaè' Ñgaâa Ntuu Jisoès 21
21
1Wèr Pol wèe à ka' mà'shi wowèe, a niŋ mbe keŋ a du a ba' à rla' Kôs, a tɛɛ à dì' mo' ka'. Tʉ̀' à ka' raa wèr à ba' à rla' Rodòn, a ka' lǒ àfo, a du a ba' à rlà' Patarà. 2Wèr à ka' yɛ keŋ ce e m ce dù à rla' Fònishà, wèr à niŋ mbo a dû. 3Wèr à ka' bà' mbe dì' mo' yɛ rla' Saipròs, a ma'shi li à bo ŋkòp a caa a du a ba' à ŋgǒŋ Sirìyà. Keŋ à du a tɛɛ à rla' Tayà tɛ a bo fʉshi buu embo àfo. 4Wèr à du a yɛ ŋgǎa yɛ'ni buu Jisòs àfo a cu wèr wowèe à mnòŋ sàambâ. Wowèe a m làa nè Pol à ŋger Yʉ' Rara enɛ e fa dù à rla' Jɛ̀rusalɛ̀m ka'. 5Geewa'a, yèr nfè' rdù à ka' ghɛɛ, wèr à natì a ce dù. Wowèe wɛɛwɛ ba wap bbyèŋge ba boo wap a m fʉʉ efa lap rla' ca a du wèr wowèe. Wèr wowèe à ka' bà' àwǎa rò, a gʉ'shi nè mŋkʉʉshi a loo, 6a ma'shi mnyor. Wèr à niŋ mbe keŋ, wowèe a natì a kʉti.
7Wèr à lǒ à rla' Tayà a du a ba' à rla' Tòlemɛ̀s, a ca'ni bfʉr vǐ àfo, a cu wèr wowèe à nǒŋ mo'sir. 8Tʉ̀' à ka' raa, wèr à natì a du a ba' à rla' Sisàriyà, a niŋ mbe ndàp Felep ce e m ba ŋwɛ̀ rfè'shi Nsuŋ Mbòŋmboŋ, a cu wèr wowèe. E m ba mò' efa bèe nsàamba ce cor à rla' Jɛ̀rusalɛ̀m à m ce nà. 9E m tʉr boo bbyèŋge kyèe ce a m ce cep ntuu Nyʉ̀ nè bèe. Boo ca a m dù bgùu ka'.
10Wèr à ka' cu àfo à mʉ mnǒŋ mo', ŋwɛ̀ ncep ntuu Nyʉ̀ ce a m ce too enɛ Àgabòs à vʉ̌ à ŋgǒŋ Jùdiyà. 11E ka' vʉ̀ yɛ wèr, a fyɛɛ muu cɛ̀' ce Pol à m cʉʉ nje bʉ', a cʉʉ mi mkùu ba mi mkoo àgho, a laa enɛ̂, “Yʉ' Rara yi làa enɛ Jus à rla' Jɛ̀rusalɛ̀m a be kur ŋwɛ̀ ce e tʉr muu cɛ̀' ca à njɛ̌ɛ wa'a, fa ye nè bèe enje jɛɛ.” 12Wèr à ka' yu' wa'a, wèr běe à rla' anà wèe à bu' mmbo nè ye enɛ e fa dù à rla' Jɛ̀rusalɛ̀m ka'. 13Pol à laa enɛ̂, “Wèe ce war a ce koosi mɛ̀ bsɛ̀ wa'a njokɛ? Mɛ̀ ku tami nyor ba enɛ a koo mɛ̀ kur kur cà'cà' ka', mɛ̀ tami nyor foŋ à rkwe à rla' Jɛ̀rusalɛ̀m àtu Tata Jisòs.” 14E ka' kani yuu ce wèr à m làa, wèr à bornì yer yu, a laa wernɛ̂, “Tɛ Tata Nyʉ̀ gee yuu ce e kòŋ.”
