لوقا 21

پیشکَشی بیوَه‌ژَن ژار

1عیسی سِیل کِردی اَر ایلا ئو اَلا ووژ ئو ثرودمنَلی دیتی گه پیشکَشیَل ووژونَ ماوشد اِنوم صَنُق پیشکَشی معبد خدا. 2اِ ایی بِنَ بیوَه‌ژَن ژاریشی دیتی گه دو قَرو آوشدی اِنوم صَنُق. 3اَسَه عیسی وِتی: «اِراسی موشِم‌ئونتو، ایی بیوَه‌ژَن ژارَ اژ کُل اونَل ویشتِر داتی. 4اَرِیَگه اونَل کُل اژ زیاکی مالِ‌منال ووژو دائو، مِنتائای ایی ژِنَ وَه ژاری ووژا، کُل رِسخ ئو روژی ووژ داتی.»

عیسی رِمیاین معبد خدا پیشگوئیَ مِهِه

5وخدی بِری تیَریفون اژ معبد خداءَ مَهَرد گه چطور وَه بَردَل رنگین ئو پیشکَشیَل وخمی اِررازیاءَ، عیسی وِتی: 6«اَ روژِلَ مای گه اژ اَ چیئَه گه اَر ایرَه موئینینو، بَردی اَرسر بَردی‌تِر نِمَمینی اَر جا، بلکِم کُلَ مَرِمی‌اِر.»

7اونَل اژ عیسی‌ئو پِرسی: «استاد، کِ ایی اتفاقِلَ مَکُوءِ ئو نشونَه نزیکا بیئِنو چیَ؟» 8عیسی جوواوا داتی: «حُواستو بو اژ رئی اِرناینو؛ اَرِیَگه فِرَه کسَل وَه نُم مِنَ مان ئو موشِن: ”مِه هَر اَوِمَ“ ئو ”زمونی گه باس بای، رَسیَ“. نَچِنَ تُرّونا.

9«ئو وخدی خَوَر جنگل ئو گالِ‌راوِلَ مَشتوئینو زِلَتو نَچو. اَرِیَگه اول‌بار باس هُنَ اتفاقَلی بِکُوءِ، مِنتائای جاوارجا نِماوَ آخِر زَمو.» 10اَسَه وِتی‌ئونو: «قومی اَرضد قومی‌تِر ئو مملکتی اَرضد مملکتی‌تِر هیزَمَگِری. 11زَمی‌لرزَه‌ل کَلِنگ ئو قیَطی ئو طاعون اِ جائَل جوراجورَ مای، اتفاقَل فِرَه گَنی مَکُوءِ گه آمیزاءَ زِلَ‌تِراقا ماو ئو نشونَه‌ل کَلِنگی اِنوم آسمو ظاهرَ ماو.

12«مِنتائای وِر اژ کُل یوئنَ، هُمَه مَگِرِن، آزارتونَ میَن ئو هُمَه میَنَ دس عَبادتگال ئو زندونَل، ئو وَه‌سونگَ نُم مِه، میَرِنتون اِرَه تک پاتِشائَل ئو والیَل 13ئو یَه ماوَ مِجالی اَرِه هُمَه تاگَه شاتی بینو. 14اِسَه یَتونَ خو اَویر بو گه اژ وِرِکار هولتون اِرانَگِری گه چطور جوواوا دِینو. 15اَرِیَگه مِه کلوم ئو حکمتتونی میَم‌ئون گه هُیچ کُم اژ دشمنَلتو نتونِن بوسِنی اَر نوا یا بوئنی اَرضد. 16جُ‌جُ داباوَه ئو بِرالتو ئو قوم ئو خویشَل ئو رِقیفَلتو میَنَ قاپ هُمَه‌آ ئو بِری اَژینتونَ مَکُشِن. 17مردِم کُل وَه خاطر نُم مِن اژ هُمَه بیزارَ موئن. 18مِنتائای مویتونی اژ سر کَما نِماو. 19وَه طاخَت ئو پایاری گیو ووژتو نجادَ مِینو.

