KAOBAK 48
48
Jakobei Manasse si Efraim Haükubü
1Longche kian phaia müt atei Josef to, “Kabou shatda” dogo lenkei. Hibü haoei haoeibü shounyi, Manasse si Efraim leian haukei. 2Ladang Jakob to, “Kabou Josef ka jungto louakei,” dogo lenkei, kheijinei Israelei haoeibü hau kingaian yepshanga setkei. 3Jakobei Josef to laukei, “Pendou to hau yaangbou Mühghaü Kanan kaodak Luz sanga kü jungto longkei, hoba ngo haükukei. 4Hobaje haoei kü to laukei, ‘Chühashi, ngei no bukkohaako juong haatikulabü. Hobaje ngei no phangyaang mütli yeitilabü, hoba ngei ka phainei kaibü thensilen la ponpen shanga bunyu yeiko kimla ho kaodak kulabü.’
5“Ngo aloujinei Ijep kaodaka kala bukkubü shounyi kho ngeibü; Efraim si Manasse kei Reuben si Simeon tegü ong küshou yinglabü. 6Touje haoen phainei kala lajuche bukkulaje kho kashou la lelabü; hoba haoenei jaisi shuongeibü nyena haoenei kaobunyu yeibü nyen nyenlabü. 7Ngoje Padan Aram ka Kanan kaoa Efrat sühla nyangko Rachel lama kü thedanga haikukei, hoba ngei sao khünei Efrat (kho Bethlehem) to haubü lama khünan apyokei.”
8Kho phaia Israelei Josef shousi shuong hapan phekei, “Habü ho aoyou?”
9Josefei haobou to jongaikei, “Khünyi kho Mühghaüei küla hanei Ijepa kubü shousi ki.” Kheijinei Israelei laukei, “Ngei haosi haükulabü lele haosi kü jungto leiba.” 10Tou Israel baushi sinan kisije haoeibü nyek yuian maisho achühen. Hibü Josefei haosi hao nyangko leian loukei, hoba haoei haosi himlepan sembung shepbei. 11Toukei Israelei Josef to laukei, “Ngei kathe haplep dogo adam; lausikei chühashi, Mühghaüei touje kaibü shousikei küla haptia.” 12Kheijinei Israeleibü you phang ka haoeibü shounyi leian sungan hao thedanga kaoa khüpetkei.
13Kho phaia Josefei ham leian jungan, Efraim Jakobeibü nanaenei hoba Manasse maiaenei dogo jenan lotikei. 14Lausikei haoeibü mai ik shingan Efraim khua shangkei, hao nashoubou yingasikei; hoba haoeibü ik peiyoan, haoei haoeibü nanae ikei Manasse khua shangkei, hao shaangbü shou yingasikei. 15Tou haoei Josef haükuko laukei,
“Laobou Mühghaü thedanga shangied küpi kübousi shuong,
Abraham hoba Isak paikei,
laobou Mühghaüei tou sühko ngeibü langkei salang sünga ngo sambei:
16Hobaje laobou hangangbüei amaibü pendou ka ngo
püetkei, haoei nashou nyi ho haükushima.
Hobaje ngeibü nyena hoba shangied küpi kübousi shuong Abraham si Isak nyena haoen ngalabü;
hoba kaodaka haoen aeibou haako yaangko kitishima.”
17Ladang Josefei boueibü mai ikei Efraimeibü khua shangetan hapbei, hao maang ühai, hoba Efraimeibü khu ka Manaseeibü khua shangettila shanga boueibü ika jungkei. 18Hobaje Josefei bou to laukei, “Abou, kho khei touma, ho jaishoubou haoeibü khua kaibü mai ikei shangetshima.”
19Lausikei bouei ngüha aleko laukei, “Ngei shenakei. Küshou ngei ngeakei, ho phangyaang che yeilabü, hoba yaangenbü che yeilabü. Lausikei haona kho hao to yaangbou yinglabü, aishanga haoeibü thensilen kho phangshuong yaangbü che la yeilabü.”
20Khünyet chalou haoei haoen haükuko laukei, “Ka nyen phongko Israelei haülabü kuko laulabü, ‘Mühghaüei no Efraim si Manasse tegü yeitishi.’ ” Kho khei Jakobei Manasse to Efraim shaangtikei.
21Kheijinei Jakobei Josef to laukei, “Chühashi, ngo haida, lausikei Mühghaü kan yoa kilabü, hoba haoei kan pi kaodak to leian ngailabü. 22Hobaje kala, ao jaisi shuong thüka ki, ngei laobou Amorbü ka ngeibü inlou si laujinei soletbü haabü kaophei Shekhem ki, kho aeila kuda.”
Zur Zeit ausgewählt:
KAOBAK 48: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
