LEIYENBÜ 9
9
Meisiau Lim
1Kheijinei Bunyubouei Mosa to laukei, “Farao jungto hauan hao to lenshi, Ibri Mühghaü, Bunyubouei hai lauda: ‘Haoenei kü to lemtila ngeibü mütshuong hautiashi. 2Nyi haoen ohautiko toukei senetnyu phoalonga, 3chühashi, khongthua ngei samkeisamuk, shatsinam, koli, gadu, ut, masu shuong hoba sanshuong thükto lim aeibou kaangbü longtiko Bunyubouei ik atlabü. 4Lausikei Israelbü samkeisamuk si Ijepbü samkeisamuk kanglanga Bunyubouei janyinkulabü; hoba Israel shousi shuongeibüje aikei ühailabü.’ ” 5Hobaje Bunyubouei jih che takletan laukei, “Ngiet kaonyeka ngei habü ho kümlabü.”
6Nyibounyet Bunyubouei ho kümbei, hoba Ijepbüeibü samkeisamuk, shatsinam pendou haikukei, lausikei Israel shousi shuongeibü shatsinam hoba samkeisamukje che ongkei ühai. 7Faraoei mütshuong pheila hautisi Israelbüeibü samkeisamukje che ongkei ühaiko kikei. Lausikei Faraoeibü maangpon anyaakeiko kikei, hoba haoei mütshuong ohauti.
Takshou Lim
8Kheijinei Bunyubouei Mosa si Aron to laukei, “Hokjung ka tap ikmok che sungan Farao thedanga Mosaei kuito phinan angtiashi. 9#Tk 16.2 Hobaje khoei Ijep kaodaka thamngu hanbüla yeilabü.” 10Hibü haosiei hokjung ka tap mokjung louan Farao thedanga lokei, hoba Mosaei kho kuito phinan angtikei; hoba khoei müt si meisiau la bokla yeikei. 11Hobaje takshou mouei huonseibü shuong Mosa thedanga aloen. 12Lausikei Bunyubouei Faraoeibü maangpon kaangtikei, hoba Bunyubouei lenbü tegütham haoei Mosa si Aron to ngüha aleku.
Sen Lottibü
13Kheijinei Bunyubouei Mosa to laushi, “Ngeyang enyu pian Farao thedanga loan hao to laushi: Ibri Mühghaü Bunyubouei hai lauda, ‘Haoenei kü to lemtila kü mütshuong hautiashi. 14Aishanga kao thea ngo tegübü ao aki dogo nyi ngela shanga ngeibü shieikoe pendou ka thükto hoba kaibü yaangenbü shuong thükto, hoba ka mütshuong thükto ngei hautilabü. 15Aieilausi haijih dangaje ngei no hoba ka mütshuong shatsinyatei khonkutiko no kao ka wapan apan kikhoulabü. 16#Rom 9.17 Lausikei ka la ngeibü hau lenla hoba ngeibü nyen kaonyudak pendoua phinthonla shanga nyekchüh phoan ngei ka langkei phokukei. 17Lankei tou sühko nyi haoen tohautikho dogo kü mütshuong khulimbo no lolo yaangenda. 18Chühashi, ngiet haijinei Ijep sang lebü chalou ka tat sühko ladangkei lotan achühbü senlaang aeibou kaangko ngei yantikulabü. 19Hibü tou kaibü samkeisamuk shatsinam shuong hoba khongthua kibü pendou leishaila hautiashi; aieilausi khongthua kibü müt hoba shatsinam weko chem to aleibabü thükto senlaang lotlabü hoba haoen hailabü.’ ” 20Farao khangenbü yaangbü shuong aoyouei Bunyubou ngüh to hatkei haoenei haoeneibü sambü shuong si samkeisamuk hoba shatsinam chemmanga leiyetnyu phokei. 21Lausikei aoyouei Bunyubou ngüha ale, haoenei lulueibü sambü shuong si shatsinam khongthua apyokei.
22Kheijinei Bunyubouei Mosa to laukei, “Ijep kaodak pendoua müt, meisiau, shatsinam hoba kesiong pendou thükto senlaang attila shanga müh to kaibü ik shingashi.” 23#Tk 8.7 Hobaje Mosaei haoeibü ik mühae shingkei, hoba Bunyubouei langmak si senlaang yantikei, hoba kao to langponei phaükei. Hibü Bunyubouei Ijep kaodak to senlaang yantikukei; 24hoba senlaang si langpon sepeisai yantikei. Ijep kaodak phangche yeian ladangkei haüthükan achühbü amaiboutham ho kikei. 25Ijep khümboa, khongthua kibü pendou, müt si meisiau, shatsinam pendou to senlaangei tetkei, hoba senlaang khoei seka kesiong hoba yama bulong pendou tetngokkukei. 26Israel shousi kishang Goshen kaodaka ong senlaang üat.
27Faraoei Mosa si Aron to laukei, “Toubüa ngei shabü shona; Bunyubou kho ngühmai, ngo hoba kü mütshuong shedbü. 28Bunyubou to sukujakushi; aieilausi kün langmak si senlaang habü hoei soua. Ngei kan hautilabü hoba touje kan lounyu tethüng.”
29Mosaei hao to laukei, “Ngo sangnyu ka satbüyam ngeibü ik shingan Bunyubou to sulajalabü. Hobaje kaodak ho Bunyuboueibü dogo ngelabü lele langmak thaklabü, hoba senlaang touje akilabü. 30Lausikei ngei ngeakei no hoba kaibü khangenbü shuongei toukei Bunyubou Mühghaü to ühütda.” 31(Phemba si barli youshou leilukhümbei; aieilausi barli youshou nyenan kikei, hoba phemba tongko kikei. 32Lausikei whet youshou aleilu; aieilausi khübü kho mo anyenko kikei.)
33Hobaje Mosaei sangnyu apyojung satkei. Haoei ik tuokan Bunyubou to sukeijakei; hoba langmak makbü si senlaang atbü thakkei, hoba touje kaodaka lang alou. 34Lausikei ladang Faraoei lang, senlaang hoba langmak thakbü hapbei haoei toukei shabü shonkei. Hao hoba hao khangenbü shuong maangpon kaangngaikei. 35Hobaje Mosa danko Bunyubouei joyobü tegü Farao maangpon kaangngaikei hoba haoei Israel shousi shuong ohauti.
Zur Zeit ausgewählt:
LEIYENBÜ 9: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
