LEIYENBÜ 10
10
Koksüng Pühbü
1Kheijinei Bunyubouei Mosa to laukei, “Farao jungto hauashi, aishanga haoen yoa habü seikümseilei lenla shanga ngei haoeibü maangpon hoba hao khangenbü shuong maangpon kaangtia, 2hoba ngei Ijepbü thüka ai seikümseilei kümbei, kho nyi kaibü shilashoula lenla shanga hoba kanei ngo Bunyubou ki dogo ngela shanga ki.”
3 #
Jkb 4.10 Hibü Mosa si Aron Farao jungto hauan laukei, “Ibri Mühghaü, Bunyubouei hai lauda, ‘Kü thedanga no hanbü la yeila lalokche tulasekla? Haoenei kü to lemtila kü mütshuong hautiashi. 4Nyi kü mütshuong ohautilonga, chühashi, ngiet ngei kaibü kaonyek to koksüng hautikulabü. 5Aoeikei kaodak ühüplabü lele haoenei kao yepleplabü; hoba senlaang ka satenan kan shanga jouan kibü kho haoenei künlabü, hoba yama kan shanga yeman kibü busidei pendou shaulabü. 6Hobaje kaibü chem, hoba no khangenbü shuong pendoueibü chem hoba Ijepbü chem pendou shenlabü, hoba kaibü pisishuong hoba kaibü bousi shuongeikei kaonyudaka kian tat sühkoa kho tegü hapan achüh.’” Hobaje Mosaei Farao apyoan sepeinyu ngaikei.
7Faraoeibü khangenbü yaangbü shuongei hao to laukei, “Ho mütei sen la lalokche khonsak kula? Haoeneibü Mühghaü Bunyubou lemtila shanga mütshuong hautiashi. Ijep lusaka dogo nyi tou sühko dambo alouda lo?”
8Hibü Mosa si Aron Farao jungto leibaan haoei haosi to laukei, “Hauashi, kaneibü Mühghaü Bunyubou to lemashi, lausikei aoyou hauda?”
9Mosaei jongaikei, “Kün küneibü nashou si baushi noushou shuong, hoba küneibü jayang nouyang shuong, hoba küneibü sanlon si masu shuong leian haulabü; aishanga künei Bunyubou shanga lem lilabü.”
10Hobaje haoei haosi to laukei, “Ngei kan hoba kaneibü shousiyak hautialonga, Bunyubou kan yoa kishi! Maangsangashi, kan dambü amaibü kia. 11Kho tegü aying, tou kan bousu shuong hauashi hoba Bunyubou to lemashi; aieilausi kho kanei mangsühbü ki.” Hobaje Farao jungka haosi shian sattikei.
12Kheijinei Bunyubouei Mosa to laukei, “Ijep kaodak to koksüng louan, kaonyeka kibü buyikdeiyik pendou hoba senlaangei joutibü shautila shanga Ijep thükto kaibü ik shingashi.” 13Hibü Mosaei haoeibü ju Ijep thükto tuoksije khünyet hoba khüyou langyang pendou chaangbou yei kaonyek thükto loukei. Ngeyangje chaangbou yei khoei koksüng soubaan kikei. 14Hobaje koksüng kho shoongjung hauan Ijep kaodak pendou phambo pakkei, haoen shuong aeibou yaangan kikei; khübü koksüng tegü shangied ladangkei louan achüh, hoba ho phaiakei aloulabü. 15Haoenei kaothe khümboa paklepsije kaonyek nakthühtham aptikei. Hobaje kaonyeka buyikdeiyik senlaangei apbuan joubü pendou hoba bulonga buhek pendou haoenei shaukei; hoba Ijep kaodak pendoua khongthua buyikdeiyik yingsikei, kesiong yingsikei sangtüngbü aikei ajouti.
16Kheijinei Faraoei panteiko Mosa si Aron ngaan laukei, “Ngei Bunyubou kaneibü Mühghaü hoba kan khulimbo shabü shona. 17Hibü toukei ngeibü shabü apbushi dogo ngei sudajada, hoba Bunyubou kaibü Mühghaü to kü ka ho hailabü lim langkula sukojakushi.” 18Hobaje Mosa Farao jungka longan Bunyubou to sukeijakei. 19Hobaje Bunyubouei chanep yei aeibou kaangbü sepeitiko koksüng leishaian haoen Saklangbü Yungnyu to souan jinkukei; hoba Ijep kaophei pendoua koksüng che ongkei ajou. 20Lausikei Bunyubouei Farao maangpon kaangtikei, hoba haoei Israel shousi shuong ohauti.
Nangnaktibü
21Kheijinei Bunyubouei Mosa to laukei, “Ijep kaodak thüka daomau louan mütshuongei youei juiko kila shanga nyi kaibü ik mühae shingashi.” 22Hibü Mosaei haoeibü ik mühae to shingkei, hoba chalou sem Ijep kaodak pendoua nakshounaknyu daomau kikei. 23Hobaje haoen cheei che ühüpyoko apbei, ayingsi chalou sem jembü kishang ka ameimei; lausikei Israel shousi shuong pendou haoen kishanga ngesakbü kikei.
24Kheijinei Faraoei Mosa ngaan laukei, “Kan hauan Bunyubou to lemshi. Kaneibü shousi yakkei kan yoa leiashi; lausikei kaneibü sanlon shuong si masu shuong ong apyoashi.”
25Lausikei Mosaei laukei, “Kholonga Bunyubou küneibü Mühghaü to lemla shanga künla lemlabü hoba juokbü lembü shuong nyi kujan. 26Küneibü shatsinam shuong kün yoa haujan; hoba haak che ongkei phainei üpyolabü; aieilausi kho khei Bunyubou küneibü Mühghaü to lemla künei kümjan; hoba künei aiei Bunyubou to lemla kho asühshongko künei angelabü.”
27Lausikei Bunyubouei Farao maangpon kaangtikei, hoba haoei haoen ohauti. 28Hobaje Faraoei hao to laukei, “Kü jungka satan apashi! Touje kü the ühüpla no lolo maangsangashi. Nyi kü the hapnyet no hailabü.”
29 #
Ibr 11.27 “Nyi laubü tegü yingshi. Ngo ka thea nyiboula ühüplabü,” dogo Mosaei jongaikei.
Zur Zeit ausgewählt:
LEIYENBÜ 10: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
