KAOBAK 46
46
Jakob Chemdang Ijep to Haubü
1Hibü Israelei haoei kibü pendou aakjung haukei hoba Beersheba sühan haobou Isak Mühghaü to lembei. 2Hobaje Mühghaüei nangnak mangha Israel to lenkei, “Jakob, Jakob!” Hobaje haoei jongaikei, “Ngo hanei kia.”
3Hobaje haoei laukei, “Ngo Mühghaü, kaboueibü Mühghaü. No Ijep kaodak to haula tehütma; aishanga ngei khünei no phang yaang yeitikulabü. 4Ngo ka yoa Ijep kaodak to haulabü, hoba ngei no maimaitham leingaibalabü. Hobaje Josefeibü ikei maimai ka nyeka yembulabü.”
5Hobaje Jakob Beersheba ka meimeijung haukei, hoba Israeleibü shousi shuongei haoeneibü bou Jakob hoba lulueibü shousina shuong hoba yaksi shuong Faraoei hautibü kailong to angtian leian haukei. 6#Ykj 7.15 Hobaje haoenei lulueibü shatsinam hoba Kanan kaodaka ai peisilei ki kho pendou künan Jakob hoba haoeibü chempen pendou Ijep kaodak to haukei. 7Khei haoei haoeibü shousi nouyang jayangshou hoba shisi shousi hoba thensilen khümbo hao yoa Ijep kaodak to leian haukei.
8Ijep kaodak to haubü Israel shousi shuong nyen habü ho: Jakob hoba haoeibü shousi shuong: Jakobeibü shou jaishoubou Reuben, 9Reubeneibü shousi shuong: Hanok, Pallu, Hezron, hoba Karmi, 10Simoeneibü shousi shuong: Jemuel, Jamin, Ohad, Jakin, Zohar, hoba Kanan soei bukbü shou Shaul. 11Levi shousi shuong: Gershon, Kohat, hoba Merari. 12Jihuda shousi shuong: Er, Onan, Shela, Perez, hoba Zera (lausikei Er si Onanje Kanan kaodaka haikei.) Perez shousi shuong: Hezron si Hamul. 13Issakar shousi shuong: Tola, Pua, Jashub, hoba Shimron. 14Zebulun shousi shuong: Sered, Elon, hoba Jaleel. 15Padan Arama kijinei Leaei Jakob la nouyangnyu Dina to liman bukkubü bousushou shuong ki. Hobaje nouyang jaiyangshou shuong pendouei müt khujinto sem kikei.
16Hobaje Gad shousi shuong: Zefon, Haggi, Shuni, Ezbon, Eri, Arodi hoba Areli. 17Asher shousi shuong: Imna, Ishva, Ishvi, hoba Beria. Haoeneibü na yaksa Sera kikei. Beria shousi shuong: Heber si Malkiel. 18Habü ho Labanei jembü nouyangshou Lea la kubü Zilpa shousi hoba saoei Jakob la müt anthüklak bukkukei.
19Jakob yak Racheleibü shou Josef si Benjamin. 20Hobaje Ona ungshedbou Potifera nouyangnyu Asenatei Ijepa Josef la bukkubü shounyi: Manasse hoba Efraim. 21Hobaje Benjamin shousi shuong: Bela, Beker, Ashbel, Gera, Naman, Ehi, Rosh, Muppim, Huppim hoba Ard. 22Jakob la Rachelei bukkubü shousi shuong pendouei müt anthüklei.
23Dan shou Hushim. 24Hobaje Naftali shousi shuong: Jazel, Guni, Jezer, hoba Shillem. 25Labanei haoshou nouyangnyu Rachel la kubü Bilha shousi shuong pendouei müt nyet.
26Jakob ka bakbü hoba hao yoa Ijep to haubü, haoeibü shousieibü yaksi shuong aweko, pendouei müt saosemto lak. 27Ijep kaodaka bukbü Josefeibü shounyi wean Ijep kaodak to haubü Jakob chempen pendouei müt anjinlei kikei.
Jakob hoba Hao Chemdang Ijepa Kibü
28Tou Goshen kaonyek to lamlela shanga Jakobei Jihuda hao thedangto Josef jungto hautikei. Ladang haoen hauan Goshen kaodak sühkei, 29kheijinei Josefei haoeibü kailong lamlean haobou Israel shuokla Goshen kaonyek to haukei. Josef hao thedanga sühlangsi lengko hao boueibü ngüma souan haaptanglekei. 30Kheijinei Israelei Josef to laukei, “Touje ngo haila somakei, aieilausi tou sühko no lang kian ngei kathe hapa.”
31Kheijinei Josefei haoeibü jaisishuong si haobou chempen to laukei, “Ngo hauan Farao to ho lenkho, ‘Kanan kaodaka kibü ngeibü jaisinasi shuong hoba kübou chempen kü jungto louakei. 32Haoen sanlombü shuong, aieilausi haoen shatsinam sambü shuong kikei, haoenei haoeneibü san, masu shuong hoba ajanjan pendou sungbakei.’ 33Ladang Faraoei kan ngaan, ‘Kan ai lamshauko kibü shuong?’ dogo phelaje 34kheijinei kanei hai jongaishima, ‘Khei kaibü sambü shuong, küneibü pisi shuongei kümbü tegü, nashoudang ka tou sühko shatsinam, samkeisamuk thounoubü müt ki.’ Kheijinei kan Goshen kaoa kila sakkulabü, aishanga sanlombü shuongje Ijepbüei mangsenda.”
Zur Zeit ausgewählt:
KAOBAK 46: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
