Galesia 5
5
Ape' wafifipai mope wafifipa endilisi
1Krais atona natagahepa mape wafifipa. Amama atom dei' ipe' pitu la'ifipa. Ina ata' pi'i aho'ma enis epes si'ipipa pitanima pepe pila mi'uli anama esis Juda sailanai wapoti', owa'.
2Peme', ae' Pol a'ipipa amama. I'i ipe' pi'i aho'ma amam motopa'mepa alop, Krais ina nagiambamepa, owa'. 3A'i i'ipa ipe' amam hipei wapoti'. Emi aman ni'i aho'ma motopa'mana alop ananinai, anan nila mi'uli anama hianai hi'ilana. 4I'i ipe' pa'i pila mi'uli anama ma nambimb God ni'i ipe' epes bu'upei, ipe' pakwaha Krais pefalana bounai, ea' pelolama waf God nagiambamapa na'a pakwahona. 5Ea' owa' etin. Ape' mombale'efa Kraisa pepel Ambal Bu'unai Godi. Ea' mogawa endilisi mape mohafa anona nemaf God ni'i ape' bu'upai ma okom ananinai. 6Emi egafis sepe la'ifisa Krais Jisas, waf anama matopa' alopanai o owa' motopa' alopanai anama falafunai atona owa' la'ifina. Ea' waf sombale'efa Krais atona nawalapai waf ukup maimailasanai. Amama bu'wami endilisi mikila'. 7Fowa' ipe' pape panda' waf bu'unai pailana andeande'. Ea' dei' ata' emi nahopa eafa ipe' ma owa' pila basef endilisimi wapoti? Emi namboma ukup ipe'imi pakwaha basef amama? 8God ina nanda'epa na'ama, owa'. Anan nofalepa pafi'mai anan. 9#1 Ko 5:6Anom basef ma'i na'ama ma'i, “Anom yis manda' bret natifi, amama manda' bret hianai nataga lu'una.”
10Ae' alomepa ukup etifim mape la'ifim maloma Dembinai. Ea' egawepa ipe' nambimb ina pila anom basef, owa'. Pila okom ae'anai atona. Ae' ina egawa aman anama namboma ukup ipe'imi, owa'. Ea' hapainai, anan nanda' waf aonai anona nemaf God nose'ana nimanimi. 11Ipe' sahin owan ae'ipei, i'i endilisi ae' awalipipa ma basef amama patopa' alopanai, dei' maina esis sa'i sose'e nimanimi? I'i ae' i'ipipa basef amama, esis ina si'i sehe, owa'. Ea' ae' a'ipipa basef bu'wami ma Krais naga' lawag usi'inai tu'wanainai. Ea' esis ukup aom sa'i sose'e nimanimi. 12Amam amama mamboma opalef ipe'imi, andeande'ma motopa'mama alop anama tu'wanina amamunai atona hi'ilana!#Basef amama ofagema biefim. Anom ma'i si'i sagi popas bogofi nombagw. Amama Pol na'ipa amam mambaso'ami basef la'ifimi. Ea' anom ma'i amam amama makwaha sombale'efa Krais ma mope laogon.
13Endilisi ipe' sahin owan, God nofalipei ma pepe wafifipa andeande'. Na'ama ipe' ukup mi'i, ape' mape andeande' wafifipa, dei' andeande'ma monda' waf alop atona. Ipe' ina ukup mi'i na'ama owa'. Ipe' ukup mimila sahin owan ipe'isi penda' maol etifigin pindagigiambanama. 14Dei' main, mi'uli God naso' Mosesanai hianai nape nomona basef amama atom ma'i, “Ipe' ukup mimila epes isima hiesi si'i ukup maila ipe' etipa.”
15I'i ipe' penda' lopa' fitap nope la'afena ipe' etipa, ipe' pindumafuma andeande'. Na'ama ipe' hipei pendakolas pesa pewala etin!
Waf dambainai ma Ambal Bu'unai Godi naloma waf saila opalef apimi
16 # Ro 8:4; Ga 5:25 Basef ae' a'iami amama. Ipe' pembale'efa Ambal Bu'unai Godi pefe'. I'i ipe' pilam penda'am na'ama, ina anona nemaf pila waf apinai, owa'. 17#Ro 7:15,23; 1 Pi 2:11Ape' mogawa opaf apinai na'i nohogofa Ambal Bu'unai Godi, ea' Ambal Godi na'i nohogofa opaf apinai. Amam biam mandahihianama mafitap mape. Ea' amamaga ipe' pa'i pienda'ami ina la'ifipama panda'am, owa'. 18I'i ipe' pila Ambal Bu'unai Godi atona, ipe' ina ata' pila mi'uli esis Juda sailanai, owa'.
19Waf opaf apinai epes hiesi sogawana ea' nape alihina. Anama na'ama. So'a waol, waf aonai, ukup mohafema waf aonai, 20sandagala sanifela god baso'omunai, sanda' mu'uhup, sanda' ufial ma'akw, waf nefala enis naumbih, ukup mapoma esis etis, lopa' fitap, waf kowalasa anom amamaga enis epesi, ukup wandafum, basef wandafumi sondaha pepe'ma biefis, sowala wambotagw, 21ukup aoma kowalasa amamaga enis epesi, sanda' spak sahaga sagaol, sa' gwa'aimi maloma embel la'ifimi hiami ma sanda' awalef awami, ea' waf naninani aonai na'ama. Fowa' a'ipipa dei' i'ipipa wapoti'. Emi egafis sanda' waf anama aonai, anona nemaf ina sefe' suwis wambel Godi, owa'.
22Ea' Ambal Bu'unai Godi nawalapai waf bu'unai na'ama. Waf ukup maimaila enis epes, danifel, opalef awanemi, waf nape natilisa sonda'mena waf aonai, waf sati uwahipisanai, waf ukup bo'oma enis epes nigiambamas, nanda' amamaga andeande' ma naep epesi God wapoti', 23waf so'umbilanai, naloma waf ukup bo'omi mapaisa sumafi alop andeande'. Owa' anom basefa mi'uli atotona nape lu'una nikila' waf anama bu'unai, owa'. 24Emi egafis Krais Jisasi saunda opalef apimi mail lawag usi'inai tu'wanainai maloma waf naninani ukup mohafemanai naloma naninani aonai. 25Ambal Bu'unai Godi atona nase'apa ambal namunai napaipa. Ea' dei' ape' mila waf ananinai mefe'. 26Ape' ina mosambala basef mefela agof ape'imi atom, mi'i basef moloma alupusi ape'isi mondahihianamama anona waf, owa'. Ape' ina kowalapa ma enis epes soloma amamaga asasimi, owa'.
Zur Zeit ausgewählt:
Galesia 5: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.