لوقا 19

عیسی ئو زَکّا خِراجگیر

1عیسی چی اِنوم شیَر اَریحاآ ئو اَرنوم شیَرا کِلَ موئیا. 2اَر اورَه پیا ثرودمنی بی، گه نُم زَکّا بیتی، او رِئیس خِراجگیرَل بی. 3او مِهِستی بوئینی عیسی کیَ، مِنتائای اژ زور جیَمیَت نِمَتونستی عیسی بوئینی، اَرِیَگه دائول کُئل بیتی. 4وَه ایی خاطرَ، رَمیِ نوا ئو اژ دار انجیر کوئی چیَ بِلِنگ تاگَه او بوئینی، اَرِیَگه عیسی اژ اَ رئیا کِلَ موئیا. 5وخدی عیسی رَسی اَر اورَه، سِیل بِلِنگ کِردی، وِتون: «زَکّا، زوی کَ بورَ هُار اَرِیَگه ایمِرو باس بوسمِ مال تو.» 6زَکّا هِرازِه هاتَ هُار ئو وَه رُی خَوش ئو خَوشالی مِمو کِرد. 7مردِم وخدی یِئونَ دی کُل خُت‌خَتو کِرد گه: «چیَسَ مِمونی اَرِه مال پیا گناکاری.» 8زَکّا اژ جا هیزگِرتی ئو وِتیَ عیسی خداون: «اِاِ آقا، اِسگَه نِصم دارِندار ووژمَ موئَشخِمَ ژارَل، ئو اَر چیمی وَه ناحخ اژ کسی گِرتیَ چوار بِرُوَرَ میَمی‌ئونِ دُما.» 9عیسی وِتیَ زَکّا: «ایمِرو نجاد هاتیَسَ نوم ایی مالا، اَرِیَگه ایی پیائیشَ اولاد ابراهیمَ. 10اَرِیَگه کُر اِنسو هاتیَ تاگَه بِکُوءِ مِنِی اَوَه گه گم بیَ ئو نجاد دِیتی.»

متل پاتِشا ئو دیَه خِلمتکار

11هَرهُنَ گه اونَل گوشونَ ماءَ ایی قصه‌لَ، عیسی دُما قصَه‌لی متلی وِتی، اَرِیَگه اِ هِناس اورشلیم بی ئو مردِم گُمونونَ مَهَرد پاتِشائی خدا میا هِرازِه بای. 12اِسَه عیسی وِتی: «نجیم‌زاءِی چی اِرَه وِلات فِرَه دویری تاگَه اَرِه ووژ مقوم پاتِشائی اَ وِلاتَ بِسینی ئو گِلابیری. 13اِسَه، دیَه نفر اژ خِلمتکارَل ووژ هِنا کِردی ئو وَه هر کُم اَژینو یِه سکَه طِلا داتی گه مِزدَس سه مُنگ کار یِه کارگر بی ئو وِتی: ”تا گِلاهُاردِن مِه وَه ایی پیلَ مامِلَه کَن.“ 14مِنتائای هُم‌وِلاتیَلی، گه اژ او بیزار بین؛ اِ وَر ووژو اِ دُما او بِری پیائو کِل‌کِرد گه بوشِن: ”ایمَه نِمِمو ایی پیاءَ اَر ایمَه سِلطنت کِ.“ 15وخدی او رَسیَ مقوم پاتِشائی گِلاهُارد اِرَه وِلات ووژ. اَسَه فِربو داتی تا هِنا کَن اَر خِلمتکارَلی گه پیل‌ئون دائینی، تا بِذانی هر کُم چَنی فادِه‌ئو کِردیَ. 16اولی هات ئو وِتی: ”اِاِ آقا، سکَه تو دیَه سکَه‌تِر فادَه کِردیَسی.“ 17آقای وِتون: ”آفِری، اِاِ خُلُمِ خو! اَرِیَگه اِ چیئَل کَم اَمونتدار بین، حکِمرونی دیَه شیَرتَ مَسپارِم‌ئون.“ 18دوئِمی هات ئو وِتی : ”اِاِ آقا، سکَه تو پنج سکَه‌تِر فادَه کِردیَسی.“ 19آقای وِتیَ اویش: ”اَر پنج شیَر حکِمرونی کَ.“ 20اَسَه یَکی‌تِر هات ئو وِتی: ”اِاِ آقا بفرما، یَه سکِهَتَ. لوئِم داسَ پَروئی ئو هیزِم‌داءَ. 21اَرِیَگه زِلَم اَژینتَ مَچیا، تو پیا سخدگیری کین. اژ اَ چیئَه گه نَنیاتَ، هیزَمِین ئو اژ اَ چیئَه گه کشتِت نَهَردیَ دروءَ مِهِین.“ 22آقای وِتون: ”اِاِ خُلُم شرَبارَ، وَه قصَه‌ل ووژِت حُکِمتَ مَهَم اَری. تو گه مَذِناسدِت پیا سخدگیری کِم، اژ اَ چیئَه گه نَنیامَ هیزَمیَم ئو اژ اَ چیئَه گه کِشتِم نَهَردیَ دروءَ مَهَم، 23اَرِه‌چَه پیل مِنتَ صرافَل نا تا وخدی گه اژ سفر گِلابیرِم، پیلِهَمَ گَرد فادِهِه بِسینم اَژینِت؟“ 24ئو وِتیَ آمَلی گه اَر اورَه بینَ: ”سِکِهَه اَژی بِسینِنی ئو بیَنَ اَوَه گه دیَه سکَه دیری.“ 25اونَل جوواوُ دا: ”اِاِ آقا، او گه ووژ دیَه سکَه دیری!“ 26وِتی: ”موشِم‌ئونتو گه وَه هر کی گه دیری ویشتِرَ میَن؛ مِنتائای اَوَه گه نِری جُ‌جُ اَویشَ گه دیری مَسینِنی اَژی. 27اِسگَه اَ دشمنَلی گه مِنو نِهِست تا سِلطنت اَرینو بِهَم، بارن اِرَه ایرَه ئو اِبِرُوَر مِه بِکُشِنو.“»