15Mʉ mnòŋ vi ka' càa, wèr à kur buu a du à rla' Jɛ̀rusalɛ̀m. 16Bèe mo' efa ŋgǎa yɛ'ni buu Jisǒs à rla' Sisàriyà anà a du wèr wowèe, a lor wèr a du àgho mbe ndàp Nasìn ce e m ba ŋwɛ̌ à ŋgǒŋ Saipròs. A ŋwɛ̀ ce wèr à m ce dù à rcu wèr wowèe. E m ba mò' efa bèe entombì ce a m byemi nè Jisòs.
17Wèr à ka' bà' à rla' Jɛ̀rusalɛ̀m, bfʉr ce a m ba àfo a konì wèr bòŋboŋ sê. 18Tʉ̀' à ka' raa, wèr Pol wèe à du à ryɛ Jɛ̂ms, a ka' bà' a yɛ btu embe cor wɛɛwɛ a Jɛms wèe mbe dǐ' mo'sir. 19Pol à ca'nì wowèe, a suŋ wowèe buu wɛɛwɛ ce Nyʉ̀ à gèe nè bèe enje jɛɛ njo' rfà' ce e m gèe fa wǎp mʉ. 20Wowèe a ka' yu', a ku'si Nyʉ̀, a laa nè Pol enɛ̂, “Nfʉ̂r, wɛ̀ yɛ àmbò Jus ce a byemi a yu à mncʉ̀kì à mncʉ̀kì, wowèe wɛɛwɛ a tʉr ntee à rlɛ̀ ncir sê. 21Bèe a suŋ wowèe enɛ a ce yɛ'ni Jus ce a ce cu à bto' bèe enje jɛɛ enɛ wowèe a fa lɛ̀ mncir Musìs ka', a ce làa nè wowèe enɛ wowèe a fa gèe bʉ̀ ese boo ka', ma' lɛ ndèe to' foŋ. 22Àmbò yi yu na, banɛ sèe be gèe seekɛ? Wowèe a be buu efa ryu' enɛ wèe à vʉ̀ ka'. 23Banɛ à gee yuu ce wèr be suŋ wɛ̀. Wèr tʉr bèe mò' bèe ŋkyèe ce a ye lè' nè Nyʉ̀. 24Lòr nè bèe ca tɛ wèe wowèe du gèe yuu ce ncir yi ce làa enɛ ŋwɛ̀ gee tɛ e bo ba nrara à bsii Nyʉ̀. Fa wowèe mbàa tɛ wowèe a bo koo btu. Wɛ̀ ka' gee wa'a, tɛ ŋwɛ̀ wɛɛwɛ bo rìŋ enɛ buu ce bèe a suŋ àmbò wɛ̀ nà, vi yu mini ka', rìŋ sè'ni enɛ wɛ wɛ̀ foŋ ce lɛ̀ mncir Musìs. 25À ka' ba yi àmbò bèe enje jɛɛ ce a byemi, wèr à saŋ ŋwà' nè wowèe a suŋ yuu ce wèr à cu àbee a lâa. Wèr à làa wernɛ wowèe a fa ye byee ce a fa nè mnyʉ̀ enjep ŋgòŋ na ka', borni efa rye blɛɛ ba mnyàa ce a toosi mndoŋ efa gho, borni bsàkì.”
26Tʉ̀' à ka' raa, Pol à lor bèe anà a wowèe a gee yuu ce ncir yi m ce làa enɛ a gee tɛ a bo ba brara à bsii Nyʉ̀. A wowèe a ka' mìsi, e du mbe Ndàp Nyʉ̀, a suŋ bèe nòŋ ce wowèe a be gèe buu anà mìsi tɛ a bo vʉ̀ fa rfa àtu ŋwɛ̀ wɛɛwɛ.
