LEIYENBÜ 8
8
Yuk Pühbü
1Kheijinei Bunyubouei Mosa to laukei, “Farao jungto hauan hai laushi: Bunyubouei hai lauda, ‘Haoenei kü to lemlabü lele kü mütshuong hautishi. 2Nyi ohautilonga, ngei kaibü kaonyek khümboa yuk pühtilabü. 3Hobaje shumanga yuk shoonglabü. Haoen shoongbü ka kaibü chobachem to longlabü hoba yepshangpob to lotlabü, hoba kaibü yepshang thükto hoba kaibü khangenbü shuong chem to hoba eikshuong thükto hoba wentek phau maangto, hoba wentek nyatbü phau maangto lotlabü. 4Yuk shuong ka thükto, kaibü eikshuong hoba no khangenbü shuong thükto pükjung longlabü.’”
5Hobaje Bunyubouei Mosa to laukei, “Aron to lenashi, shumang shuong hoba shushou shuonga hoba thimdeia ka ika kibü ju kho jungan ik shingashi, hoba Ijep kaodaka yuk paktiashi.” 6Hibü Aronei Ijep kaodak kabü dei thüka haoeibü ik shingkei hoba yuk pakan Ijep kaodak shenkei. 7-8Lausikei huonseibü shuongeikei thapboseiko kho tegü kümbei hoba Ijep kaodaka yuk pakktikei.
9Hobaje Mosaei Farao to laukei, “Sanoudambo nyi lenshi, no hoba kaneibü chem ka yuk shuong mautikuan Nail shumanga ong kishi dogo ka shanga hoba kaibü khangenbü shuong shanga hoba kaibü eikshuong shanga ladang sukujakula?” 10Faraoei laukei, “Ngiet sukujakushi.” Mosaei jongaikei, “Bunyubou küneibü Mühghaü tegü lubü aki dogo ngela shanga kaibü ngüh tegü yingshi. 11Ka ka, ka chem ka, hoba no khangenbü, hoba kaibü eikshuong ka, yuk satkulabü; haoen Nail shumanga ong kilabü.” 12Kheijinei Mosa si Aronei Farao apyokei, hoba Farao khulimbo yuk pühtibü shanga Mosaei Bunyubou to welaukei. 13Hobaje Bunyubouei Mosaei phebü tegü kümbei; hoba chem ka, sek ka hoba khong ka, yuk shuong kho shemtikei. 14Hobaje haoenei kho shaang shaanga yoshaikei hoba kaonyeka nyaülüm hikei. 15Lausikei ladang Faraoei jemmailangbü hapbei, Bunyubouei joyobü tegü haoeibü maangpon kaangngaikei, hoba haosi to ngüha ale.
Haatsihek
16 Bunyubouei Mosa to laukei, “Aron to haoeibü juei kao to ngümshi laushi; kheijinei Ijep kaodak pendoua haatsihek paklabü.” 17Haosiei kho tegü kümbei, hoba Aronei ju jungan haoeibü ik shingan kaoa thamngu to ngümsi müt si meisiau to haatsihek pakkei. Kaoa thamngu pendouei Ijep kaoa haatsihek la yeikei. 18Hobaje huonseibü shuongeikei thapboseiko haatsihek paktila haujembei lausikei athük. Hobaje müt si meisiau to haatsihek kikei. 19Kheijinei huonseibü shuongei Farao to laukei, “Ho Mühghaüeibü ikjishou ki!” Lausikei Bunyubouei laubü tegü Faraoeibü maangpon kaangngaikei, hoba haoei haosi to ngüha ale.
Meishou
20 Bunyubouei Mosa to laukei, “Ngeyang enyu pian Farao haiyeiko kishi, hoba hao dei to haujinei hao to lenshi: Bunyubouei hai lauda: ‘Haoenei kü to lemtila shanga kü mütshuong hautiashi. 21Nyi kü mütshuong ohautilonga ka thükto, kaibü khangenbü shuong thükto, ka mütli thükto hoba ka chemto meishou shuong hautilabü. Ijepbü chem hoba haoen kishang meishouei shentilabü. 22Lausikei kaodaka ngo Bunyubou dogo nyi ngela shanga ngei khünyetje kü mütshuong kishang Goshen kao jaletan pholabü, hoba khonei meishou akilabü. 23Ngei kü mütshuong si ka mütshuong kanglanga janyinan pholabü. Ho seikümseilei ngiet loushedlabü.’ ” 24Bunyubouei kho tegü kümbei, hoba meishou shuong Farao Chobachem to hoba hao khangenbü shuong chem to lotkei; hoba Ijep kaodak pendoua leilukukei.
25Kheijinei Faraoei Mosa si Aron ngaan laukei, “Kan hauan ho kaonyeka kaneibü Mühghaü lemashi.”
26Lausikei Mosaei laukei, “Khei kümjan aying. Aishanga Ijepbüei mangsenbü Bunyubou küneibü Mühghaü to lemlabü ki. Künei Ijepbüei mangsenbü haoen thedanga lemsi haoenei kün to laangei atetlepsi? 27Haoei kün la sakkubü tegü chalou semnyet lam to kouan Bunyubou küneibü Mühghaü to lemjan.”
28Faraoei laukei, “Yama Bunyubou kaneibü Mühghaü to lemla shanga ngei kan hautikho, lausikei kan ong saako asatjan. Kü shanga sukujakuashi.”
29Mosaei laukei, “Ngo ka jungka satbüyam Farao ka, hao khangenbü ka hoba hao mütshuong ka ngiet meishou shuong sattikula ngei Bunyubou to sulajalabü. Bunyubou to lemla shanga mütshuong ohautilabü dogo lauko Farao ong teyepeima.”
30Mosa Farao jungka hauan Bunyubou to sukeijakei; 31hoba Bunyubouei Mosaei phebü küm bei. Farao ka, hao khangenbü ka, hoba haoeibü eikshuong ka mei shou kuktikukei; hoba che ongkei ajou. 32Lausikei toukei Faraoeibü maangpon kaangngaikei hoba haoei mütshuong ohauti.
Zur Zeit ausgewählt:
LEIYENBÜ 8: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
