Galesia 4
4
Ape' fowa' mape owina waf aonai dei' Krais atona nanda'apa mataga awasi Godi
1Basef ae'ami mape na'ama. Nogalomana nali'i anama owagama nofa' amamaga ahalomanai. Ea' anan ata' sa'ona sanda'ana nape owina anona aman dembinai. Ea' endilisi amamaga hiami ahalomanai, nogalomanai atom. 2Nemaf anama nogalomana ata' so'uso'win, nape owina agufumi mumafianama gwa'aimi otamba maim nafe' nafe'ma nemaf ahalomana nandandepanai nataga. Nemaf anama amam ina ata' mumafiana wapoti', owa'. 3Ape' wapoti' mape na'ama etin si'i nogalomana anama. Fowa' ape' ata' owa' mombale'efa basef Godi andeande', nogota anama ata' manda' maol mape owina mi'uli Godi naso' Moses anai o ambagof awami dembemi mumafi amamaga hiami mape ilif etapi. 4Ea' nogota anama God na'ianai nataga, anan nasapa' Nogalomana ananinai nafi'i etap anae'. Ano'w nemata'w kolana nataga epen nape owina mi'uli esis Juda sailanai. 5Natagahepa ma mi'uli anama nembalo'apa ea' natalepa ma mape wafifipa. Nanda'am na'ama ma God dei' nefa'apa numafiapa mape awasi ananipai endilisi.
6Ape' mape awasi ananipai. Amama atom dei' God nase'apa Ambal Bu'unai Nogalomanai nawis opalef ape'imi. Ambal anama nalef nofalana na'i, “Ahalome, Ahalome!” 7Dei' ipe' ina pape panda' maol pape owina enis epes agof a'epa, pape owina ambagof amama awami, owa'. Ipe' awasi ananipai. Owagama God nose'epa amamaga bu'wami hiami nandondombam ma'omepa nease'epam.
Pol okom nainaila endilisi esis Kristen sape Galesiai
8 # 1 Ko 8:4-6 Fowa' ipe' owa' ata' pegawa God, pape panda' maol aonai pape la'ifipa pail ambagof awami etapami. Amam ina endilisimi, owa'. 9Dei' ipe' pegawa God. Ea' endilisi, Anan nogawa ipe'. Ea' dei' emi ata' nanda'epa petanima pafe' paila ambagof amama awami ina la'ifimi? Na'ama ina bo'om, owa'. Dei' maina ipe' pa'i pepe owina ambagof amama wapoti'? Hapaimi. 10-11#Ro 14:5; Kl 2:16Ae' okom na'i ipe', umbamahe. Dei' maina ukup ipe'imi ma'ima'i bo'om mapoma afagel dambainai naloma aon dambainai maloma nogota asaf owaf mataganai maloma anom nimeguf pa'i lu'wami panda' lotuma Godami?#Waf anama hianai na'i waf esis Juda fowa' sanda' lotuma God sanda'anai. Ea' esis saho'ofa waf sonda' lotuma God sanda'anai. Esis saho'ofana sanda'ana nataga na'ama etin si'i sanda' lotuma god baso'omunai.
Amama hapaimi. Na'ama maol ae' anda'anai agiambamepa notaga nalo. 12Dei' a'ipipa basef la'ifimi a'i ipe' pekwaha nomonas amama pape owina mi'uli anama. Ae' ina ape owina mi'uli Godi, owa'. Ape wafifiwi. Ea' pepe wafifipa si'i ae'. Dei' main, ae' embale'efa Krais si'i ipe'. Fowa' ipe' ina panda'me anona waf aonai, owa'. 13#1 Ko 2:3Ipe' pegawa fowa' dambadamba afe'mago ipe', alop ae'anai ina la'ifina, owa'. Ape alomepa anom nimeguf, awalapa basef bu'wami Godi a'ipipam. 14Awes lu'unai nanda'e ea' alop ae'anai aona. Amama manda'epa nimanipa. Ea' ipe' ina patolowe pandafa'me pewa' alafugae, owa'. Ipe' pandanifelame si'i pandanifel ma anona ensel Godi, o si'i Krais Jisas atona. 15Fowa' ape alomepa ipe' pandanifel endilisi. Ea' dei' danifel ipe'inai hi'alana. Ea' fowa' ipe' pandanifel endilisi na'ama pa'i ukup ma'i, I'i ipe' la'ifipa, pese'e naep ipe'imi esam. 16#Emo 5:10Ea' dei' ukup mape ipe' ma'imama ma'ae? Ae' si'i nautamepa ma a'ipipa basef amama endilisimi? Ae' ina egawa, owa'.
