LEIYENBÜ 11
11
Shaang Bukbü Haila Mosaei Ngetibü
1Kheijinei Bunyubouei Mosa to laukei, “Toukei ngei Farao si Ijep thükto shieikoe che loutilabü. Kho phaia haoei kan haka hautilabü, haoei ladang kan hautilaje haoei kan khümbomeiko shian aplabü. 2Israel shousi mütpem weko to lenashi; bousu wekoei jembü lepbou ka hoba yaksa wekoei saoeibü lepbü ka chandinam hoba honeibü chisiyak hiashi.” 3(Hobaje Ijep mütli thedanga maangshik hapla Bunyubouei mütshuong la kukei. Khoto liman Ijep kaodaka hoba Farao khangenbü shuong thedanga hoba mütshuong thedanga Mosa aeibou haangan yaang kikei).
4Kheijinei Mosaei choba to laukei, “Bunyubouei hai lauda, Saotometuphanga ngo Ijep nakjung danlabü; 5hoba Ijep kaodaka shaangbü bukbü pendou choba setshanga setbü Faraoeibü jayangshou ka khangan shemshi maanga kibü sambü saoeibü jayangshou sühko hoba shaang shatbü shatsinam pendou hailabü. 6Hobaje Ijep kaodak pendoua haapyobü kilabü, hoba kho tegübü ladangkei ditan achüh hoba ho phaiakei aditlabü. 7Lausikei Ijep si Israelbü ham kanglanga Bunyubouei ailai lulu jungeida kho kanei ngela shanga Israel shousi aotokei müt ayingsi meisiau aitokei kei cheei ongkei angounglabü. 8Hobaje no khangenbü shuong pendou kü jungto louan haoen lulu khüpetan laulabü; ‘No hoba ka phainei sembü mütshuong pendou hauashi!’ Kho phaia ong ngo haulabü.” Hobaje Mosa Farao jungka aeibou khauangko satkei.
9Kheijinei Bunyubouei Mosa to laukei. “Ijep kaodaka ngeibü maangpanglabü seikümseilei haatilabü laüa Faraoei kaibü ngüha alekulabü.” 10Mosa si Aronei khübü maangpanglabü, seikümseilei pendou Farao thedanga kümbei, lausikei Bunyubouei Farao maangpon kaangtikei, hoba haoei Israel shousi shuong haoeibü kaonyek ka ohauti.
Zur Zeit ausgewählt:
LEIYENBÜ 11: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