20«مِنتائای وخدی بوئینینو گه لشکرَل دور شیَر اورشلیمون اِراگِرتیَ بِذانِن گه نزیکَ اِربِچوقی. 21اَسَه اونَلی گه هان اِنوم هیال یهودیَه بِحوان اِ کویَل ئو اونَلی گه هان اِنوم شیَراِر اژ شیَر بِهَنَ دِریر ئو اونَلی گه هان اِنوم دشت ئو بیاوون‌اِر، نان اِرَه نوم شیَر. 22اَرِیَگه اَ روژِلَ، روژَل مِکافاتَ گه کُل اَ چیئِلَ گه اِنوم کِتاوَل مقدّس نُیسیاءَ اَنجومَ مَگِری. 23اِ، اَ روژِلَ، هِرّو اَرِه ژِنَلی گه لَمو پِرَ ئو دالی گه آویلَ‌شیرِن! اَرِیَگه مِصیوَت کَلِنگی ایی وِلاتَ اِرامَگِری ئو ایی مردِمَ موئن دچار خَضو خدا. 24اونَل وَه ضرپَه‌ل شِمشیرَ مَکُوئِن ئو اِنوم کُل ملتِلَ میَرِنون‌َ اسیری ئو اورشلیم اِ ژیر پا خِرِیهودیَل تِلوهَرا ماو تا وخدی گه دورَه خِرِیهودیَل برَسیَ آخِر.

25«ئو نشونَه‌لی اِنوم هویَر ئو مُنگ ئو آسارَه‌ل دیارا مِ. اَررُی زَمی، ملتَل اژ هوفَه دریا ئو تافَل پریشونا موئن ئو تَپ اَرِنونَ مَشوئی. 26مردِم اژ ترس ئو فگِر چیئَلی گه ما اَرسر دنیا، دلونَ مَتَپی، اَرِیَگه قدِرتَل آسمونِلَ مانَ رِکَه. 27اَسَه کُر اِنسونَ موئینِن گه وَه قدِرت ئو جِلال کَلِنگی اَرسر اُریکا مای. 28مِنتائای وخدی بِنیا ایی چیئِلَ بِنِری، راس بوسِن ئو سِرَل ووژتو بِگِرِنِ بِلِنگ، اَرِیَگه آزادی هُمَه نزیکَ!»

29ئو ایی متلَ اَرِه وِتِنی: «سِیل کَن اَر دار انجیر ئو دارَلی‌تِر. 30هَریَگه وَلگَ میَن، موئینینون ئو مَفیَمینو گه تاوِسو نزیکَ. 31ئو هَرهُنَ، هَریَگه بوئینینو ایی چیئِلَ اتفاقَ مَکُوءِ، مَفیَمینو گه پاتِشائی خدا نزیکا بیَ. 32حخیختاً، موشِم‌ئونتو، تا کُل ایی چیئِلَ اتفاق نَکُوءِ ایی نسِلَ اژ بِن نِمَچو. 33آسمون ئو زمین اژ بِنَ مَچِن، مِنتائای قصَه‌ل مِه هرگِس اژ بِن نِمَچو.

34«مِنتائای حُواستو بو، تاناخواد عِیاشی ئو مَسی ئو هول ایی زِنِه‌یَ دلتو سخدا کِ ئو اَ روژَ اِجور تِله‌ی ناهَلمونَ باءَ سرتون‌اِرا. 35اَرِیَگه ماءَ سر کُل مردِم ایی دنیااِرا. 36اِسَه هَر حُواستو بو ئو دوعا بِهَن تاگَه بتونینو اژ کُل ایی چیئِلَ گه وَه ایی زویَ اتفاقَ مَکُوءِ، اِ اَمو بِمینینو ئو بوسینون اَر حضور کُر اِنسو.»

37عیسی کُلِ روژی اِنوم معبد خدا تیَلیمَ ماتی، مِنتائای کُلِ شوی اژ شیَرَ مَهَردی دِریر ئو اَررُی بِنار کوی زِتو نُمی، شو تا صو مَمَنَ خَوَر. 38صوشفق مردِم اَرِه شِنَفتِن قصَه‌لی جیَمَ موئیان اِنوم معبد.

Zur Zeit ausgewählt:

لوقا 21: LBT

Markierung

Kopieren