یوحنا 21
21
عیسی هف نفَر شاگردونرا اَیر آرَب
1ایی مودَت اِمیکا بَه دوملَه، عیسی ایکَرَدیَیر اِشتَنش تیبِریَه دَیراچَه وَریکا کن هَه جلیلی دَیراچَه به شاگردونرا اَیر آکَردِشَه. اَ اِنتَرکِه اَیر آبَه: 2ایی روج شَمعون پِطروس، و تومای کن بَی دوقلو نی خِلِه اَکَرین و نَتَنائیل کن قانای جلیلی آدَمونکا اَ، و زبدی زوعَه اِن و عیسی دِ گله دیَیرَ شاگردونکا، یِندِنه دَرِ بینَه. 3شَمعون پِطروس اَیِنِش واتَه: «اَز مایَه گِریرا بَشیمه.» اَیِن واتِشون: «اَمه نی بَتنَه بومَمون.» پس بِرِن بَرشینَه، لاتیکَکا دَنِشتین. ولی اَ شویکا چیی نِگَتشون. 4سوکه خون، عیسی دیراچَه قِرَقیکا پامَندبَه؛ ولی شاگردِن سَر آنِگِنینَه کن اَ عیسی اَ. 5عیسی اَیِنِش واتَه: «خردَنِن، مای گَتَرون؟» اَیِن جواب آداشونَه: «نِه!» 6عیسی واتِش: «دومی لاتیکه راسته وَریکا ویرَفنَه کن مای بَگَتیرون.» اَیِن اِنتَرَ کَردشون و مای فَرَوونیکا نَشاینَه دومی لاتیکَه دلَرا دَراکنن. 7شاگردی کن عیسی اَی رَی داریَه، پِطروسیش واتَه: «اَ خداوندَ!» شَمعون پِطروس وَقتی دَرَرَست کن خداوندَ، جَخت اِشتَن شندری اِشتَن دووریکا پِپِشتِشَه - اِمی خونه کن اَ کاریرا اِشتَن شندِری بَروَردَش بَه- و اِشتنِش دَیرا چَکا ویرَفندشَه. 8اَمّا دیَیر شاگردِن لاتیکه نَه آمینَه و دومی کن ماینَه پَتلَمَه بَه اِشتَن دوملَه دَرَراکِنین، اَیِن دَیراچَه کَناریکا وِر دور نِبین بَسکَم تقریبا صد مترفاصیلَه دارینَه.
9وَقتی خِشکیرا آرَستین بَویندین آرایی زیالینه کولوستار آبَه یَه و مای چَی سَریکارَ و نون نی هِستَه. 10عیسی اَیِنِش واتَه: «تیکَه لیی اَ مایونکا کن ایسَه گَتَرونه، بوعَرَ.» 11شَمعون پِطروس لاتیکه وَرشَه و دومی خِشکیرا دَراکنیشه. دوم یاله مای نَه پَتلَمَه بَه، صَدُ و پِنجاهو و سِه گِلَه مای بَه و با اِمکن دومیکا اَنَ مای دَرِ بَه، دوم پِنِزریستَه. 12عیسی اَیِنِش واتَه: «بِر صِبانه بَرَ.» هیچ‌کم شاگردونکا جورئت نِکردشونَه اَیکا دَپَرسن کن، «تِه کییشَه؟» اِمی خونه کن اَیِن بَموستینَه اَ، خداوندَ. 13عیسی آمَه، نونی پِگَتشَه و اَیِنِش آدوعَه و مای نی آداشَه. 14ایسَه، اِم سوّمین کَرَ بَه کن عیسی، مَرگیکا زندَ آبِه دوملَه، بَشتَن شاگردونرا اَیر آرَکَری.
عیسی و پطروسی
15صبانَه هَردِ بَه دوملَه، عیسی شَمعون پِطروسی واتش: « شَمعون، یوحنا زوعَه، بَمن، اِمونکا ویشتَر رَی بَداشتیش؟» شمعون جواب داشَه: «ها خداوند؛ ته بَموستیش کن بَته رَی دارم.» عیسی بَی واتِش: «چمن وَرَ اون هَردَ چیی بدَ.» 16دوّومین کَرَ عیسی اَیکا دَپرسِستَه: « شَمعون، یوحنا زوعَه، بَمن رَی بَداشتیشَه؟» شمعون جواب داشَه: «ها خداوند؛ بَموستیش کن بَته رَی دارم.» عیسی واتِش: «چمن پَسونرا شونه گیری بکَه.» 17سوّمین کَرَ عیسی بَی واتِش: « شَمعون، یوحنا زوعَه، بَمن رَی بداشتیشَه؟» پِطروس اِمی خونه کن عیسی سه کَر اَیکا دَپَرسِسته، « بَمن رَی بَداشتیشَه؟» بَرضخ آبَه و جواب داشَه: «چمن خداوند، ته گردِ چییون بَموستیشَه؛ ته بَموستیش کن بَته رَی دارم.» عیسی واتِش: «چمن پَسون هَردَ چیی بدَ. 18حَییقتا بَه تِه باتیمَه، زمانی کن جوانتر بیشَه اِشتَن مینی دَرَبَستیشَه و هر جگا کن اَپیربَه اَشیشَه؛ اَمّا وَقتی پیر آبیشه اِشتَن بالون آج آشَکَرد و دیَیری اِشتِه مینی دَرَبست، و جگا اییرا کن نَپیرَ بَتِه بَبردیَه.» 19عیسی اِم گَفینه چِنتَر مَردِ ای ایشا اَکَریَه کن پِطروس اَینه خدا جلالی دیار آرَکَریَه. چَی بَه دوملَه عیسی بَی واتِش: «چمن دوملَه بِه.»
20اَموقه پِطروس آگَردسته و ویندشَه کن اَ شاگردی کن عیسی اَی رَی داریَه چَوون دوملَه کا آمِه. اَ هَیَه کن سوری موقه عیسی سینه سَر تَکیه ژَش بَه و اَیکا دَپَرسِستَه بَه، «چمن خداوند، کیَه کن بَتِه غَنیمی تَسلیم بَکَی؟» 21وَقتی پِطروس اَی بَویندی، عیسی کا دَپرسِستَه: « چمن خداوند، پس اَ چِه بَبی؟» 22عیسی بَی واتِش: «اَگَم اَز بِپیام تا چمن آگَردستِرا اَ زندَ بَمَندی، ته کاریر مبو؟ ته چمن دوملَه بِه!» 23پس اِم گَف برا اون دِلَکا پَخش آبَه کن اَ شاگرد نیَمَرد، ایسَه اِمکن عیسی پِطروسی نَواجیَه کن اَ نیَمَرد، بَلکَم واتِش: «اَگَم اَز بِپیام تا چمن آگَردستِرا اَ زندَ بَمَندی ته بَینه کاریر مبو؟»
آخِرین گَف
24اَ شاگرد هَه کَسیَه کن اِم چییون خونِه شاهیدی دَرِ و اِمون نوشتَشَه. اَمه بَموستیمون کن چَی شاهیدی راستَ. 25عیسی وِرَ دیَیرَ کارونی اَنجوم داشَه کن اَگَم ایلَه ایلَه اَنویسینَه، گمون نمکَرد حتی گردِ دِنیا بشا اَ کیتاوون اِشتَن دِلَکا جِگا بدَرِ.
Zur Zeit ausgewählt:
یوحنا 21: CTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
