لوقا 20

وَه چه حَخی ایی کارِلَ مِهِین

1یَکی اژ روژَلی گه عیسی اِنوم معبد خداون تیَلیم مردِمَ ماتی ئو خَوَر خَوش پاتِشائی خدا موعظَه مَهَردی، رِئیسَل کاهنَل ئو مَلِمَل تورات وَه‌گَرد شیخَل یهود هاتِن اِرَه تک عیسی 2ئو وِتو: «بوش‌ئونمو، وَه چه حَخی ایی کارِلَ مِهِین؟ کی ایی حخَ داسی‌ئونِت؟» 3عیسی جوواوا داتی: «مِن‌یش چیتونی اَژینَ مَپِرسِم؛ بوشِن‌ئونِم، 4آیا خُسِل تیَمید یحیی اژ جونِم خدا بی یاگَه اژ جونِم اِنسو؟» 5اونَل وَه‌گَرد یَک شورو کِرد ئو وِتو: «اَرّ بوشیم اژ جونِم خدا بی، موشی، ”اَنی اَرچَه ایمونتون‌ئون ناوِرد؟“ 6ئو اَرّ بوشیم اژ جونِم اِنسو بی، مردِم کُل سنگسارمونَ مَهَن، اَرِیَگه عخیدِه‌ئو یَسَ گه یحیی پِخَمَری بی.» 7ایلَهَه جوواوُ دا: «نِمَذانیم اژ کوءَ.» 8عیسی وِتی‌ئونو: «مِن‌یش نِموشِم‌ئونتو وَه چه حَخی ایی کارِلَ مَهَم.»

متل باخائونَل شر

9اَسَه ایی متلَ اَرِه مردِم وِتی: «پیای باخ انگویری آوشدی ئو داتیَ کِرا وَه چَن باخائو ئو اَرِه مِدت فِرِه‌ی چی اَرِه مملکتی‌تِر. 10مُسِم انگویر چِنین، خُلُمی کِل‌کِردی اِرَه تک باخائونَل تاگَه بیَر او اژ ثمر باخ انگویر بِسینی. مِنتائای باخائونَل داون اَری ئو دس پَتی کِلوکِردِ دُما. 11اَسَه صائای باخ انگویرِهَه خُلُمی‌تِر کِل‌کِردی، مِنتائای اُوُ داون اَری ئو افتضائو آوشد، ئو دس پَتی کِلوکِردِ دُما. 12اَسَه سِئِمی خُلُم کِل‌کِردی، مِنتائای اوئیشو زیَمی کِرد ئو آوشدونَ دِریر.

13«اَسَه صائای باخِهَه وِتی: ”چَه بِهَم؟ کُر عزیزگرامی ووژِم کِلَ‌مَهَم؛ هایتِر عزّت بِنِنی اَری.“ 14مِنتائای باخائونَل وخدی کُرِهِئو دی، وَه‌گَرد یَک نیشتِنَ شور، وِتو: ”یَه صائای میراتَ. بورِن بِکُشیمی تاگَه میرات بوتیَ هِن ایمَه.“ 15اَسَه اوُ اژ باخ انگویرِهَه آوشدَ دِریر ئو گیونو گِرت.

«اِسگَه صائای باخِهَه چِه‌ئون اِرَمِهِه؟ 16اوءَ مای ئو باخائونِلَ مَکُشی ئو باخ انگویرِهَه مِئَه دس کسَلی‌تِرا.» مردِم وخدی گه یِئونَ شنَفت، وِتو: «اَلوَت گه نه!» 17مِنتائای عیسی سِیل کِردِنی ئو وِتی: «اِسَه میَنا اَ نُئِشتَه اِنوم کِتاو زبور داوود چیَ گه موشی:

”بَردی گه مِمارَل رَدو کِرد،

بیَ بَرد بِنچین ساخدِمو“؟

18هر کی بِکُوءِ اَرسر اَ بَردَ، حُیردَ ماو ئو اَرّ اَ بَردَ بِکُوءِ اَرسر کسی، تِلوهَرا مِهِیتی.» 19مَلِمَل تورات ئو رِئیسَل کاهنَل وَه‌چوینا فیَمین ایی متلَ اِبارَه اونِلَ موشی، مِهِستو جاوارجا بِگِرنی، مِنتائای زِلَئون اژ مردِم چی.