27Mnòŋ sàamba ca vi ka' kɛ̀' ce mì, Jus mǒ' à ŋgǒŋ Ɛshà à yɛ Pol mbe Ndàp Nyʉ̀. Wowèe a ka' yɛ ye mbo, a barsi bèe fa yě mbùu, a wowèe a koo ye, 28a waa enɛ̂, “Bèe Isrɛ̀l, jà' nè wèr! Ŋwɛ̀ ca a ŋwɛ̀ ce e ce jɛ̀r ce yɛ'ni bèe wɛɛwɛ enɛ yìsèe bèe ba visèe mncir ker ba yìsèe Ndap Nyʉ̀ ca yu yuu ka'. E ker lor bèe enje jɛɛ foŋ a niŋ àgho mbe Ndàp Nyʉ̀, a bepsi dǐ' rara ca yi ba jàpri.” 29Wowèe a m làa wa'a njobè' a m yɛ Trǒfimòs ce à rla' Ɛfɛsòs a Pol wèe à rla' anà, a ce kwà'shi enɛ Pol à m lòr ye a du àgho mbe Ndàp Nyʉ̀. 30Rla' wɛɛwɛ li ci'tì, bèe a caŋsè a vʉse a koo Pôl, a sʉŋ a fʉʉ àgho embe Ndàp Nyʉ̀, a cete ncʉ̀ʉndʉ̀', 31a ce ghèter à ryʉ ye. Nsuŋ à vʉ a ba' ŋwɛ̀ ce e m ba tu nè bsoogɛ̀ ncʉ̀kì enɛ rla' Jɛ̀rusalɛ̀m wɛɛwɛ li jep. 32E lor bsoogɛ̀ mo' ba btu mo' a wowèe a caŋ a du a yɛ ku' kʉr bèe anà. Wowèe a ka' yɛ a bsoogɛ̀ wèe, a borni efa rlìp Pôl. 33Tu bsoogɛ̀ yǐ gòr ca à m koo Pôl, a laa enɛ a kur ye nè bshaŋ bbaa, a bipshi nè bèe enɛ Pol yu nda lɛ, a ker bipshi enɛ e gèe ba kɛ lɛ? 34Bèe mo' efa mʉ̀ kʉr bèe ca a m làa yuu jɛɛ, bèe mo' a laa yuu jɛɛ. Bjep vi ba gòr sê, yi ba àtɛ̀r nè ye à rrìŋ yuu ce yi koni ka', e laa enɛ a lor Pol du àgho mbe barakì. 35Pol à ka' bà' mbe dì' ce a be lò embo ce ko' ko', bèe a gʉmì a yě ndù, bsoogɛ̀ a boŋlàr a byɛ' ye. 36Kʉr bèe ca a m ce dù a yě mbùu a ce ghaa a ce làa enɛ̂, “Yʉ nè ye!”
37A ka' koo Pol tɛ a bo niŋ àgho mbe barakì, e laa nè ŋwɛ̀ ce e m ba tu bsoogɛ̀ yǐ gòr ca nà enɛ̂, “Àde' m laa yuu a?” E beesì enɛ̂, “Banɛ wɛ̌ ke làa li Grěk a? 38Mbò a wɛ̀ ŋwɛ̌ à to' Ijìp ce e m kɛ̀' ŋgɛ', a lor ŋgǎa nyʉshi bèe ncʉ̀kì kyèe à nfè' mò' a du àgho à ntee rìŋ nà a?” 39Pol à beesì enɛ̂, “M yu ŋwɛ̀ Jus ce à rla' Tasǒs à ŋgǒŋ Sìlesìyà ce yu rla' ce li yu àtɛ̀r ka'. Kyer wɛ̀, mà'shi tɛ m laa yuu nè bèe ca.” 40Ŋwɛ̀ anà à ma'shì enɛ e lâa. Pol à tɛɛ mbe dì' ce e m ko' a tɛɛ nà, a naa bo mbekì enɛ bèe a cu nyaŋ. Bèe a ka' cu nyaŋ, e laa nè wowèe à li Hibrù enɛ̂,
Επιλέχθηκαν προς το παρόν:
Ñwaè' Mfaè' Ñgaâa Ntuu Jisoès 21: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.