KAOBAK 47
47
1Hibü Josefei haoeibü jaisi müt ngao leijung hauan Farao to laukei, “Kübou hoba küjai künasi shuong Kanan ka haoeneibü sanshuong, masu hoba haoenei kibü pendou thonan louan Goshen kaonyeka kia.” 2Kho phaia Josefei haoeibü jaisina yoka müt ngao leian hauan Farao la kukei. 3Hobaje Faraoei haoeibü jaisinasi shuong to phekei, “Kaneibü langle ai?” Hobaje haoenei Farao to jongaikei, “Kaibü sambü shuong, kün hoba küneibü pisibousi ka kün sanlombü shuong ki.” 4Haoenei toukei hao to laukei, “Kün hanei longche kila loukei, aieilausi Kanan kaodaka aeibou mühda, hibü kaibü sambü shuongkei sanshuong lamshaushang aki. Hibü kaibü sambü shuong Goshen kaonyeka kitishi dogo künei sudajada.” 5Khünei Faraoei Josef to laukei, “Kabou si kaibü jaisi shuong ka jungto louakei hoba 6Ijep kaodak ka thedanga kia. Hibü kaonyek pendou yoka maiboutham khünei kabou si kaibü jaisi shuong kitishi. Haoen Goshen kaonyeka kitishi; hoba haoen yoa kümsilei lan thükbü at kialonga haoen ngeibü shatsinam samkeisamuk thüka bunyu yeitishima.”
7Kheijinei Josefei haobou Jakob Farao jungto leibakei, hoba Jakobei Farao haükukei. 8Hobaje Faraoei Jakob to phekei, “Kaibü salang lalokche?”
9Jakobei Farao to laukei, “Ngo saopobü wakoua thüngbü po saongaoto khujin. Ngo salang tuisho ong hoba khonkubü chalou ong; hoba künei shangied kübousi shuongeibü po aonlang.” 10Hobaje Jakobei Farao haükuan phaia Farao jungka bangkei. 11Hibü Faraoei sakkubü tegü Josefei haobou si haoeibü jaisi shuong la Ijepa Rameses kaonyek pendou to maibou kao kukei. 12Hobaje Josefei haoboueibü jaisinasi shuong hoba haoboueibü chempen pendou haoen chemdang thüng shaueiyungei sambei.
Mühsinou
13Kaodak pendoua shausiyung aki; aieilausi müh yongko kaangkei, khoei Ijep hoba Kanan kaodak mühei shembei. 14Ijep si Kanan kaodak ka nyakei jekbü nam pendou Josefei yoshaian Farao jungto sungbakei. 15Ladang Ijep si Kanan kaodaka nam khinkei, Ijepbü pendouei Josef jungto louan laukei, “Kün la shausiyung labüma, aieilausi kaibü nyekei hapbo kün lai haila? Küneibü nam yaakshaukhüma.”
16Hibü Josefei laukei, “Khülonga kaneibü shatsinam labüma; nam lekhümalonga, kaneibü samkeisamuk jeila ngei kan la shaubu kukho.” 17Hibü haoenei lulu thüngthüng shatsinam samkeisamuk sungbasi, Josefei haoeneibü koli, san, masu, gadu, hoba samkeisamuk ajanjan lu haoen la nyak jaikukei. Khüpo haoei haoeneibü samkeisamuk shatsinam pendou lu haoen la shausiyung kukei.
18Hobaje khüpo thonan phaia, nyibou poa Josef jungto louan haoenei hao to laukei, “Küneibü bunyu thedanga künei tehukho; nam hoba shatsinam hoba samkeisamuk pendou kho bunyuboueibü, hibü chühashi, küneibü mang hoba kao to liman ai aki; 19aila kaibü nyekei hapbo kün hoba küneibü kao maula? Shaubu lu kün hoba küneibü kao jekashi, hoba küneibü kao yoa kün Faraoeibü aaola lekho. Künla shaubu lilabü labü, khoei kün ühaiko lang kilabü, hoba küneibü sekkei yamla ayeilabü.”
20Kho tegü Ijep kaodak pendou Josefei Farao la jekkukei; aieilausi müh kheinyu kaangsije Ijepbüei anaten, hibü haoen müt wekoei jembü sek yaakkei. Kho Faraoeibü la yeikei, 21hoba Josefei mütshuong kho Ijep kaodak jiae leilang ka jiae leilang thonbü sühko leishaian phokei. 22Lankei ungshedbou shuongeibü kaoje haoei ajek; aieilausi ungshedbou shuongei Farao ka haoeneibü phejan hapbei; hoba ungshedbou shuongei kho shaukei. Khoei haoenei haoeneibü kao ayaak. 23Kheijinei Josefei mütshuong pendou to laukei, “Chühashi, tat ngei kan hoba kaneibü sek Farao shanga jekkua; kan shanga shaubu lilabü ho kanei künan hauan seka wenashi. 24Hobaje khoka lajuche latlaje phejan ngao la janan Farao la che kuashi. Hobaje janletbü ka phejan lei kho kaneibü; khoei kaneibü seka lilabü hoba kan chemdang shanga shausiyung yinglabü.”
25Haoenei laukei, “Nyi kün khümena, küneibü bunyubouei kün to sanoudama, hibü kün Faraoeibü aaola yeikho.” 26Hibü phejan ngao ka che Farao shangabü dogo laukei; khoei tou sühko Ijep kaodaka Josefei khangkubü kho ngühkhüm la yeikei, lausikei ungshedboueibü kaoje Faraoeibü la ayei.
Jakobeibü Thonbü Subüjabü
27 #
Ykj 7.17 Israelbü Ijep kao Goshen kaonyeka sang lekei. Khünei haoen kian keiko yaangko bukko haako aeibou haajung haukei. 28Jakob Ijep kaodaka po anthüknyet kikei, hoba haoeibü salang po saongaoto saonyito nyet kikei. 29Ladang Jakob hailabü jih sühkei, haoei haoshou Josef ngajung louan hao to laukei, “Nyi küto sanoualonga, ngei ho sudajada, nyi kaibü ik ngeibü ikaklang to attiashi, hoba nyi maanglemenko thebülanbü lelabü dogo lenashi. Ngo Ijep a tekhün, 30lausikei shangied ngeibü bousi shuong yoa khüntimang sühda; hibü nyi ngo Ijep kaodak ka künjung hauan haoeneibü heea khünashi.” Hobaje haoei laukei, “Nyi kü to lenbü tegü ngei kümlabü.”
31 #
Ibr 11.21 Haoei laukei, “Nyi khei kümlabü dogo thealanashi.” Kheijinei Josefei hao thea thekeilankei, hoba Israelei haoeibü khukhüma khüpetan lembei.
Zur Zeit ausgewählt:
KAOBAK 47: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