20اَسَه عیسی‌ئو آوشدِ کِل چیَم ئو جاسوسَلونی کِل‌کِرد اِرَه تک گه ووژونَ آمَل راس‌وَشی نشونَ ما. اونَل وَه دُم یَه‌آ بینَ گه دَسپیچی اژ قصَه‌ل عیسی بِهَنَ دی تاگَه تسِلیم کَنی اَر قدِرت‌واختیار محکمَه والی. 21اَسَه جاسوسَل اژ عیسی‌ئو پِرسی: «استاد، مَذانیم گه تو حخیختَ موشین ئو تیَلیمَ مِین ئو جونِمداری کس نِمِهِین، بلکِم رئی خدا وَه دُریسی یاء مِین. 22مِطابق شریعت، آیا خِراج دائِن وَه امپراطور روم جائزَ یاگَه نه؟» 23مِنتائای عیسی رِنگَری اونَل فیَمی ئو وِتی‌ئونو: 24«سکَه‌می نِشو دَن. نَشق ئو نُمی گه هار رُی ایی سکَه، هِن کیَ؟» 25جوواوُ دا: «هِن امپراطور روم.» عیسی وِتی‌ئونو: «اِسَه هِن امپراطور بیَنَ امپراطور ئو هِن خدا بیَنَ خدا!» 26هُنَ، نتونستو اَرتَک مردِم، اوءَ قصَه‌لی باوژِنِ تِلَه، ئو هُنَ اژ جوواو عیسی بِلُجوئیو هات، گه دیَر دَنگو نَهَرد.

سؤال اِبارَه زِنیابیئِن مِردیَل

27اَسَه بِری اژ شیخَل فرقَه صَدّوقی گه زِنیابیئِن مِردیَلو حاشا مَهَرد، هاتِن اِرَه تک عیسی، 28ئو سؤالونی اَژی کِرد، وِتو: «استاد، موسی اَرِه ایمَه نُیسونی گه اَرّ بِرا پیای بِمِری ئو ژَن بی‌آویلی بِیلی اَر جا، اَ پیا باس بیوِهَه بُوازی تاگَه نسِلی اَرِه بِرا ووژ بِیلی اَر جا. 29اِسگَه، هفت بِرا بین. بِرا اولینِهَه ژَنی حُاستی ئو بی‌اولاد مِرد. 30اَسَه دوئِمینِهَه 31ئو دُماخِرِ سِئِمینِهَه اَ ژَنَ حُاستی ئو هَرهُنَ هَر هفت بِرا مِردِن، بی‌یَگه آویلی اژ ووژو بِیلِن اَر جا. 32آخِرسر اَ ژَن‌یشَ مِرد. 33اِسگَه، اِ قیومت، اوءَ ماوَ ژَن کُمینو؟ اَرِیَگه هَر هفت بِرا اَ ژَنونَ حُاستوئی.»

34عیسی جوواوا داتی: «مردِم ایی دنیاءَ ژِنَ مُوازِن ئو شویَ مَهَن. 35مِنتائای اونَلی گه لائق بوئن بِچِن اِنوم اَ دنیاآ ئو اژ مِردیَل زِنیا بوئن، نه ژِنَ مُوازِن ئو نه شویَ مَهَن، 36اَرِیَگه دیَر اصِلا نِمَمِرِن؛ اَرِیَگه اِجور فریشدَه‌لِن. اونَل آیلَل خدان، اَرِیَگه آیلَل قیومتِن. 37مِنتائای اِبارَه یَگه مِردیَل زِنیا موئن جُ‌جُ موسی‌یش یَه نِشو داسی، اِ حَقات اَ بوتِک آگِرَ گه خداون، خداءِ ابراهیم ئو خداءِ اسحاق ئو خداءِ یعقوب هِنا بیَ، 38خدا خداءِ مِردیَل نیَ، بلکِم خداءِ زِنیِلَ؛ اَرِیَگه اَرتَک خدا کُل زِنیِن.» 39اَسَه، بِری اژ مَلِمَل تورات وِتو: «استاد فِرَه خوئِت وِت!» 40ئو دیَر هُیچ‌کس زِلَه نَهَردی چیئی اَژی بِپِرستی.

41اَسَه عیسی وِتی‌ئونو: «چطورَ گه موشِن اَ مسیحی گه باس بای کُر داوودِ پاتِشاءَ؟ 42اَرِیَگه داوود ووژ اِنوم کِتاو زبورَ موشی:

«”خداون وِتیَ خداون مِه:

بِنیش اَر دس راس مِنا

43تاگَه دشمنَلِت بِهَمَ کرسی اِژیر پائلِت.“

44اَسَه اَرّ داوود اوءَ ”خداون“ هِنا مِهِه، چطورَ مَتونی کُر داوود بو؟»

45هَرهُنَ گه مردِم کُل گوشونَ ما، عیسی وِتیَ شاگردَل ووژ: 46«اژ مَلِمَل تورات دویرا بِگِرِن اَرِیَگه دوس دیرِن وَه چوخا دُرّا بِچِنَ رئیا ئو مردِم اِنوم کویچه ئو بازار سِلامو کَن، ئو اِ عَبادتگائَل بیتِرین جائو داشدوئی ئو اِ مِمونیَل بِنیشِن اَر بِلِنگ مِجِلیسا. 47اژ یِه لا مالَل بیوَه‌ژِنَل خارَتَ مَهَن ئو اژ یِه لاتِر، اَرِه رِشالَتی، دوعا ووژو دِریژا مَهَن. مِکافات یوئنَ فِرَه سخدتِرَ ماو.»

Zur Zeit ausgewählt:

لوقا 20: LBT

Markierung

Kopieren