عیسی ما اِنوم اورشلیم

28دُما ایی قصه‌لَ عیسی اَر نوا مردِم کَتِ رئی چی اِرَه اورشلیم.

29وخدی رَسیَ آبادی بِیت‌فاجی ئو بِیت‌‌عَنیا گه اَررُی بِنار کوی زِتو بین، دو نفر اژ شاگردَل ووژ کِل‌کِردی ئو وِتی: 30«بِچِن اِرَه آبادی‌ای گه هار ویرَرویرتو. هَریَگه رَسینون اَر اورَه، خِرولی موئینینو گه بوئنیاسا ئو تاگَه اِسگَه کس سُوار نوئیِ. واز کَنی ئو بارنی اِرَه ایرَه. 31اَرّ کسی اَژینتو پِرسیتی: ”اَرچَه وازَ مِهِینونی؟“ بوشِن: ”خداون نیازَ بی دیرِتی.“» 32اَ دو شاگردَ چِن ئو کُل چیو هَراَ جورَ دی گه عیسی وِتوئیتی. 33وخدی داشدو خِرولیِهِه‌ئو وازَ مَهَرد، صائایَلی وِتون‌ئونو: «اَرّا خِرولیِهَه وازَ مِهِینو؟» 34دو شاگردِهَه جوواوُ دا: «خداون نیازَ بی دیرِتی.» 35اِسَه خِرولیِهِه‌ئو آوِرد اِرَه تک عیسی. اَسَه چوخائَل ووژو آوشدون اَر کول ئو عیسی‌ئو سُوار کِرد اَری. 36هَرهُنَ گه عیسی مَچیاءِ نوا، مردِم چوخائَلو وِلا اِرامَهَرد اَرنوم رئی. 37هَرهُنَ گه عیسی نزیکا موئیا ئو هَنی اِنوم سِرولیژی کوی زِتو بی، کُل شاگردَل چورِّم وَه خَوشالیا خدائون اَرِه کُل مُجِزَه‌لی گه اژ اوُ دوئی، وَه دَنگ کَلِنگ شُگِرَ مَهَرد 38ئو موئِتو گه:

«بِمارِکَ اَ پاتِشای گه وَه نُم خداونَ مای!

صُئل‌وسِلامتی اِنوم آسمون،

ئو جِلال اِ عرشِ برین بو!»

39بِری اژ شیخَل فرقَه فَریسی اِنوم جیَمیَت وِتونَ عیسی: «استاد، شاگردَلِت مِنا کَ!» 40عیسی جوواوا داتی: «موشِم‌ئونتو اَرّ یوئنَ بی‌کِش بوئن هَرایی بَردِلَ مَقارِنِن!»

41اَسَه وخدی رَسی اَر هِناس اورشلیم ئو شیَر دیتی، اَرِه بیتیِ گیری 42ئو وِتی: «کوشگُ تو، اَاَ تو، ایمِرو، مَذِناسدِت گه چَه اَرِه تو صُئل‌وسِلامتیَ ماری. مِنتائای حِف گه اژ چیَمَل تو پنهونِن. 43اَرِیَگه اَ روژِلَ مای گه دشمنَلِت وَه دورتونا سنگرَ مَسازِن ئو اژ هر لا دورتَ مَگِرِن ئو چاتمَه‌تَ مَهَن؛ 44ئو ووژت ئو آیلَلِت اِ دَرینتَ مَکیشِنَ خاک ئو خوین. بَردی اَرسر بَردی اِنوم تو نِمِیلِن اَر جا؛ اَرِیَگه زمونی گه خدا هاتِ دیارِت، درکِت نَهَرد.»

عیسی معبد خداون تَمیسا مِهِه

45اَسَه عیسی چی اِنوم قِلا معبد ئو بِنیا ناتی دسفِروشَل کِردیَ دِریر، 46ئو وِتی: «اِنوم نُسَخ مقدّس نُیسیاءَ گه، ”مال مِنَ ماوَ مال دوعا“؛ مِنتائای هُمَه اَوتونَ کِردیَسَ ’لونَه دُزَل‘.»

47عیسی کُلِ روژی اِنوم معبد تیَلیمَ ماتی. مِنتائای رِئیسَل کاهنَل ئو مَلِمَل تورات ئو شیخَل قوم اِکِر بینی بِکُشِنی، 48مِنتائای رئیونی اَرِه اَنجوم دائِن نشخه‌ئو نِمَهَردَ دی، اَرِیَگه مردِم کُل وَه دارا بین اَرِه شنَفتِن قصَه‌لی.

Zur Zeit ausgewählt:

لوقا 19: LBT

Markierung

Kopieren