Galesia 6
6
Ape' mondagigiambanama esis alupusi ma mofa' nimanimi meatagamasi
1Sahin owan, ipe' i'i piti enin epen ipe'ini nenda' anona waf aonai, ipe' enipa pape la'ifipama Ambal Bu'unai Godi pigiambaman pi'ipan so'uso'umbel. Ipe' hipei atona etin pindumafuma andeande' ma waf ipe' panda'anai. Na'ama Satan nogwamba ipe' wapoti'. 2Ipe' pigiambama sahin owan ipe'isi ma pefa' nimanimi asasimi. Penda' waf anama nefe' nondahama mi'uli Kraisi endilisi. 3I'i enin epen okom ni'i nembaso'am ni'i enin agel lu'unai ma enin agel a'an, epen inima nambaso'ma okom ananinai atona. 4Epes hiesi atona etin ata' sowaloga maol asasinai deindei', bo'ona o aona. I'i bo'ona, epen inima nindanifel ma maol anama ananinai. Ea' enin maol a'ana newaloga maol enin epeni. 5Amam nematawa hiesi atona etin anona nemaf sofa' nimanimi asasimi deindei'. 6Emi egafis sefa' basef Godi, esis ukup mi'i sowaloga amamaga bu'wami asasimi sose'ana tu'wanim mefe'ma epen gawainai nawalipami. 7Ipe' ina pembaso'ma ipe' etipa pi'i God okom nase'anai gawa a'anai, owa'. I'i enin epen newa anom amamaga aof ananinai, anona nemaf amamaga amama atom nitanima nela'am wapoti'. 8I'i epen inima nenda' maol neloma wafa opaf apinai ananinai, nambimb waf anama atona nonda' epen inima awen nega' hegililan. Ea' emi egafis senda' maol seloma waf Ambal Bu'unai Godi, nambimb Ambal anama nowalapai ambal namunai ma epes isima sope andeande' la'ela'ef. 9Amama atom dei' ape' ina ala'uta napa ma monda' waf bu'unai, owa'. Monda'ana la'ela'ef. I'i bihiguf ape'imi monda' maol la'ifina, anona nemaf mola' gwa'aimi bu'wami endilisi. 10I'i ape' muti eaf bu'unai, monda' waf bu'unai ma epes hiesi migiambamas atona etin. Ape' monda'ana na'ama etin la'ifipa esis sahin owan sombale'efa Dembinai mikila' manda'ana enis epes.
Pol na'i basef womun etin na'i anan si'i nail lawag usi'inai tu'wanainai naloma Jisas Krais
11Ipe' piti amef amama lu'wami dei' ahapila pen lagel ae'anai anda'mepami. 12Anom amam la'ifim endilisi ma'i motopa'mepa alop ipe'inai. Dei' maina amam manda'am na'ama? Ma'i mofa' agof lu'wami ma naep epesi.
Amam ukup ma'i na'ama ma'i, “Na'ama enis epes sogawa afa' si'i afa' wawalipasa basefa Jisas Krais naga' lawag usi'inai tu'wanainai ea' sohafa oga'.”
13Ina enis epes saila mi'uli anama God naso' Mosesani andeande', owa'. Amam matopa' alop amamunai wapoti', ina mailana andeande', owa'. Ma'i motopa' alop ipe'inai ma mofa' agof lu'wami ma mi'ipa epes hiesi mi'i, “Amam Galesia mofa' ikwaf anama matopa' alop amamunai.”
14Ea' ae' owa'etin. Andaiwa' ma epes sefela agel ae'anai lu'una, owa'. Ae' andanifel ma efela agela Dembinai ape'inai Jisas Krais atona, anan naga' lawag usi'inai tu'wanainai. Lawag anama Kraisi atona, dei' waf etapanai naga' nomon opaf ae'anai, dei' ae' si'i epen naga' lawag usi'inai tu'wanainai ma naep epes sape etapi. 15Waf anama matopa' alop o owa' motopa' alop, anama falafunai atona. Ea' God nanda'apa mataga dambaipa, waf anama endilisinai. 16Emi egafis saila basef amama ae' a'i opalef asasimi mope awanem, ea' ae' a'i God niti uwahipis nigiambamas soloma epes Israel hiesi Godi.
17Basef akutaimi amama. Ae' andaiwa' ma anona aman nose'e nimanimi wapoti', owa'. Dei' main, amam amama mahe melegw amama Jisasi mape alop ae'anai.
18Ipe' alupipei, ae' a'i Dembinai ape'inai Jisas Krais nigiambamepa na'a pepe andeande'. Dei' okom Ananinai nope molomago ambagof ipe'imi. Endilisi.
Zur Zeit ausgewählt:
Galesia 6: aojF
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2013, Wycliffe Bible Translators, Inc. All rights reserved.