17Endilisi, enis epes sambaso'mami ukup mohafel mehip sa'i somboma ukup ipe'imi ma pila basef asasimi. Ea' ukup asasimi ina bo'om, owa'. Esis ina sagiambamepa ma basef Godi, owa'. Sandaiwa'ma ipe' peme' basef ae'ami. Sanda'am na'ama ma ipe' ukup mohafel la'ifima pila esis etis. 18I'i esis ukup mohafel la'ifima waf bu'unai ma sigiambamepa la'ela'ef, na'ama andeande'. Ea' i'i sonda'am na'ama nimeguf anama atom ae' ape alomepa, ina andeande', owa'. Ea' sonda'am nimeguf amama ikwahipa efe', andeande'. 19Ipe' awasi alupipei ae'ipei, ae' okom aona si'i nematawa wame' nimanimi ola awasi. Ame' okom aona ma ipe' efe' efe' etaga ma nogota anama Krais notaga nondawalap alihina opalef ipe'imi nomon ea'ae' okom bo'ona. 20Ae' ati uwahipipa! Dei' ae' okom natanea nafe'mago ipe' endilisi. Ae' ina egawa igiambamepa i'imama? Ea' okom nainailipa a'i dei' epe elomepa i'ipipa anom basef bu'wami naep ipe'imi. Ea' owa'.
Pol na'i anom basef womun etina nematawa biawa Hega kwaloma Sara
21Ipe' pa'i pepe owina mi'uli anama fowa' God naso' Mosesanai. Dei' a'i ihali'ipa ma anom basef. Ipe' pegawa basef ofagema ma mi'uli anama o owa? Dei' a'ipipa. 22Si'i basef mail Baibeli ma'i, kwanda'mana maoli Abraham nola awasi amam biam. Anona Hega kolanai. Ea' anona waulu'mana endilisi Sara kolanai. 23Nogalomana kwanda'mana maoli Hega kolanai si'i ape' epes sandaso'ama sola awasi. Ea' nogalomana Sara kolanai natagama basef la'ifimi God na'i endilisimi atom.
24Nematawa awama biawa ondola'wifa basef endilisimi atom biefim. Nemata'w akwama Hega kondola'wifa basef mataga halaf Sainai. Awasi ako'usi anona nemaf agof a'as sonda' maol etin sope owina enis epes. 25Akwa'w kondola'wifa halaf Sainai, nape anona etap hiagoma Arebia, ea' akwa'w basef womun etina wambel anama Jerusalem dei' nape etap anae'. Dei' main, akwa'w kwape kwanda' maol la'ifikw kwaloma awasi akwa'usi sape owina pepel si'i esis Juda sape Jerusalemi sape owina mi'uli God naso' Mosesanai.
26Ea' wambel ape'inai Jerusalem nape gani ilif. Emi egafis sape wambel anama ina sape owina mi'uli anama, owa'. Sandatagah sape wafifis.
27Dei' main, Baibel na'iam na'ama na'i,
“Nemata'w, ine' nemata'w asinai ma owa' nela awasi, ine' dei' nindanifal ni'i mehip. Ine' ata' owa' neme' nimanimi si'i sola awasi same'ami, ine' nega ni'i mehip! Nemata'w asa'wi anona nemaf kola awasi hiesi kwikila' nemata'w kwaso' aman kolasi.”
28Dei' ipe' sahin owan ae'ipei, ipe' awasi Godi pataga si'i basef la'ifimi God na'i endilisimi atom si'i Aisak. 29Fowa' nogota anama awani aman nataga waf anama sandaso'amainai nase'ana nimanimi awani aman inima God atona nanda'an nataga pepel Ambal Bu'unai Ananinai. Amama na'ama etin dei' wapoti'. Esis sape owina mi'uli fowa' God naso' Mosesanai sase'apa nimanimi ape' awasi Godi. 30Dei' buk Baibel na'iam na'imama? Na'iam na'i,
“Galo'makwo nemata'w akwama agel a'akwi kwanda' maol na'a kwape owina enis epes kolomago nogaloma'w akwa'unai. So'uso'win inima anona nemaf ina nefa' amamaga ahalomanai noloma so'uso'win nataga nemata'w kwape wafifi'wi, owa'.” 31Ea' dei' ape' Kristen alupipai, ina si'i awasi wataga nemata'w akwama kwape owina enis epes, owa'. Ape' si'i awasi wataga nemata'w akwama wafifi'wi.
Zur Zeit ausgewählt:
Galesia 4: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.